Sala 2023, 23 Gulanê merivê cabdar bona mêdîsînayê Dewletên Yekbûyîda elam kir wekî malperên sosyal çiqas xirab hukum dibin ser cahila.

•   “Rast e, malperên sosyal carna dikarin zar û cahilara karê jî bînin, lê gelek nîşanên vê yekê hene ku malperên sosyal ziyanê didine sihet-qewata psîxîkî û halxweşiya zar û cahila”.—Social Media and Youth Mental Health: The U.S. Surgeon General’s Advisory, 2023.

 Lêkolînkirin dane kifşê ku çi menî hene, wekî fesal bin.

•   Cahilên 12 heta 15 salî “yên ku her roj 3 siheta zêdetir malperên sosyalîda derbaz dikin, du car zêdetir rastî xofê tên, ku dikarin sihet-qewata psîxîkîda zirarê bistînin, nava çi dikeve dêprêsiya û diltengî”.

•   Cahilên 14 salî, yên ku “bi zêdeyî malperên sosyalîva girêdayî ne, xewa xwe hilnadin, onlaynêda rastî bêhurmetkirinê tên, ji bejn-bala xwe nerazî dibin, xwe bêkêr hesab dikin, û nîşanên dêprêsiyayê bal wan hê zêde dibin, îlahî cem keçika”.

 Dê-bav ça dikarin zarên xwe biparêzin? Kitêba Pîroz şîretên kêrhatî dide.

 Haş ji zarên xwe hebin. Çawa dê-bav, bifikirin derheqa xofê û safî kin, îzinê bidine zarên xwe ku malperên sosyal bidine xebatê yan na.

•   Prînsîpa Kitêba Pîroz: “Zarotîyêda rîya rast hîn bike” (Metelok 22:6).

•   Seva ku hê zêde pêbihesin, bixûnin gotar “Gelo Lazim e Zara Min Malperên Sosyalî Bide Xebatê?”

 Hergê hûn îzinê didine zarên xwe, wekî malperên sosyalî bidine xebatê, hildin hesab ev xof, rastî kîjana ewana dikarin bên, û haş ji wê yekê hebin ku ewana onlaynêda çi dikin. Lê çawa?

 Zarên xwe ji tiştên xirab, yên ku întêrnêtêda hene, biparêzin. Zarên xwe hîn bikin xirabiyê întêrnêtêda têderxin û xwe ji vê dûr bigirin.

•   Prînsîpa Kitêba Pîroz: “Lê heta navê qaviyê û her heramiyê, yan timayê jî gerekê nava weda neyê hildanê, . . . Usa jî gotinên bêmerîfetî, yan bêfemî, yan henekên qelpê xirab” (Efesî 5:3, 4).

•   Hûn dikarin şîretên kêrhatî bixûnin gotarêda “Zarên Xwe Hîn kin ku Malperên Sosyalî Rast Bidine Xebatê”.

 Sînora daynin. Mesele, safî kin kengê û çiqas wede zara we dikare malperên sosyalîda derbaz ke.

•   Prînsîpa Kitêba Pîroz: “Awa binihêrin ku hûn nigê xwe fesal bavêjin, . . . mîna serwaxta. Dest bidine ber wext” (Efesî 5:15, 16).

•   Hûn dikarin bidine xebatê vîdêoya anîmasiyonê Malperên Sosyal bi Bîlanî Bide Xebatê seva ku alî zara xwe bikin wekî fem ke, ku çima ferz e sînora daynin.