1 Jɔn 2:1-29
2 Mi smɔl pikin dɛn, a de rayt to una dɛn tin ya so dat una nɔ go sin.* Bɔt stil, if ɛnibɔdi sin, wi gɛt pɔsin we de ɛp* wi, we na Jizɔs Krays, we de wit di Papa, ɛn we de du wetin rayt.
2 Ɛn in na sakrifays fɔ wi sin dɛn fɔ mek wi gɛt pis wit Gɔd, bɔt nɔto fɔ wi sin dɛn nɔmɔ, bɔt fɔ di wan ol wɔl bak.
3 Di we aw wi go no se wi dɔn no am, na if wi kɔntinyu fɔ obe in lɔ dɛn.
4 Di wan we se, “A dɔn no am,” bɔt i nɔ de obe in lɔ dɛn na layman, ɛn di trut nɔ de insay am.
5 Bɔt ɛnibɔdi we obe in wɔd, na pɔsin we dɔn sho se i lɛk Gɔd fɔ tru. Na dis de mek wi no se wi gɛt wanwɔd wit am.
6 Di wan we se i de kɔntinyu fɔ gɛt wanwɔd wit am fɔ kɔntinyu fɔ waka jɔs lɛk aw da wan de bin waka.
7 Di wan dɛn we a rili lɛk, nɔto nyu lɔ a de rayt to una, bɔt na ol lɔ we una bin dɔn gɛt frɔm di biginin. Dis ol lɔ na di wɔd we una bin yɛri.
8 Ɛn a de rayt wan nyu lɔ to una, we i bin dɔn fala ɛn we unasɛf dɔn fala, bikɔs di daknɛs de go ɛn di tru tru layt ɔlrɛdi de shayn.
9 Di wan we se i de na di layt, bɔt i et in brɔda, stil de na daknɛs.
10 Di wan we lɛk in brɔda de kɔntinyu fɔ de na di layt, ɛn natin nɔ go mek i fɔdɔm.
11 Bɔt di wan we et in brɔda de na daknɛs, ɛn i de waka na daknɛs, ɛn i nɔ no usay i de go, bikɔs di daknɛs dɔn blayn in yay.
12 Smɔl pikin dɛn, a de rayt to una bikɔs dɛn dɔn fɔgiv una sin dɛn bikɔs ɔf in nem.
13 Papa dɛn, a de rayt to una bikɔs una dɔn no di wan we bin dɔn de frɔm di biginin. Yɔŋman dɛn, a de rayt to una bikɔs una dɔn win di wikɛd wan. Smɔl pikin dɛn, a de rayt to una bikɔs una dɔn no di Papa.
14 Papa dɛn, a de rayt to una bikɔs una dɔn no di wan we bin dɔn de frɔm di biginin. Yɔŋman dɛn, a de rayt to una bikɔs una strɔng ɛn Gɔd in wɔd stil de insay una ɛn una dɔn win di wikɛd wan.
15 Una nɔ fɔ lɛk di wɔl ɔ di tin dɛn we de na di wɔl. If ɛnibɔdi lɛk di wɔl, dat min se i nɔ lɛk di Papa;
16 bikɔs ɔltin na di wɔl—di tin dɛn we di bɔdi want, di tin dɛn we di yay want, ɛn fɔ sho-ɔf*—nɔ kɔmɔt frɔm di Papa, bɔt dɛn kɔmɔt na di wɔl.
17 Pantap dat, di wɔl ɛn di tin dɛn we di wɔl want de dɔn, bɔt di pɔsin we du wetin Gɔd want go de sote go.
18 Smɔl pikin dɛn, na di las awa dis. Una dɔn yɛri se di pɔsin we de agens Krays de kam, ɛn ivin naw bɔku pipul dɛn we de agens Krays dɔn kam, we mek wi no se na di las awa dis.
19 Dɛn bin de wit wi, bɔt dɛn dɔn lɛf wi bikɔs wi ɛn dɛn nɔto di sem;* bikɔs if wi ɛn dɛn na bin di sem, dɛn bin fɔ stil de wit wi. Bɔt dɛn lɛf wi fɔ sho se nɔto ɔlman tan lɛk wi.
20 Ɛn di oli wan dɔn anɔynt una, ɛn una ɔl no sɔntin.
21 A nɔ de rayt to una bikɔs una nɔ no di trut, bɔt na bikɔs una no am, ɛn bikɔs no lay nɔ de kɔmɔt usay di trut de.
22 Udat na di layman? Nɔto di wan we de dinay se Jizɔs na di Krays? Dis na di pɔsin we de agens Krays, di wan we de dinay di Papa ɛn di Pikin.
23 Ɛnibɔdi we dinay di Pikin nɔ gɛt wanwɔd bak wit di Papa. Bɔt ɛnibɔdi we tɔk se i biliv di Pikin gɛt wanwɔd bak wit di Papa.
24 Bɔt as fɔ una, di tin we una dɔn yɛri frɔm di biginin fɔ kɔntinyu fɔ de insay una. If di tin we una dɔn yɛri frɔm di biginin kɔntinyu fɔ de insay una, unasɛf go kɔntinyu fɔ gɛt wanwɔd wit di Pikin ɛn wit di Papa.
25 Pantap dat, na dis insɛf sɛf prɔmis wi—di layf we go de sote go.
26 A de rayt to una dɛn tin ya bikɔs sɔm pipul dɛn de tray fɔ ful una.
27 Bɔt as fɔ una, di anɔynt we i anɔynt una stil de pan una, ɛn una nɔ nid ɛnibɔdi fɔ tich una; bɔt di anɔynt we i anɔynt una de tich una bɔt ɔltin ɛn na tru, nɔto lay. Jɔs lɛk aw i dɔn tich una, una kɔntinyu fɔ gɛt wanwɔd wit am.
28 So, smɔl pikin dɛn, una kɔntinyu fɔ gɛt wanwɔd wit am so dat we i apia, wi go fil fri fɔ tɔk, ɛn wi nɔ go kɔmɔt nia am bikɔs wi de shem we i de wit wi.
29 If una no se i de du wetin rayt, una no bak se ɛnibɔdi we de du wetin rayt na in pikin.
Futnot Dɛn
^ Di Grik vab fɔ sin na dis vas de tɔk bɔt we pɔsin sin wan tɛm.
^ Ɔ “beg fɔ.”
^ Ɔ “we pɔsin de bost bɔt wetin i gɛt.”
^ Ɔ “dɛn nɔ de pat ɔf wi.”
