“ಆಮೆನ್‌” ಅಂದರೆ “ಹಾಗೆಯೇ ಆಗಲಿ” ಅಥವಾ “ಖಂಡಿತವಾಗಿಯೂ” ಎಂದರ್ಥ. ಹೀಬ್ರು ಭಾಷೆಯಲ್ಲಿ ಅದರ ಮೂಲ ಪದಕ್ಕೆ “ನಂಬಿಗಸ್ತನಾಗಿರು” “ಭರವಸಾರ್ಹನಾಗಿರು” ಎಂಬ ಅರ್ಥ ಇದೆ. ಕೆಲವೊಮ್ಮೆ ಇದನ್ನು ಕಾನೂನಿನ ವ್ಯವಹಾರಗಳಲ್ಲಿಯೂ ಬಳಸಲಾಗುತ್ತಿತ್ತು. ಒಬ್ಬ ವ್ಯಕ್ತಿ ಏನಾದರೂ ಪ್ರಮಾಣ ಮಾಡಿದ ಮೇಲೆ “ಆಮೆನ್‌” ಎನ್ನುತ್ತಿದ್ದನು. ಹೀಗೆ ಆತನು ಹೇಳಿದ ಮಾತು ಸತ್ಯ ಎಂದು ಸೂಚಿಸುತ್ತಿದ್ದನು ಮತ್ತು ಅದರ ಪರಿಣಾಮ ಏನೇ ಆದರೂ ಅದನ್ನು ತಾಳಿಕೊಳ್ಳುತ್ತೇನೆ ಎಂದು ಒಪ್ಪಿಕೊಳ್ಳುತ್ತಿದ್ದನು. (ಅರ. 5:22) ಬೇರೆಯವರ ಮುಂದೆ “ಆಮೆನ್‌” ಎಂದು ಹೇಳಿದ ಮೇಲೆ ಆತನು ಅದರಂತೆ ನಡೆಯಲೇ ಬೇಕಿತ್ತು.—ನೆಹೆ. 5:13.

ಈ ಪದವನ್ನು ಗಮನಾರ್ಹ ರೀತಿಯಲ್ಲಿ ಉಪಯೋಗಿಸಿದ ದಾಖಲೆ ಧರ್ಮೋಪದೇಶಕಾಂಡ 27​ನೇ ಅಧ್ಯಾಯದಲ್ಲಿದೆ. ಇಸ್ರಾಯೇಲ್ಯರು ವಾಗ್ದತ್ತ ದೇಶಕ್ಕೆ ಬಂದ ಮೇಲೆ ಏಬಾಲ್‌ ಬೆಟ್ಟ ಮತ್ತು ಗೆರಿಜ್ಜೀಮ್‌ ಬೆಟ್ಟದ ಮಧ್ಯೆ ಸೇರಿಬಂದು ಧರ್ಮಶಾಸ್ತ್ರ ಓದಲ್ಪಡುವಾಗ ಕೇಳಿಸಿಕೊಳ್ಳಬೇಕಿತ್ತು ಮತ್ತು ಅದನ್ನು ಒಪ್ಪಿಕೊಳ್ಳುತ್ತೇವೆಂದು ಸಹ ಹೇಳಬೇಕಿತ್ತು. ಇದನ್ನು ಅವರು “ಆಮೆನ್‌” ಎಂದು ಹೇಳುವ ಮೂಲಕ ಸೂಚಿಸಬೇಕಿತ್ತು. ಅವಿಧೇಯರಾದರೆ ಯಾವ ಶಾಪ ಸಿಗುತ್ತದೆ ಎಂದು ಓದಲ್ಪಡುವಾಗ ಅವರು ಅದಕ್ಕೆ “ಆಮೆನ್‌” ಎಂದು ಹೇಳಬೇಕಿತ್ತು. ಕನ್ನಡ ಬೈಬಲಲ್ಲಿ ಅದನ್ನು “ಹೌದು” ಎಂದು ಭಾಷಾಂತರಿಸಲಾಗಿದೆ. (ಧರ್ಮೋ. 27:15-26) ಸಾವಿರಾರು ಗಂಡಸರು, ಹೆಂಗಸರು, ಮಕ್ಕಳು ಸೇರಿ ಗಟ್ಟಿಯಾಗಿ “ಆಮೆನ್‌” ಎಂದಾಗ ಹೇಗಿದ್ದಿರಬಹುದಲ್ವಾ? (ಯೆಹೋ. 8:30-35) ಆ ದಿನ ಅವರು ಕೊಟ್ಟ ಮಾತನ್ನು ಜೀವನಪೂರ್ತಿ ಮರೆತಿರಲಿಕ್ಕಿಲ್ಲ. ಅವರು ಕೊಟ್ಟ ಮಾತಿನಂತೆ ನಡಕೊಂಡರು. ಆದ್ದರಿಂದ “ಯೆಹೋಶುವನ ದಿನಗಳಲ್ಲಿಯೂ ಅವನ ಕಾಲದಿಂದ ಇನ್ನೂ ಜೀವಿಸುತ್ತಾ ಯೆಹೋವನು ಇಸ್ರಾಯೇಲ್ಯರಿಗೋಸ್ಕರ ನಡಿಸಿದ ಮಹತ್ಕಾರ್ಯಗಳಿಗೆ ಸಾಕ್ಷಿಗಳಾಗಿದ್ದ ಹಿರಿಯರ ದಿನಗಳಲ್ಲಿಯೂ ಇಸ್ರಾಯೇಲ್ಯರು ಯೆಹೋವನನ್ನು ಸೇವಿಸುತ್ತಿದ್ದರು” ಎಂದು ದಾಖಲೆ ಹೇಳುತ್ತದೆ.—ಯೆಹೋ. 24:31.

