2 Kɔrintians 8:1-24
8 Wi brɔda dɛn, wi want fɔ mek una no naw bɔt Gɔd in spɛshal gudnɛs* we i dɔn sho to di kɔngrigeshɔn dɛn na Masidonia.
2 Di tɛm we dɛn bin de sɔfa bikɔs dɛn rili de ɔnda tɛst, dɛn bin gladi pasmak ɛn dɛn bin gɛt fri-an pan ɔl we dɛn rili po.
3 Dɛn gi akɔdin to wetin dɛn gɛt. Infakt, mi na witnɛs se dɛn gi pas wetin dɛn gɛt.
4 Na dɛnsɛf sɛf bin de rili beg wi fɔ lɛ dɛn gɛt di ɔnɔ fɔ gi wit ɔl dɛn at fɔ ɛp di oli wan dɛn.
5 Dɛn nɔ jɔs du wetin wi bin de op se dɛn go du, bɔt fɔs dɛn gi dɛnsɛf to di Masta ɛn to wi jɔs lɛk aw Gɔd want.
6 So wi ɛnkɔrej Taytɔs se jɔs lɛk aw i dɔn bigin dis wok to una, i fɔ dɔn fɔ gɛda di tin dɛn we una gi wit ɔl una at.
7 Una de du wɛl pan ɔltin. Una gɛt strɔng fet, una sabi aw fɔ tɔk, una no bɔku tin, una rili de tray pan ɛnitin we una de du, ɛn una rili lɛk ɔda pipul dɛn jɔs lɛk aw wi lɛk una, so una kɔntinyu fɔ gɛt fri-an.
8 A nɔ de se dis fɔ kɔmand una, bɔt na fɔ mek una no aw ɔda pipul dɛn rili de tray ɛn fɔ no if una gɛt lɔv fɔ tru.
9 Una no wi Masta Jizɔs Krays in spɛshal gudnɛs,* pan ɔl we i bin jɛntri, i mek insɛf po fɔ una sek, so dat di po we i po go mek una jɛntri.
10 Ɛn a de tɛl una wetin a tink: Dis na fɔ una yon bɛnifit, bikɔs i dɔn pas wan ia naw we una dɔn bigin dis, ɛn una dɔn sho bak se una want fɔ du am.
11 So naw, una dɔn wetin una bin dɔn bigin fɔ du, so dat di tin we una gi we na akɔdin to wetin una gɛt go sho se una rɛdi fɔ gi.
12 If pɔsin rɛdi fɔ gi, i fayn mɔ mek i gi akɔdin to wetin i gɛt, nɔto akɔdin to wetin i nɔ gɛt.
13 A nɔ want fɔ mek am izi fɔ ɔda pipul dɛn, ɛn mek i tranga fɔ una;
14 bɔt na fɔ mek una ikwal, fɔ lɛ di sɔplɔs we una gɛt naw go ɛp dɛn wit wetin dɛn nid, so dat di sɔplɔs we dɛn gɛt go ɛp una we una nɔ gɛt bɛtɛ, ɛn dis go mek una ikwal.
15 Jɔs lɛk aw dɛn rayt se: “Di pɔsin we gɛt bɔku, nɔ gɛt pasmak; ɛn di pɔsin we gɛt smɔl, in yon nɔ smɔl tumɔs.”
16 Wi de tɛl Gɔd tɛnki we i mek Taytɔs rili bisin bɔt una lɛk aw wisɛf bisin bɔt una,
17 bikɔs i dɔn gri fɔ du wetin wi ɛnkɔrej am fɔ du, ɛn i rili rɛdi fɔ du wetin wi tɛl am, so insɛf sɛf dɔn disayd fɔ kam to una.
18 Bɔt wi de sɛn wan brɔda wit am we dɛn de prez na ɔl di kɔngrigeshɔn dɛn bikɔs ɔf wetin i de du fɔ di gud nyuz.
19 Bɔt nɔto dat nɔmɔ, di kɔngrigeshɔn dɛn bin dɔn pik am fɔ travul wit wi we wi de sheb dis gift we de mek di Masta gɛt prez ɛn we de pruv se wi rɛdi fɔ ɛp.
20 So wi de tray fɔ mek nɔbɔdi nɔ fɛn fɔlt pan wi we wi de sheb di bɔku kɔntribyushɔn we dɛn dɔn gi.
21 Wi ‘de du ɔltin ɔnɛs wan, nɔto bifo Jiova* nɔmɔ bɔt bifo mɔtalman bak.’
22 Pantap dat, wi de sɛn dɛn wit wi brɔda we wi dɔn tɛst bɔku tɛm ɛn si se i de du bɔku tin fayn fayn wan, ɛn naw i go du am fayn fayn wan mɔ bikɔs i rili gɛt kɔnfidɛns pan una.
23 Bɔt if una gɛt ɛni kwɛstyɔn bɔt Taytɔs, i de wit mi ɛn i de wok wit mi fɔ una bɛnifit; ɔ if una gɛt kwɛstyɔn dɛn bɔt wi brɔda dɛn, dɛn na apɔsul fɔ di kɔngrigeshɔn dɛn, ɛn dɛn de briŋ prez to Krays.
24 So una sho se una lɛk dɛn, ɛn una sho di kɔngrigeshɔn dɛn wetin mek wi bin bost bɔt una.
