Deuteronomy 25:1-19
25 “Fin pa mwet Israel luo som nu ke acn in nununku in aksuwosye sie alein inmasrloltal, na akkalemyeyuk lah sie seltal wangin mwatal, ac sie oasr mwata.
2 Na fin fal mwet se ma sutuela in kaiyuk ke sringsring, mwet nununku sac fah sap elan oankiyuki in sringsring el. Pisen sringsring nu sel enenu in fal nu ke lupan ma koluk el orala.
3 Ku in sringsring el pacl angngaul, tuh in tia alukela. Fin pus liki, na ac fah arulana mwe akmwekinyal.*
4 “Nik kom kapriya oalin soko cow mukul ke kom orekmakunul in lolongya wheat uh.*
Ma Kunen Sie Mwet Nu Sin Tamulel Misa Lal
5 “Tamulel se fin tukeni muta ke acn sefanna, ac sie seltal misa a wangin wen natul, na katinmas sac fah tia payuk nu sin mwet sayen sou sac. Ma kunen tamulel lun mwet misa sac in payuk sel.*
6 Wen se emeet natultal ac fah oaoa mu ma nutin tamulel misa sac, tuh takin sou lal fah tutaflana in Israel.
7 Tusruktu tamulel lun mukul misa sac fin tia lungse payuk sel, na mutan sac fah som nu ye mutun mwet kol lun siti sac ke nien nununku ac fahk, ‘Tamulel lun mukul tumuk el tia akfalye ma kunal; el srunga in sang tuh in oasr fita lun tamulel lal inmasrlon mwet Israel.’*
8 Na mwet kol lun siti sac fah solama mukul sac ac sramsram nu sel. El fin srakna srunga payuk sel,
9 na katinmas kien tamulel lal fah kalukyang nu yorol ye mutun mwet kol lun siti uh, sarukla la fahluk lun mukul sac, aniya mutal ac fahk, ‘Pa inge ma sikyak nu sin sie mukul su tia lungse sang fita lun tamulel lal.’
10 Sou lal fah eteyuk yurin mwet Israel mu ‘sou lun mukul se su sarukyukla fahluk lal.’
Ma Sap Saya
11 “Mukul luo fin anwuk, ac mutan kien sie srike in kasru mukul tumal ke el iseya ma mukul lun mwet se ngia,
12 nimet pakomutun mutan sac. Pakela la paol.
13 “Kowos in tia kiapu mwet ke kowos orekmakin kain in mwe paun luo—sie nu ke moli ma sin mwet, ac sie nu ke kukakunla ma nu sin mwet.*
14 Ac kowos in tia pac orekmakin mwe srikasrak luo ma tia oana sie—sie nu ke ma kom moli, ac sie nu ke ma kom kukakunla.
15 Orekmakin mwe paun ac mwe srikasrak suwohs ac pwaye, tuh kowos in moul paht fin facl se LEUM GOD lowos El asot nu suwos.
16 LEUM GOD El kwase kutena mwet su kutasrik ac sesuwos.
Ma Sap In Onela Mwet Amalek
17 “Esam ma mwet Amalek tuh oru nu suwos ke kowos tuku Egypt me.*
18 Elos tiana sangeng sin God, ac elos tuku tukuwos ke pacl kowos totola ac munasla, ac onela mwet nukewa su fahsr tok ah.
19 Na ke LEUM GOD lowos El asot nu suwos facl sac, ac oru kowos moulla liki mwet lokoalok lowos nukewa su muta raunikowosla, kowos in onela mwet Amalek nukewa, tuh in wangin mwet sifil esamulos. Nik kowos mulkunla!
Footnotes
^ 2 Cor 11:24
^ 1 Cor 9:9; 1 Tim 5:18
^ 25:5–6; Mt 22:24; Mk 12:19; Lk 20:28
^ 25:7–10; Rut 4:7–8
^ 25:13–16; Lev 19:35–36
^ 25:17–19; Exo 17:8–14; 1 Sam 15:2–9