ಯೇಸು ಸಹ ತಾನು ಹೇಳಿದ ಮಾತು ಸತ್ಯ ಎಂದು ದೃಢಪಡಿಸಲು “ಆಮೆನ್‌” ಎಂದು ಹೇಳುತ್ತಿದ್ದನು. ಆದರೆ ಇದನ್ನು ಸ್ವಲ್ಪ ಭಿನ್ನವಾಗಿ ಉಪಯೋಗಿಸಿದನು. ಇದನ್ನು ಒಂದು ವಾಕ್ಯ ಹೇಳಿದ ಮೇಲೆ ಕೊಡುವ ಉತ್ತರವಾಗಿ ಅಲ್ಲ, ಒಂದು ಸತ್ಯ ವಾಕ್ಯವನ್ನು ಪರಿಚಯಿಸಲು  “ಆಮೆನ್‌” ಎಂದನು. ಕೆಲವೊಮ್ಮೆ ಆತನು ಇದನ್ನು ಎರಡೆರಡು ಸಲ ಹೇಳುತ್ತಿದ್ದನು. ಕನ್ನಡ ಬೈಬಲಲ್ಲಿ ಇದನ್ನು “ನಿಜವಾಗಿ” ಎಂದು ಭಾಷಾಂತರಿಸಲಾಗಿದೆ ಮತ್ತು ಕನ್ನಡ ವ್ಯಾಕರಣದ ಕಾರಣ ವಾಕ್ಯದ ಕೊನೆಯಲ್ಲಿ ಕೊಡಲಾಗಿದೆ. (ಮತ್ತಾ. 5:18; ಯೋಹಾ. 1:51) ಯೇಸು “ಆಮೆನ್‌” ಎಂದು ಹೇಳುವ ಮೂಲಕ ತನ್ನ ವಾಕ್ಯಗಳು ಸತ್ಯವಾಗಿವೆ ಎಂದು ದೃಢೀಕರಿಸಿದನು. ಯೇಸು ಇಷ್ಟೊಂದು ಖಚಿತವಾಗಿ ಮಾತಾಡಲು ಕಾರಣ ಏನು? ದೇವರು ಮಾಡಿರುವ ಎಲ್ಲಾ ವಾಗ್ದಾನಗಳು ಆತನ ಮೂಲಕವೇ ನಿಜವಾಗಲಿವೆ.—2 ಕೊರಿಂ. 1:20; ಪ್ರಕ. 3:14.

