Isaiah 46:1-13
46 “Pa inge saflaiyen god nukewa lun Babylon!
Meet, mwet uh alu nu ke Bel ac Nebo,
A inge touyak ma sruloala ingan nu fin donkey,
Na ke toasr ma sruloala uh, donkey uh totola.
2 Ma sruloala inge tia ku in sifacna molelosla.
Sruoh elos ac utukla.
Saflaiyen god nukewa lun Babylon pa inge!
3 “Porongeyu, fwilin tulik natul Jacob,
Kowos nukewa su lula sin mwet luk.
Nga nuna karingin kowos oe ke kowos isusla ah me.
4 Nga pa God lowos ac nga fah karingin kowos
Nwe ke na kowos matuoh ac fiayala.
Nga orekowosla ac nga fah karingin kowos.
Nga fah kasrekowos ac molikowosla.”
5 LEUM GOD El fahk, “Su kowos ac lumweyu nu kac?
Ya oasr sie saya oana nga?
6 Mwet uh ikasla pak lalos ac okoala gold uh liki;
Elos pauniya silver ke mwe paun.
Elos moli nu sin sie mwet orekma ke gold elan orala sie god,
Na elos epasr ac alu nu kac.
7 Elos srukak nu finpisalos ac us fahsr.
Elos ac tulokinya ke sie acn, ac el tu we—
Tia ku in mukuila liki acn sac.
Kutena mwet fin alu nu kac, ma sruloala sac tia ku in topuk,
Ku molella liki ongoiya.
8 “Kowos mwet koluk, esam ma se inge;
Nunku ke ma nga orala uh.
9 Esam ma sikyak pacl loeloes somla.
Kowos in etu lah nga mukena pa God,
Ac wangin sie saya oana nga.
10 Nga tuh fahkak na emeet ke ma ac sikyak in pacl tok uh.
In pacl loeloes somla nga fahkak mea ac fah tuku.
Nga tuh fahk lah pwapa luk ac tia ku in tafongla.
Ac nga fah oru ma nukewa fal nu ke ma lungse luk.
11 Nga ac pangon sie mwet in tuku kutulap me.*
El ac pwesrouli oana sie eagle,
Ac orala ma ng oakiya in orekla.
Nga fahk tari, ac ma nga fahk uh ac fah orekla.
12 “Porongeyu, kowos mwet likkeke,
Su nunku mu kutangla uh arulana loesla liki kowos.
13 Nga ac use len in kutangla in apkuran—
Tiana loes liki kowos.
Kutangla luk fah tia ikolyuki.
Nga fah molela Jerusalem,
Ac oru in akfulatyeyuk Israel in acn we.”
Footnotes
^ sie mwet ... kutulap me: liye Isa 41:2.
