Pirsên Xwendevana
Zebûr 12:7 usa destpêdibe: “Tê nobedarîya [wan] bikî”. Gelo ev gilî derheqa “belengaza” ye (rêza 5), yan ev besa “gotinên Xudan” dike (rêza 6)?
Kontêksta wan rêza dide kifşê, wekî rêza 7-da xeberdan derheqa meriva diçe.
Li gora Zebûr 12:1-4, kesên “amin ji nava meriva hatine hilatin”. Niha dîna xwe bide Zebûr 12:5-7:
“‘Bona xatirê feqîrên şêlandî
Û zarînîya belengaza,
Ezê niha rabim’ Xudan dibêje,
‘Wan bikime cîkî bêxof, kîjan demana wê yekê ne’.
Gotinên Xudan, gotinên xalis in,
Mîna zîvê kûra axînda helandî ne û heft cara ew paqijkirî ne.
Xudano, Tê nobedarîya [wan] bikî,
Heta-hetayê [wana] ji vî nisilî xwey kî”.
Rêza 5 dide kifşê, ku Xwedê derheqa “belengaza” dibêje, ku Ewê wana xilaz ke.
Rêza 6-da tê gotinê, ku “gotinên Xudan, gotinên xalis in”, mîna “zîvê”. Belê, bona me Kitêba Pîroz bi rastî jî gelek qîmet e (Zebûr 18:30; 119:140).
Paşê, Zebûr 12:7 usa dibêje: “Xudano, Tê nobedarîya [wan] bikî, heta-hetayê [wana] ji vî nisilî xwey kî”. Gelo xebera “wan” besa çi yan kê dike?
Ji ber ku rêza 7 paşî rêza şeşa tê, kîderêda nivîsar e “gotinên Xudan”, hine meriv dibeke difikirin, wekî xebera “wan” besa giliyên Xwedê dike. Em rind zanin, wekî Xwedê Kitêba Pîroz paristiye ji wan dijmina, yên ku dixwestin vê kitêbê qedexe kin û kuta kin (Îşaya 40:8; 1 Petrûs 1:25).
Lê çawa ku rêza 5 dide kifşê, Yehowa alî feqîra û “belengaza” dike û wana xilaz dike (Îbo 36:15; Zebûr 6:4; 31:1, 2; 54:7; 145:20).
Dêmek, rêza 7-da xebera “wan” derheqa kê tê gotinê?
Gava em vê zebûrê hûr bi hûr lêkolîn dikin, em fem dikin wekî xebera “wan”, besa meriva dike.
Zebûr 12:1 besa merivên “amin” dike, kîjana ku merivên xirab dixapînin. Paşê, rêza 3-da tê gotinê, ku Yehowa wê “zarê hemû hilekara bibire”. Li gora vê zebûrê, em dikarin bawer bin, wekî Xwedê wê xizmetkarên xwe xilaz ke, çimkî giliyên “xalis in”, dêmek zelal in.
Lema jî rêza 7 dibêje, ku Yehowa wê “wan” meriva, dêmek kesên ku ji aliyê xirabava rastî zulmiyê tên, biparêze û xilaz ke.
Nivîsarên Îbranîda yên Masorêtî, xebera “wan” tê xebitandinê. Sêptûagînta Yûnanîda rêza 7-da, du cara xebera “me” nivîsiye, lema jî ça kifş e ev derheqa feqîr û “belengaza” ye. Usa jî rêza 7 dibêje, ku Xwedê wê kesên amin “ji vî nisilî xwey” ke, dêmek ji merivên xirab (Zebûr 12:7, 8). Welgerandineke Nivîsarên Îbranîda ser zimanê Aramî, rêza 7-da usa tê gotinê: “YA XUDAN, tuyê kesên rast biparêzî, tuyê wana heta-hetayê ji vî nisilê xirab biparêzî”. Ev welgerandin jî îzbat dike, wekî Zebûr 12:7 besa “gotinên Xudan” nake.
Lema jî ev rêz gumanê dide merivên “amin”, ku Xwedê wê alî wan bike.