ಇಸ್ರಾಯೇಲ್ಯರು ಯೆಹೋವನನ್ನು ಸ್ತುತಿಸುವಾಗ ಮತ್ತು ಪ್ರಾರ್ಥಿಸುವಾಗ ಸಹ “ಆಮೆನ್‌” ಎಂದು ಹೇಳುತ್ತಿದ್ದರು. (ನೆಹೆ. 8:6; ಕೀರ್ತ. 41:13) ಪ್ರಾರ್ಥನೆಯಾದ ಮೇಲೆ “ಆಮೆನ್‌” ಎಂದಾಗ ಪ್ರಾರ್ಥನೆಯನ್ನು ಕೇಳಿಸಿಕೊಂಡವರೂ ಪ್ರಾರ್ಥನೆಯಲ್ಲಿ ಹೇಳಿದ್ದನ್ನು ಒಪ್ಪುತ್ತೇವೆ ಎಂದು ತೋರಿಸಿಕೊಡುತ್ತಿದ್ದರು. ಇದರಿಂದ ಎಲ್ಲರೂ ಪ್ರಾರ್ಥನೆಯಲ್ಲಿ ಭಾಗವಹಿಸಿದಂತೆ ಆಗುತ್ತಿತ್ತು. ಹೀಗೆ ಅವರೆಲ್ಲರೂ ಯೆಹೋವನ ಆರಾಧನೆಯಲ್ಲಿ ಆನಂದಿಸಿದರು. ರಾಜ ದಾವೀದನು ಮಂಜೂಷವನ್ನು ಯೆರೂಸಲೇಮಿಗೆ ತಂದಾಗ ಇದೇ ಆಯಿತು. ಎಲ್ಲರೂ ಮಂಜೂಷ ಬಂದ ಸಂತೋಷದಲ್ಲಿದ್ದಾಗ ಆತನು ರಚಿಸಿದ ಮನಮುಟ್ಟುವ ಪ್ರಾರ್ಥನೆಯನ್ನು ಗೀತೆಯಾಗಿ ಹಾಡಲಾಯಿತು. (1 ಪೂರ್ವ. 16:8-36) ಗೀತೆಯಲ್ಲಿರುವ ಪದಗಳನ್ನು ಹಾಜರಿದ್ದವರು ಕೇಳಿಸಿಕೊಂಡಾಗ ತುಂಬ ಪ್ರಭಾವಿತರಾದರು. “ಸರ್ವಜನರೂ ಆಮೆನ್‌ ಎಂದು ಯೆಹೋವನನ್ನು ಸ್ತುತಿಸಿದರು.” ಹೀಗೆ ಒಟ್ಟಿಗೆ ಯೆಹೋವನ ಆರಾಧನೆ ಮಾಡಿದ್ದರಿಂದ ಅವರಿಗೆ ತುಂಬ ಸಂತೋಷವಾಯಿತು.

ಮೊದಲನೇ ಶತಮಾನದ ಕ್ರೈಸ್ತರು ಸಹ ಯೆಹೋವನನ್ನು ಸ್ತುತಿಸುವಾಗ “ಆಮೆನ್‌” ಎನ್ನುತ್ತಿದ್ದರು. ಬೈಬಲನ್ನು ಬರೆದವರು ಈ ಪದವನ್ನು ತಮ್ಮ ಪತ್ರಗಳಲ್ಲೂ ಸೇರಿಸಿದ್ದಾರೆ. (ರೋಮ. 1:25; 16:27; 1 ಪೇತ್ರ 4:11) ಸ್ವರ್ಗದಲ್ಲಿರುವ ಆತ್ಮಜೀವಿಗಳು ಸಹ ಯೆಹೋವನನ್ನು ಸ್ತುತಿಸುತ್ತಾ “ಆಮೆನ್‌! ಜನರೇ, ಯಾಹುವನ್ನು ಸ್ತುತಿಸಿರಿ!” ಎಂದು ಹೇಳುವ ಮಾತು ಪ್ರಕಟನೆ ಪುಸ್ತಕದಲ್ಲಿ ದಾಖಲಾಗಿದೆ. (ಪ್ರಕ. 19:1, 4) ಆರಂಭದ ಕ್ರೈಸ್ತರು ಕೂಟಗಳ ಸಮಯದಲ್ಲಿ ಪ್ರಾರ್ಥನೆ ಮಾಡಿದ ಮೇಲೆ ಯಾವಾಗಲೂ “ಆಮೆನ್‌” ಎಂದು ಹೇಳುತ್ತಿದ್ದರು. (1 ಕೊರಿಂ. 14:16) ಪ್ರಾರ್ಥನೆಯಾದ ಮೇಲೆ ಏನೋ ಹೇಳಬೇಕು ಅಂತ ಹೇಳುವ ಮಾತು ಅದಾಗಿರಲಿಲ್ಲ.

