Nuhnkuh ke mwe luhmahlah se inge: Heather el sislah pacl lal yohrohl Mike ke lusen mahlwem luo na, tuhsruhktuh el puhla muh el etwacl ke lusen pacl na loeloes se. Eltahl sramsram nuh sin sie sin sie ke inkacnek luhn text ke pacl nuhkewa. Eltahl orekmakihn phone ac sramsram arlacna paht, ac ke srihpac se inge eltahl etuh tari lah meac eltahl sramsramkihn uh.

Ke mahlwem luo somlah ah, Mike ac Heather tiac oruh kuhtwena ma sahyen asruh po ac angokmwet muhkwena. Tuhsruhktuh, ingena oasr ma se sahyac ma Mike el ke oruh. Heather el sruhnga in oruh. El tiac pac luhngse Mike elan som luhkwel. Mweyen ke pacl se el weluhl Mike uh, el puhla muh el arlacna sacohk. ‘Sahyac’, el fahk nuh sel sifacna, ‘Nga ac Mike kuht luhngse sie sin sie . . . ’

Kom fin sun matwac fal tari in aetuhi nuh sin sie mwet ac kom sun pac ohiyac se ma Heather el oasr kac ingacn, meac kom ac oruh tohkoh?

Kom fin ahtulac ke sahk soko, ac srihke in sohksohk oacna sie won, kom ac fah sun mwe ongaiyac. Ma inge oacpacna ke kom seahkos masap nuhke ma wo ac ma kuluk, oacna ma fahk: “Liyekowosyang liki luhmah fohkfohk luhn kosro.”—Sie Thessalonica 4:3.

Meac kuhtuh ma upac ma tuhkuh ke seahkos nuhke masap se inge? Bible uh fahk: “Mwet se suc kosro el oruh ma kuluk nuhke mahnol sifacna.” (Sie Corinth 6:18) Ke inkacnek fuhkah?

 Researchers kuh mwet suc oruh lutlut la ke moul luhn tuhlihk fuhsr uh konwacack lah inkaiyen tuhlihk fuhsr suc oruh orekma in kosro meet liki eltahl pahyuckyak uh puhla ma ten inge.

• AHSOR YOHK. Inkaiyen mwet fuhsr suc orek kosro meet liki eltahl pahyuckyak uh fahk lah eltahl auli tok.

• TIAC LUHLAHLFONGI NUH SIN SIE SIN SIE. Tukun eltahl orek kosro, kais sie seltahl muhtwacwacack in nuhnkuh, ‘Suc pac sahyac ma el orek kosro nuh se uh?’

• SUHPWACRLAC. Ke ma pwacye uh, puhs tuhlihk muhtwacn fuhsr ma luhngse sie mwet suc ac kuh in karuhnguhnuhltahlwacng ac tiac in ahkkulukyacltahl. Ac puhs sin mukul fuhsr suc konwacack lah wacngihnlac pwacr laltahl nuh sin muhtwacn fuhsr se ma fuhlwelah eltahl in oraclah luhngse laltahl nuh se uh.

• Esam: Kom fin lwelah in ohsun nuh sin mwet se ke mahno meet liki kom pahyuckyak, kom ahkpuhsisaclye kom sifacna ke srihpen tuhlac yurum ma se ma arlacna sacohk. (Rome 1:24) Monum arlacna sacohklac in kihtakatlah!

Ahkkahlwemye lah kom kuh in fahsr liki “luhmah fohkfohk luhn kosro.” (Sie Thessalonica 4:3) Na, kom fin fahsr ne muh pahyuckyak ke sie lwen, kom kuh in weluhl oan. Kom ac kuh in engankihn ma inge, mweyen kom ac tiac puhla elyah, auli, ac sahngweng ke ma ma kwacna sikyak tukun ohsun luhn mahno meet liki pahyuck.—Soakas 7:22, 23; Sie Corinth 7:3.

• El fin luhngse kom na pwacye, yac el kuh in ahkngalye puhlakihn lom ac moul lom an?

• El fin nuhnkuh keim, yac el ac kwacfe kom in oruh sie ma ma ac kuh in kuhnahoslah fototo lom nuh sin God?—Hebrew 13:4.