Ɛkliziastis 8:1-17
8 Udat tan lɛk pɔsin we gɛt sɛns? Udat no aw fɔ sɔlv prɔblɛm? Di sɛns we pɔsin gɛt de mek in fes shayn, ɛn i de mek i nɔ twis in fes.
2 A tɔk se: “Obe wetin di kiŋ se fɔ sho rɛspɛkt fɔ di swɛ we yu swɛ bifo Gɔd.
3 Nɔ rɔsh fɔ kɔmɔt bifo am. Nɔ jɔyn fɔ du ɛnitin we bad; i kin du ɛnitin we i want,
4 bikɔs natin nɔ go chenj wetin di kiŋ se. Udat go tɛl am se, ‘Wetin yu de du?’”
5 Bad tin nɔ go apin to di pɔsin we de obe di lɔ, ɛn di wan we gɛt sɛns go no di rayt tɛm ɛn di rayt we fɔ du sɔntin.
6 Ɔltin gɛt tɛm ɛn we fɔ du am, bikɔs mɔtalman in prɔblɛm dɛn so bɔku.
7 Bikɔs nɔbɔdi nɔ no wetin go apin, udat go tɛl am aw i go apin?
8 Jɔs lɛk aw nɔbɔdi nɔ ebul kɔntrol di spirit* ɔ stɔp di spirit, na so nɔbɔdi nɔ go ebul kɔntrol di de we i de day. Jɔs lɛk aw dɛn nɔ de alaw ɛni sojaman fɔ lɛf wɔfrɔnt di tɛm we wɔ de, na so wikɛdnɛs nɔ go alaw di wan dɛn we de du am fɔ ɛskep.*
9 Na ɔl dis a dɔn si, ɛn a tray fɔ ɔndastand ɔl di wok we dɛn dɔn du na di wɔl, insay di tɛm we mɔtalman dɔn sɔprɛs in kɔmpin ɛn mek i sɔfa.
10 A si dɛn de bɛr di wikɛd wan dɛn, di wan dɛn we bin dɔn yus fɔ go ɛn kam na di oli ples, bɔt i nɔ te dɛn fɔgɛt dɛn na di siti usay dɛn bin de du dɛn tin dɛn de. Dis bak na vaniti.
11 Bikɔs dɛn nɔ de pɔnish di wan dɛn we de du bad kwik kwik wan, na dat de mek mɔtalman de gɛt maynd fɔ du bad.
12 Pan ɔl we sina go du bad ɔndrɛd tɛm ɛn stil liv lɔng, a no se tin go fayn fɔ di wan dɛn we de fred di tru Gɔd, bikɔs dɛn de fred am.
13 Bɔt tin nɔ go fayn fɔ di wan we wikɛd, ɛn i nɔ go ad pan in layf we tan lɛk shado, bikɔs i nɔ fred Gɔd.
14 Sɔntin de we de apin na di wɔl we na vaniti: Dɛn de trit pipul dɛn we de du wetin rayt lɛk se dɛn na wikɛd pipul dɛn, ɛn dɛn de trit wikɛd pipul dɛn lɛk se dɛn de du wetin rayt. A tɔk se dis bak na vaniti.
15 So a advays pipul dɛn fɔ ɛnjɔy, bikɔs natin nɔ de we bɛtɛ fɔ mɔtalman na di wɔl pas fɔ it, drink, ɛn ɛnjɔy. Dɛn fɔ du dis as dɛn de wok tranga wan di tɛm we dɛn gɛt layf, we di tru Gɔd dɔn gi dɛn na di wɔl.
16 A tray fɔ gɛt sɛns ɛn fɔ si ɔl wetin* de apin na di wɔl, a nɔ bin de ivin slip de ɛn nɛt.*
17 Dɔn a tink bɔt ɔl di wok we di tru Gɔd dɔn du, ɛn a kam fɔ si se mɔtalman nɔ go ebul fɔ ɔndastand wetin de apin na di wɔl. Ilɛk aw dɛn tray tranga wan, dɛn nɔ go ebul fɔ ɔndastand am. Ilɛksɛf dɛn tɔk se dɛn gɛt sɛns fɔ no, dɛn nɔ go rili ɔndastand am.
Futnot Dɛn
^ Ɔ “bloblo; briz.”
^ Ɔ i kin bi, “dɛn wikɛdnɛs nɔ go sev di wan dɛn we wikɛd.”
^ Ɔ “di wok we.”
^ Ɔ i kin bi, “pipul dɛn nɔ de slip de ɔ nɛt.”