ಯೆಹೋವನ ಸೇವಕರು “ಆಮೆನ್‌” ಎಂಬ ಪದವನ್ನು ಹೇಗೆ ಉಪಯೋಗಿಸುತ್ತಿದ್ದರು ಎಂದು ತಿಳಿದುಕೊಂಡ ಮೇಲೆ “ಆಮೆನ್‌” ಅಂತ ಹೇಳುವುದು ಎಷ್ಟು ಪ್ರಾಮುಖ್ಯ ಎಂದು ಅರ್ಥ ಆಯಿತಲ್ವಾ? ನಾವು  ವೈಯಕ್ತಿಕ ಪ್ರಾರ್ಥನೆ ಮಾಡಿದ ಮೇಲೆ ಸಹ “ಆಮೆನ್‌” ಅಂದಾಗ, ಅದು ನಿಜಕ್ಕೂ ನಮ್ಮ ಮನದಾಳದ ಮಾತು ಎಂದು ತೋರಿಸಿಕೊಡುತ್ತೇವೆ. ಬೇರೆಯವರ ಮುಂದೆ ಮಾಡಲಾಗುವ ಪ್ರಾರ್ಥನೆಯ ಕೊನೆಯಲ್ಲಿ ನಾವು “ಆಮೆನ್‌” ಅಂದಾಗ, ಆ ಪ್ರಾರ್ಥನೆಯಲ್ಲಿ ಹೇಳಿದ ಎಲ್ಲ ವಿಷಯಗಳನ್ನು ನಾವು ಒಪ್ಪುತ್ತೇವೆ ಎಂದು ತೋರಿಸಿಕೊಡುತ್ತೇವೆ. ನಾವು “ಆಮೆನ್‌” ಅನ್ನಲು ಬೇರೆ ಕಾರಣಗಳೂ ಇವೆ.

ಇದು ನಮ್ಮ ಆರಾಧನೆಯ ಭಾಗವಾಗಿದೆ. ಪ್ರಾರ್ಥನೆಯ ಸಮಯದಲ್ಲಿ ನಾವು ಯೆಹೋವನನ್ನು ಆರಾಧಿಸುತ್ತೇವೆ. ಆಗ ನಾವು ಏನು ಹೇಳುತ್ತೇವೆ ಅನ್ನುವುದರಿಂದ ಮಾತ್ರ ಅಲ್ಲ, ನಾವು ನಡಕೊಳ್ಳುವ ವಿಧದಲ್ಲೂ ದೇವರಿಗೆ ಆರಾಧನೆ ಸಲ್ಲಿಸುತ್ತೇವೆ. ನಮ್ಮ “ಆಮೆನ್‌”ಗೆ ಅರ್ಥ ಇರಬೇಕೆಂದು ನಾವು ಬಯಸುವುದರಿಂದ, ಬೇರೆಯವರು ಪ್ರಾರ್ಥನೆ ಮಾಡುವಾಗ ನಾವು ಸರಿಯಾದ ಮನೋಭಾವ ಇಟ್ಟುಕೊಳ್ಳುತ್ತೇವೆ ಮತ್ತು ಪೂರ್ತಿ ಗಮನ ಕೊಡುತ್ತೇವೆ.

