Ɛsta 1:1-22
1 Aazuirɔs,* dat na, di Aazuirɔs we bin de rul frɔm India to Itiopia,* bin gɛt 127 prɔvins dɛn we i de rul.
2 Dɛn tɛm dɛn de, Kiŋ Aazuirɔs bin de rul frɔm di pales* we de na Shushan.*
3 Insay di tɔd ia we i de rul as kiŋ, i mek pati fɔ ɔl in prins dɛn ɛn in savant dɛn. Di ami fɔ Pashia ɛn Midia, di bigman dɛn, ɛn di prins dɛn na di prɔvins dɛn bin de bifo am.
4 Ɛn fɔ 180 dez, i sho dɛn di jɛntri we de na in wɔndaful kiŋdɔm, di we aw i gret ɛn pawaful ɛn di ɔnɔ we i gɛt.
5 We da tɛm de dɔn, di kiŋ mek pati fɔ sɛvin dez fɔ ɔl di pipul dɛn we de na di pales* na Shushan,* frɔm di wan dɛn we gɛt ay pozishɔn te to di kɔmɔn pipul dɛn; di kiŋ mek di pati na di kɔmpawnd insay di gadin we de na in pales.
6 Dɛn dɛkɔret di kɔmpawnd wit linin, fayn kɔtin, ɛn blu matirial we de pan rop dɛn we dɛn mek wit fayn matirial, pɔpul wul we de pan silva riŋ dɛn, mabul pila dɛn, ɛn fayn gold ɛn silva chia dɛn we de na say we dɛn pev wit mabul, pal, blak mabul, ɛn pɔfiri ston.
7 Dɛn sav wayn na gold kɔp dɛn; ɔl di kɔp dɛn bin difrɛn, ɛn di kiŋ in wayn bin bɔku, akɔdin to wetin di kiŋ gɛt.
8 Di kiŋ gi ɔda se dɛn nɔ fɔ fos* ɛnibɔdi fɔ drink; di kiŋ arenj wit in ɔfisa dɛn na in pales se ɛnibɔdi kin du wetin i want.
9 Kwin Vashtay insɛf mek pati fɔ di uman dɛn na Kiŋ Aazuirɔs in os.*
10 Di de we mek sɛvin, we Kiŋ Aazuirɔs bin gladi bikɔs ɔf di wayn we i drink, i tɛl Maumɛn, Bizta, Abona, Bigta, Abagta, Zita, ɛn Kakas, di sɛvin man dɛn we gɛt ay pozishɔn na in pales ɛn we na bin in pasɔnal savant dɛn,
11 fɔ mek dɛn briŋ Kwin Vashtay bifo am. Kwin Vashtay fɔ wɛr di tin* we kwin dɛn kin wɛr na dɛn ed, fɔ kam sho di pipul dɛn ɛn di prins dɛn aw i fayn, bikɔs i bin rili fayn.
12 Bɔt Kwin Vashtay nɔ bin de gri fɔ kam we di man dɛn we gɛt ay pozishɔn na di pales tɛl am se di kiŋ de kɔl am. Nain di kiŋ vɛks bad, ɛn in at wam bad bad wan.
13 Dɔn di kiŋ tɔk to di sɛnsman dɛn we no gud gud wan bɔt aw dɛn bin dɔn de andul dɛn kayn kes dɛn ya (bikɔs ɛnitin we di kiŋ de du i bin de tɔk to di wan dɛn we no di lɔ gud gud wan ɛn we no kes dɛn we dɛn kin sɛtul na kɔt.
14 Ɛn di wan dɛn we bin de nia di kiŋ pas ɔl ɔda pipul dɛn na Kashina, Shita, Admeta, Tashish, Mirɛz, Masina, ɛn Mɛmukan; dɛn na bin di sɛvin prins dɛn fɔ Pashia ɛn Midia we kin go bifo di kiŋ ɔltɛm ɛn we bin gɛt pozishɔn dɛn we ay pas ɔl na di kiŋdɔm).
15 Di kiŋ aks se: “Akɔdin to di lɔ, wetin dɛn fɔ du to Kwin Vashtay fɔ we i nɔ du wetin mi, Kiŋ Aazuirɔs, tɛl di man dɛn we gɛt ay pozishɔn na di pales fɔ tɛl am fɔ du?”
16 Na de Mɛmukan tɔk bifo di kiŋ ɛn di prins dɛn se: “Nɔto Kiŋ Aazuirɔs nɔmɔ Kwin Vashtay dɔn du bad, bɔt i dɔn du bad to ɔl di prins dɛn ɛn ɔl di pipul dɛn we de na ɔl di prɔvins dɛn we di kiŋ de rul.
17 Bikɔs ɔl di wɛf dɛn go no wetin di kwin dɔn du, ɛn dɛn nɔ go tek dɛn man dɛn mek natin ɛn dɛn go tɔk se: ‘Kiŋ Aazuirɔs se mek dɛn briŋ kam Kwin Vashtay bifo am, bɔt i nɔ gri fɔ kam.’
18 Tide tide di prinsɛs dɛn na Pashia ɛn Midia we no wetin di kwin du go tɔk to ɔl di kiŋ in prins dɛn, ɛn dat go kam wit bɔku fityay ɛn vɛksteshɔn.
19 If i ɔrayt wit di kiŋ, lɛ di kiŋ pas lɔ se Vashtay nɔ fɔ ɛva kam bifo in, Kiŋ Aazuirɔs, igen ɛn lɛ dɛn rayt am na di lɔ dɛn na Pashia ɛn Midia, we nɔ de chenj, ɛn lɛ di kiŋ pik ɔda uman we bɛtɛ pas am ɛn mek am kwin.
20 We ɔl di pipul dɛn we de na di bɔku bɔku say dɛn we di kiŋ de rul yɛri bɔt di lɔ we di kiŋ pas, ɔl di wɛf dɛn go ɔnɔ dɛn man dɛn, frɔm di wan dɛn we gɛt ay pozishɔn to di kɔmɔn wan dɛn.”
21 Di kiŋ ɛn di prins dɛn bin lɛk di advays, ɛn di kiŋ du wetin Mɛmukan se.
22 So i sɛn lɛta dɛn na ɔl di prɔvins dɛn we i de rul, i rayt di lɛta to ɔl di prɔvins dɛn akɔdin to aw dɛn de rayt na da prɔvins de, ɛn i rayt to ɔl di pipul dɛn insay dɛn yon langwej fɔ mek ɔl di man dɛn go bi masta* na dɛn yon os ɛn fɔ tɔk di langwej we in yon pipul dɛn de tɔk.
Futnot Dɛn
^ Dɛn se na Zaksis I, we na Darayɔs di Gret in bɔypikin (Darayɔs Aystaspis).
^ Ɔ “Kush.”
^ Ɔ “di ples we dɛn de rili protɛkt.”
^ Ɔ “Susa.”
^ Ɔ “di ples we dɛn de rili protɛkt.”
^ Ɔ “Susa.”
^ Ɔ “stɔp.”
^ Ɔ “pales.”
^ Ɔ “di tɔban.”
^ Ɔ “prins.”
