On Lal Solomon 5:1-16
5 Mutan se su saok sik, su nga ako in payuk se,
Nga utyak nu in ima luk.
Nga kunsani mwe akkeng luk wi myrrh;
Nga engankin eman honey luk
ma oan in nien honey uh;
Ac nga nim wain ac milk nimuk.
Verse Lun Un Mutan Uh
Komtal mwet kawuk luo an, mongo ac nim
Nwe ke na komtal mutkakinya lungse lomtal!
On Soko Akakosr
Verse Lun Mutan Se
2 Ke nga oan in motul, insiuk ngetnget na.
Oana ngan lohng mu el su nga lungse el towol srungul uh.
Verse Lun Mukul Se
Ikasla nga in utyak, mutan su saok sik,
Kom su kuiyuk, ac oana wuleoa nutik.
Insifuk sroksroki ke aunfong,
Ac aunsifuk olalaek ke ohu uh.
Verse Lun Mutan Se
3 Nga sarukla nuknuk luk ah tari;
Mwe mea nga in sifil nuknukyang?
Nga ohlla niuk tari;
Mwe mea ngan sifil akfohkfokyela?
4 El su nga pwar se el isongang paol nu in mutunoa,
Ac nga pulakin pwar na yohk insiuk.
5 Nga tukakek in ikasla elan utyak.
Pouk mosrweyukla ke myrrh,
Ac kufinpouk ke sronin myrrh
Ke nga saplakang nu ke mwe ikak ke srungul uh.
6 Nga ikasla srungul uh nu sel su nga lungse,
Tuh el nu som tari.
Nga lukunna mulalla ke nga tia lohngak pusracl!
Nga sokol tuh tia ku in konalak;
Nga pangnol, a el tia topukyu.
7 Mwet topang su forfor taran siti uh elos liyeyuyak.
Elos puokyuwi ac kanteyuwi;
Mwet liyaung pot uh elos tulakunla nuknuk se ma afinyu.
8 Kowos mutan Jerusalem, wulema nu sik
Lah kowos fin konauk el su nga lungse,
Kowos ac fahkang nu sel lah nga kuf na pwaye ke nunkeyal.
Verse Lun Un Mutan Uh
9 Kom su oaskulana inmasrlon mutan uh,
Ya mukul se ingan sie liki na mukul nukewa?
Mea se arulana wo kacl uh
Ku kut in orek wulela nu sum kac?
Verse Lun Mutan Se
10 Mukul se nga lungse inge el ku ac fokoko finsroa;
Inmasrlon mukul nukewa, wangin sie oana el.
11 Mutal oana wolana lun gold uh;
Aunsifal makoskos
Ac sroalsroal oana sie won raven.
12 Atronmutal kato oana wuleoa sisken sie unon in kof,
Wuleoa ma fasrfasr oana milk, ac tu pe infacl srisrik uh.
13 Foulin likintupal keng oana sie ima
Ma sessela ke mahsrik ac ma keng uh.
Ngoasrol oana kiuf uh,
Ma sroksrok ke sronin myrrh.
14 Wo lumweyen paol,
Ac el ringkin ring ma yunla ke wek saok.
Manol fwel oana fweliyen ivory
Ma naweyuk ke eot sapphire.
15 Nial oana sru orekla ke eot alabaster
Ma loangeyukyak ke gold.
Woiyen lumahl oana Fineol in acn Lebanon,
Ac ku oana sak cedar we.
16 Emwem oalul ke nga ngok uh,
Ac nga lungse ma nukewa kacl.
Mutan Jerusalem,
Pa inge luman kawuk luk su nga lungse.