ಇದು ನಮ್ಮನ್ನು ಐಕ್ಯಗೊಳಿಸುತ್ತದೆ. ಸಭೆಯಲ್ಲಿ ಪ್ರಾರ್ಥನೆ ಕೇಳಿಸಿಕೊಳ್ಳುವಾಗ ನಾವೆಲ್ಲರೂ ಒಂದೇ ವಿಷಯವನ್ನು ಕೇಳಿಸಿಕೊಳ್ಳುತ್ತೇವೆ. (ಅ. ಕಾ. 1:14; 12:5) ಪ್ರಾರ್ಥನೆಯಾದ ಮೇಲೆ ನಾವೆಲ್ಲರೂ ಸೇರಿ “ಆಮೆನ್‌” ಅನ್ನುವಾಗ ಎಲ್ಲರೂ ಐಕ್ಯವಾಗಿದ್ದೇವೆ ಎಂದು ತೋರಿಸಿಕೊಡುತ್ತೇವೆ. ನಾವು ಗಟ್ಟಿಯಾಗಿ ಹೇಳಲಿ ಅಥವಾ ಮನಸ್ಸಲ್ಲೇ ಅನ್ನಲಿ, ನಾವು ಹೇಳುವ “ಆಮೆನ್‌” ಕೇಳಿಸಿಕೊಂಡಾಗ ಯೆಹೋವನಿಗೆ ನಮ್ಮ ವಿನಂತಿಯನ್ನು ಪೂರೈಸಲು ಮನಸ್ಸಾಗುತ್ತದೆ.

ಇದರಿಂದ ಯೆಹೋವನನ್ನು ಸ್ತುತಿಸುತ್ತೇವೆ. ಯೆಹೋವನ ಆರಾಧನೆಯ ಭಾಗವಾಗಿ ನಾವೇನೇ ಮಾಡಿದರೂ ಆತನು ಅದನ್ನು ಗಮನಿಸುತ್ತಾನೆ. (ಲೂಕ 21:2, 3) ನಾವು ಯಾವ ಉದ್ದೇಶದಿಂದ ಒಂದು ವಿಷಯವನ್ನು ಮಾಡುತ್ತೇವೆ, ನಮ್ಮ ಹೃದಯದಲ್ಲಿ ಏನಿದೆ ಅನ್ನುವುದು ಆತನಿಗೆ ಗೊತ್ತು. ಕೆಲವೊಮ್ಮೆ ಟೆಲಿಫೋನ್‌ ಮೂಲಕ ಕೂಟವನ್ನು ಕೇಳಿಸಿಕೊಳ್ಳುವ ಪರಿಸ್ಥಿತಿ ಬರಬಹುದು. ಆಗಲೂ ನಾವು ದೀನತೆಯಿಂದ ಹೇಳುವ “ಆಮೆನ್‌” ಅನ್ನು ಯೆಹೋವನು ಗಮನಿಸುತ್ತಾನೆ. ರಾಜ್ಯ ಸಭಾಗೃಹದಲ್ಲಿರುವವರು ಹೇಳಿದ “ಆಮೆನ್‌” ಮತ್ತು ನಾವು ಹೇಳಿದ “ಆಮೆನ್‌” ಎರಡೂ ಒಟ್ಟಿಗೆ ಯೆಹೋವನಿಗೆ ಸ್ತುತಿ ತರುತ್ತದೆ.

ನಾವು ಹೇಳುವ “ಆಮೆನ್‌” ದೊಡ್ಡದಲ್ಲ ಅಂತ ನಮಗೆ ಅನಿಸಬಹುದು. ಆದರೆ ಯೆಹೋವನಿಗೆ ಅದು ಮುಖ್ಯ. ಬೈಬಲಿನ ಒಂದು ವಿಶ್ವಕೋಶ ಹೀಗೆ ಹೇಳುತ್ತದೆ: ದೇವರ ಸೇವಕರು “ಈ ಒಂದು ಪದವನ್ನು ಉಪಯೋಗಿಸುವ ಮೂಲಕ ದೃಢವಿಶ್ವಾಸವನ್ನು, ಸಂಪೂರ್ಣ ಅಂಗೀಕಾರವನ್ನು ಮತ್ತು ತಮ್ಮ ಹೃದಯಗಳಲ್ಲಿರುವ ಬಲವಾದ ನಂಬಿಕೆಯನ್ನು” ತೋರಿಸಬಹುದು. ನಾವು ಹೇಳುವ ಒಂದೊಂದು “ಆಮೆನ್‌” ಯೆಹೋವನಿಗೆ ಸಮರ್ಪಕವಾಗಿರಲಿ.—ಕೀರ್ತ. 19:14.