MWE LUTLUT AHK 10
Kom Kuh In Akihlen Fuhkah Alu Pwacye?
1. Yac alu pwacye sefanna?
“Kowos liyekowosyang liki mwet pahluh kikiacp.”
Jesus el luti nuh sin mwet tuma lutlut lal ke alu sefanna, pa alu pwacye. Ma inge oana soko inkacnek suc kol nuh ke moul ma pahtpaht. Jesus el fahk: “Puh na mwet konwacack” inkacnek soko inge. (Matthew 7:14) Alu ma fal nuh ke Bible muhkwena pa God el insewowo kac uh. Mwet Christian pwacye nuhkewa eltahl inse sefanna ke luhlahlfongi se.
2. Meac Jesus el fahk ke Mwet Christian kikiacp?
“Elos fahk muh elos etuh God, a orekma lalos siena liki fahk lalos.”
Jesus el tuh sensenkihn muh mwet pahluh kikiacp ac fah kiacpwelah alu luhn Mwet Christian pwacye. Eltahl ac oruh muh eltahl pa alu pwacye, ac eltahl ekihn mwet Christian pwacye. Tuhsruhktuh kom ac kuh in akihlen lah suc na pwacye mwet inge. Fuhkah? Alu pwacye muhkwena pa kuh in kahsruh sie mwet in eklac mwet Christian pwacye suc ahkkahlwemye ohiyac ac orekma wo.
3. Kom ac akihlen fuhkah Mwet Christian pwacye?
Nuhnkuh ahkwoyac ke mwe akucl lihmekohsr inge:
-
Mwet Christian pwacye uh ahkfuhlwactye Bible oacna Kahs luhn God. Eltahl kacfweacng in orekmakihn oakwuck wowo luhn Bible ke moul laltahl. Ke ma inge, alu pwacye uh siena liki alu ma fahsr fal nuh ke nuhnak luhn mwet uh. (Matthew 15:7-9) Mwet Christian pwacye uh moulkihn moul laltahl fal nuh ke ma eltahl luti nuh sin mwet sahyac uh.
—Riti John 17:17; Luo Timothy 3:16, 17. -
Mwet tuma lutlut pwacye luhn Jesus uh ahkfuhlwactye inen Jeova God. Jesus el ahkfuhlwactye inen God ke el ahkkahlwemye inel nuh sin mwet uh. El kahsruh mwet uh in etuh God ac lotweltahl in puhruhe in ahkmuhtahlye inen God. (Luke 11:2) Ke acn sum an, piyac alu se ma sruhmuhn inen God in etweyuck?
—Riti John 17:26; Rome 10:13, 14. * -
Mwet Christian pwacye uh fahkwack ke Tohkohsrahi luhn God. God el suhpwaclma Jesus in fahkwack pweng wo ke Tohkohsrahi. Tohkohsrahi luhn God pa finsrak sefanna nuh sin mwet uh. Jesus el sramsramkihn ma inge nwe ke na pacl se el misac ah. (Luke 4:43; 8:1; 23:42, 43) El fahk lah mwet suc fahsr tohkohl ac fah sulkackihn pac ma inge. Fin mwet se sun kom in sramsram ke Tohkohsrahi luhn God, kom nuhnkuh muh alu fuhkah se el wi uh?
—Riti Matthew 24:14. -
Mwet suc fahsr tohkohl Jesus uh tiac ma luhn facl kuluk se inge. Kom kuh in akihlenuhltahl ke srihpen eltahl tiac wi ke oakwuck luhn politic kuh ke kuhtwena mwe lokoalok inmahsrlon un mwet. (John 17:16; 18:36) Eltahl tiac pac etahi orekma ac ohiyac kuluk luhn mwet uh.
—Riti James 4:4. -
Oasr luhngse pwacye luhn Mwet Christian nuh sin sie sin sie. Eltahl lotelah ke Kahs luhn God in suhnakihn ac ahkfuhlwactye kain in mwet nuhkewa. Finne alu kikiacp pucspucs eltahl ahkkweye ac sang kahsruh nuh ke mweun inmahsrlon muhtuhnfacl pucspucs, Mwet Christian pwacye uh sruhnga oruh ma inge. (Micah 4:1-3) Tuhsruhktuh, Mwet Christian pwacye uh luhngse na in orekmakihn pacl ac ma laltahl in sang kahsruh ac ahkkweye mwet pucspucs sahyac.
—Riti John 13:34, 35; Sie John 4:20.
4. Yac kom kuh in akihlen alu pwacye?
Piyac alu se ma mwe luti nuhkewa la fal nuh ke Kahs luhn God, ahkfuhlwactye inen God, ac fahkwack Tohkohsrahi luhn God oacna finsrak sefanna luhn mwet uh? U fuhkah se orekmakihn luhngse pwacye ac sruhnga wi ke mweun? Meac kom nuhnkuh?
[Sihm srihsrihk e ten]
^ par. 3 Rome 10:13, 14, (BMK): “Tuh elos nuhkewa suc pangon nuh ke En Jeova elos fah moul. Na fuhkah elos fah pang nuh Sel suc elos tiac luhlahlfongi? ac fuhkah elos fah luhlahlfongi El, suc elos tiac lohng Kacl? ac fuhkah elos fah lohng fin wacngihn me luti?”
