Ke pacl kuht wi mwet lili ke congregation, kuht puhla oacna ma David el puhla inge: “Fuhkah woiyac ac fuhkah insewowoiyac ke mwet luhn God elos tuhkweni muhta ac inse sefanna!” (Psalm 133:1) Inse sefanna lasr inge tiac ma sifacna sikyak. Kais sie sesr, oasr ma kuht enenuh in oruh in karihngihn ma inge.

1. Ma wo fuhkah kuh in liyeyuck ke mwet luhn God?

Kom fin wi ke miting luhn congregation ke acn sahyac uh, sahp kom tiac kahlwem ke kahs lalos we. Tuhsruhktuh, kom kuh in puhla luhngse ac kuhlwacng luhn mwet lili we. Efuh? Mweyen finne kuht oasr oyac, oacna sie mwe rit ma kuht orekmakihn ke kuht lutlutkihn Bible uh. Ac kuht kwacfeacng in ahkkahlwemye luhngse nuh sin sie sin sie. Yen nuhkewa kuht muhta we, kuht nuhkewa “pahng nuhke En Jeova, in kuhlwacnsuhpwacl ke inse sefanna.”​—Zephaniah 3:9, BMK.

2. Meac kom kuh in oruh in sang kahsruh nuhke inse sefanna?

“Kowos in arulacna luhngse sie sin sie ke insiowos nohfohn.” (1 Peter 1:22) Kom ac orekmakihn fuhkah kahs in kahsruh inge? Kuht in tiac lohacng nuhke mwe muhnahs luhn mwet sahyac uh, a kuht in liye ohiyac wowo lalos. Kuht ac tiac asruoki muhkwena nuh sin mwet suc ma elos luhngse ac ohiyacltahl oacna kuht. A kuht luhngse pac in etwaclah mwet lili suc siena liki kuht. Kuht enenuh pac in sislah kuhtwena ohiyen srisri ma oasr ke insiacsr.​—Riti 1 Peter 2:17. a

3. Meac kom ac oruh fin oasr ma upac inmahsrlom ac sie mwet lili wiom?

Kuht inse sefanna, tuhsruhktuh kuht sesuwohs pac. Kuhtuh pacl uh kuht ahktoasrye kuh ahkngalye sie sin sie. Kahs luhn God fahk nuh sesr “in muhtweng ac nuhnak muhnahs nuh sin sie sin sie, oacna ke Leum El nuhnak muhnahs nuh suwos.” (Riti Colossae 3:13.) Kuht ahktoasryacl Jeova ke pacl pucspucs, ne ohinge el nuhnak muhnahs nuh sesr. Pwacnacng, el luhngse kuht in nuhnak muhnahs pac nuh sin mwet lili wiyacsr. Kom fin liye tuh oasr mwet se suc kom ahktoasrye, kom kwacfeacng in ahkwoye ma inge.​—Riti Matthew 5:23, 24. b

 AHKYOHKYE LUTLUT LOM

4. Kuhtanglah ohiyen sulohsohl mwet

Kuht ke in ahkkahlwemye luhngse lasr nuh sin mwet lili nuhkewa. Tuhsruhktuh sahp ac upac nuh sesr in eis sie mwet lili fin ohiyacl siena liki ohiyacsr. Meac kuh in kahsre kuht? Riti Orekma 10:34, 35, ac tohkohyang sramsramkihn kihsen siyuck inge:

• Jeova el eis kain in mwet nuhkewa oacna mwet Loh lal. Ma inge kuh in kahsre kuht fuhkah in oasr nuhnak wowo ke mwet suc siena liki kuht?

• Kain in orekma in srisri fuhkah mwet pucspucs ke acn sum oruh?

Riti 2 Corinth 6:11-13, ac tohkohyang sramsramkihn kihsen siyuck se inge:

• Kom nuhnkuh muh kom kuh in fototo fuhkah nuh sin mwet lili wiom ke siena acn?

5. Nuhnak muhnahs ke insiom kewa ac orek mislac

Jeova el nuhnak muhnahs na pwacye nuh sesr finne wacngihn pacl kuht ac nuhnak muhnahs nuh sel. Riti Psalm 86:5, ac tohkohyang sramsramkihn kihsen siyuck inge:

• Fuhkah woiyen nuhnak muhnahs luhn Jeova?

• Efuh kuh kom srui inkacnek lal in nuhnak muhnahs?

• Nuhke ohiyac fuhkah ac upac nuh sesr in orek mislac nuh sin mwet sahyac?

Kuht ac etahel Jeova fuhkah ac in oasr mislac yurin mwet lili wiyacsr pacl nuhkewa? Riti Soakas 19:11, ac tohkohyang sramsramkihn kihsen siyuck se inge:

• Kom fin kasrkuhsrak nuh sin sie mwet, kuh mwet sahyac uh ahktoasrye kom, meac kom kuh in oruh in ahkwoyelah ma upac sacn?

 Oasr pacl kuht ahktoasrye mwet sahyac. Ke pacl ma inge sikyak, meac kuht enenuh in oruh? Liye VIDEO se, ac tohkohyang sramsramkihn kihsen siyuck se inge.

• Ke video an, meac sister se oruh in orek mislac?

 MA KUHT LOTWELAH

Kom kuh in kahsruh inse sefanna luhn congregation kom fin ac sang nuhnak muhnahs ac ahkkahlwemye luhngse nuh sin mwet lili nuhkewa.

Kalweni

• Kom kuh in kuhtanglah fuhkah ohiyen sulohsohl mwet?

• Meac kom kuh in oruh fin wacngihn inseselac inmahsrlom ac sie pac mwet lili?

• Efuh kuh kom luhngse in etahi mwe srihkasrak luhn Jeova in sang nuhnak muhnahs?