Siacnyacn suc tuhfahna pahyuckyak luhngse tuh engan yohk ma elos puhla ke lwen in macruht lalos ac oan na nwe tok. Ma inge kuh in sikyak. Mwet Christian suc pahyuck ke lusen pacl loeloes ac kwacfeacng in ukwe kahs in kahsruh luhn Bible ahkpwacyeye lah ma inge kuh in sikyak.

1. Meac kahs in kahsruh luhn Bible nuh sin mukul tuhma?

Jeova el srihsrngiyac mukul tuhma elan sifen sucu. (Riti Ephesus 5:23.) Jeova el luhngse elos in oraclah sulaclah ma ac wo nuh sin sucu lalos. Bible uh fahk nuh sin mukul pahyuck uh: “Kowos in luhngse muhtwacn kiowos.” (Ephesus 5:25) Meac kalmacn ma inge? Sie mukul na wo el kuhlwacng nuh sin muhtwacn kiyacl ke elos oasr ke lohm selos ac ke pacl ma elos wi mwet sahyac. El karihngihn muhtwacn kiyacl ac el oruh ke kuhiyacl kewa in sang ma enenuh nuhkewa lal. (1 Timothy 5:8) Ma yohk srihpac emeet, el kahsrel in oasr fototo lal nuh sin Jeova. (Matthew 4:4) Ke sie mwe puhpuhlyuck, elos kuh in tuhkweni puhruhe ac rit Bible. Mukul pahyuck suc karuhnguhnwacng wo muhtwacn kiyacl, el karihngihn pac fototo wo lal nuh sin Jeova.​—Riti 1 Peter 3:7.

2. Meac kahs in kahsruh luhn Bible nuh sin muhtwacn kiyac?

Kahs luhn God fahk lah sie muhtwacn “elan ahkfuhlwactye [“suhnakihn,” NW] mukul tuhmwacl.” (Ephesus 5:33) El ac oruh fuhkah ma inge? El ac ahksacohkye ohiyac wowo luhn mukul tuhmwacl ac orekma upac lal in karuhnguhnuhl ac tuhlihk nahtuhlos. El kuh in ahkkahlwemye pac suhnak nuh sin mukul tuhmwacl ke el kahsruh sulaclah lal uh. El kuhlwacng pac in sramsram nuh sin mukul tuhmwacl ac fahk ma wo kacl, finne el tiac kuhlwacnsuhpuh Jeova.

3. Siacnyacn se kuh in ahkkweye fuhkah moul in pahyuck lalos?

Bible uh fahk kahs inge ke siacnyacn pahyuck uh: “Eltahl fah ma sefannalac.” (Matthew 19:5) Kalmac pa, elos ac kwacfeacng na pwacye tuh moul in pahyuck lalos in tiacna muhsahllah. Elos kuh in oruh ma inge fin elos tuhkweni nuh sie pacl nuhkewa, ac in ahkkahlwemye nuh sin sie sin sie nuhnak ac puhlakihn lalos. Sahyen Jeova, elos ac tiac lwelah kuhtwena ma kuh kuhtwena mwet in yohk srihpac liki mukul kuh muhtwacn kiyacl uh. Elos in arlacna taran in tiac aengani nuh sin mukul kuh muhtwacn sahyac.

 AHKYOHKYE LUTLUT LOM

4. Mukul tuhma​—luhngse ac karuhnguhnwacng wo muhtwacn kiom an

5. Muhtwacn kiyac​—luhngse ac suhnakihn mukul tomom

Bible uh ahkkweye muhtwacn in suhnakihn mukul tuhmwacl finne el kuhlwacnsap nuh sin Jeova kuh tiac. Riti 1 Peter 3:1, 2, ac tohkohyang sramsramkihn kihsen siyuck inge:

• Fin mukul tomom el tiac alu nuh sin Jeova, pwacye lah kom luhngse pac elan kuhlwacnsap nuh sin Jeova. Meac inkacnek wo emeet ma kuh in kahsrel​—kom in luti ma pwacye nuh sel pacl nuhkewa kuh kom in ahkkahlwemye kuhlwacng ac suhnak nuh sel? Efuh?

Siacnyacn uh kuh in tuhkweni oraclah sulaclah wo. Tuhsruhktuh, sahp oasr pacl muhtwacn se tiac luhngse sulaclah luhn mukul tuhmwacl. El  kuh in fahk nuhnak lal nuh sin mukul tuhmwacl ke puhsra wo wi suhnak yohk lal. Tuhsruhktuh, el enenuh in esam lah Jeova el sang nuh sin mukul kunohkohn in oraclah sulaclah lah meac ma wo nuh sin sucu lal. El enenuh in oruh ke kuhiyacl kewa in kahsruh sulaclah luhn mukul tuhmwacl. Ke el oruh ma inge, el kuh in kahsruh in oasr engan yohk ke sucu lal. Riti 1 Peter 3:3-5, ac tohkohyang sramsramkihn kihsen siyuck se inge:

• Meac Jeova el puhla ke sie muhtwacn el ahkkahlwemye suhnak nuh sin mukul tuhmwacl?

6. Kowos kuh in kuhtanglah liki ma upac ke moul in pahyuck lowos

 MA KUHT LOTWELAH

Siacnyacn se kuh in insewowo elos fin luhngse ac suhnakihn sie sin sie, ac ukwe oakwuck wowo luhn Bible.

Kalweni

• Meac mukul tuhma kuh in oruh tuh in oasr insewowo ke moul in pahyuck lalos?

• Meac muhtwacn kiyac kuh in oruh in oasr insewowo ke moul in pahyuck lalos?

• Kom fin pahyuck tari, oakwuck wo fuhkah in Bible kuh in kahsre kom in ahkkweye moul in pahyuck lom?