Li gora hesabekê 80 selef cahilên Amêrîkayê dua dikin, lê ji wana tenê nîvî her roj dua dikin. Bêşik, gelek ji wan dixwazin bizanibin: “Gelo dua tenê bona wê yekê ye, wekî dilê meriva hêsa be, yan hê zêde?”

•  Dua çi ye?

•  Gelo Xwedê dua dibihê?

•  Ez derheqa çi dikarim dua bikim?

•  Cahilên din çi dibêjin

 Dua ev heye xeberdana tevî Efirandar. Hela bifikire ev qedirekî çiqas mezin e! Yehowa her aliyava ji meriva qewîtir û bilindtir e, lê ew “ji me her kesî ne dûr e” (Karên Şandiya 17:27). Kitêba Pîroz me hêlan dike: “Xwe li Xwedê bigirin, Xwedê jî wê xwe li we bigire” (Aqûb 4:8).

 Tu ça dikarî nêzîkî Xwedê bî?

•   Ya pêşin, bi saya dua, çimkî usa tu tevî Xwedê xeber didî.

•   Ya duda, bi saya hînbûna Kitêba Pîroz, çimkî usa Xwedê tevî te “xeber dide”.

 Heleqetiya usa, dêmek dua û hînbûna Kitêba Pîroz, wê alî te bike dostiya xwe tevî Xwedê qewî bikî.

 “Xeberdana tevî Yehowa, dêmek tevî Yê Herî Bilind, qedirekî lapî mezin e bona meriva” (Cêrêmî).

 “Çaxê ez duada dilê xwe Yehowara vedikim, ez diha nêzîkî wî dibim” (Mîranda).

 Hergê tu baweriya xwe Xwedê tînî û wîra dua dikî, dibeke dîsa jî tera hêsa nîne bawer bikî, wekî ew duayên te dibihê. Lê bi rastî Kitêba Pîroz derheqa Xwedê usa dibêje: “Tu ku dua dibihêyî” (Zebûr 65:2). Ev usa jî hêlan dike “hemû xemên xwe bavêjine ser wî”. Çira? “Çimkî ew bona we xem dike” (1 Petrûs 5:7).

 Bifikire: Tu timê wede divînî, wekî tevî hevalên xweyî nêzîk xeber dî, usa nîne? Hergê tu dixwazî bibî dostê Yehowa, timê tevî wî xeber de û duada navê wî, Yehowa, hilde (Zebûr 86:5-7; 88:9). Bi rastî Kitêba Pîroz me hêlan dike “her gav dua bikin” (1 Têsalonîkî 5:17).

 “Dua ev xeberdana orta min û Bavê minî ezmana ye, kîjanîda ez dikarim bi temamî dilê xwe vekim” (Mozês).

 “Ez tevî Yehowa derheqa hemû tiştî hûr bi hûr xeber didim, çawa ku minê tevî diya xwe û hevala xweye nêzîk xeber da” (Karîn).

 Kitêba Pîroz dibêje: “Xwestina we bira bi dua-dirozga, razîbûnêva tevayî, Xwedêva eyan be” (Fîlîpî 4:6).

 Gelo ev tê hesabê, wekî duada em dikarin derheqa çetinayên xwe gilî kin? Belê, em dikarin! Kitêba Pîrozda tê gotinê: “Tu barê xwe bide Xudan Ewê hilgire dewsa te” (Zebûr 55:22).

 Belê, çaxê Xwedêra dua dikî, tu gerekê ne tenê derheqa problêmên xwe gilî kî. Keçikek bi navê Şantêl dibêje: “Hergê Yehowara tenê bona alîkariyê dua dikî, ev îda dostiya nêzîk nîne. Bi texmîna min pêşiyê gerekê razîbûna xwe Xwedêra bidime kifşê û gelek tişt heye bona çi jî ez dikarim razîbûna xwe eyan kim”.

 Bifikire: Tu bona çi dixwazî razîbûna xwe Xwedêra eyan kî? Derheqa kîjan sê tişta tu dikarî îro razîbûna xwe Yehowara eyan kî?

 “Hela hê bona kulîrkeke biçûk û bedew jî em dikarin razîbûna xwe Yehowara bidine kifşê” (Anîta).

 “Bifikire derheqa wan efrîna, bona kîjana tu heyr-hujmekar dimînî, yan jî derheqa rêzeke ji Kitêba Pîroz, kîjan ku gelek dilê te digire, û bona wan tişta Yehowara şêkirdar be” (Brayan).