Psalm 51:1-19
[Psalm lal David, Tukun Mwet Palu Nathan el Kaskas nu sel ke Tafongla lal yorol Bathsheba]
Pre In Siyuk Ke Nunak Munas*
51 Pakoten nu sik, O God,
Ke sripen lungse kawil lom!
Ke pakoten lulap lom,
Eela ma koluk luk!
2 Ohlla ma koluk luk nukewa
Ac aknasnasyeyula liki ma koluk luk!
3 Nga akilen tafongla luk,
Ac ma koluk luk oan in nunak luk pacl e nukewa.
4 Nga oru ma koluk lain kom, aok lain kom mukena,
Ac oru ma su tia wo ye motom.
Ke ma inge fal kom in nununkeyu.
Oasr suwohs lom in lisyula.*
5 Nga nuna koluk oe ke len se nga isusla ah me;
Liki pacl se nga srimetak, nga nuna mwet koluk.
6 Orekma suwohs ac inse pwaye pa kom lungsum;
Nwakla nunak luk ke lalmwetmet lom.
7 Aknasnasyeyu ke sak hyssop, ac nga fah nasnasla;
Oulyula ac nga fah fasrfasr liki snow.
8 Lela nga in lohng pusren engan ac insewowo;
Finne kom tuh itungyuwi ac kunausyula,
Nga ac sifil pacna enganak.
9 Afinya motom liki ma koluk luk
Ac eela ma koluk luk nukewa.
10 Kom in oru insiuk in nasnas, O God,
Ac ase sie ngun sasu ac pwaye in nga.
11 Nikmet lisyula liki ye motom;
Nikmet eisla ngun mutal lom likiyu.
12 Sifilpa ase nu sik engan su tuku ke molela lom,
Ac oru tuh nga in insewowo in akos kom.
13 Na nga fah luti mwet koluk ke ma kom sapkin,
Ac elos ac fah foloko nu yurum.
14 Sruokya moul luk, O God, ac moliyula,
Ac nga fah engan in fahkak ke suwoswos lom.
15 Leum, kasreyu tuh nga in ku in kaskas,
Ac nga fah kaksakin kom.
16 Kom tia lungse mwe kisa;
Kom funu lungse, nga lukun orek kisa;
Kom tiana insewowo ke mwe kisa firir.
17 O God, mwe kisa luk uh pa inse pusisel—
Kom ac tia pilesru sie inse pusisel su auliyak.
18 O God, kulang nu sin Zion ac kasrel;
Sifilpa musaeak pot Jerusalem.
19 Na kom fah insewowo ke mwe kisa pwaye
Ac ke mwe kisa firir lasr;
Ac cow mukul fah kisakinyuk fin loang lom.
