2 Timoti 2:1-26
2 So yu, we na mi pikin, kɔntinyu fɔ gɛt pawa frɔm Krays Jizɔs in spɛshal gudnɛs;*
2 ɛn tich fetful man dɛn di tin dɛn we yu yɛri a tɔk ɛn we bɔku witnɛs dɛn gri wit, ɛn dɛn fetful man dɛn de go rili kwalifay fɔ tich ɔda pipul dɛn.
3 Bikɔs yu na Krays Jizɔs in fayn sojaman, rɛdi fɔ rili sɔfa.
4 Ɛnibɔdi we na sojaman nɔ de put an pan ɔda tin dɛn fɔ gɛt prɔfit, so dat di wan we jɔyn am pan soja wok go gladi fɔ am.
5 Ɛn we i kam pan gem dɛn, ɛnibɔdi we de tek pat pan gem nɔ de gɛt krawn pas i ple di gem akɔdin to aw i fɔ ple am.
6 Di fama we de wok tranga wan na in fɔs fɔ it di frut dɛn.
7 Go de tink ɔltɛm bɔt wetin a de se; di Masta go mek yu ɔndastand ɔltin.
8 Mɛmba se Jizɔs Krays bin dɔn gɛt layf bak ɛn na bin Devid in pikin, akɔdin to di gud nyuz we a de prich,
9 we a de sɔfa fɔ ɛn we dɛn dɔn put mi na prizin fɔ as kriminal. Bɔt dɛn nɔ chen Gɔd in wɔd.
10 Na dis rizin mek a de kɔntinyu fɔ bia ɔltin bikɔs ɔf di wan dɛn we Gɔd dɔn pik, so dat dɛnsɛf go sev tru Krays Jizɔs ɛn gɛt glori sote go.
11 Dɛn wɔd ya na tru: If wi day togɛda, wi go liv togɛda;
12 if wi kɔntinyu fɔ bia, wi go rul togɛda as kiŋ dɛn; if wi dinay am, insɛf go dinay wi;
13 if wi nɔ fetful, in go kɔntinyu fɔ fetful, bikɔs i nɔ go lay pan insɛf.
14 Go de mɛmba dɛn bɔt dɛn tin ya, tich dɛn bifo Gɔd nɔ fɔ de agyu bɔt wɔd dɛn, dat na sɔntin we nɔ gɛt wan yus bikɔs i de ambɔg di wan dɛn we de lisin.
15 Du yu bɛst fɔ mek Gɔd gladi fɔ yu, bi wokman we nɔ gɛt ɛnitin fɔ shem bɔt, yuz Gɔd in wɔd we na trut di rayt we.
16 Bɔt nɔ lisin to tɔk dɛn we nɔ gɛt wan minin ɛn we de agens wetin oli, bikɔs dɛn go mek pɔsin biev ɔlkayn bad we we Gɔd nɔ want,
17 ɛn dɛn wɔd de prɛd lɛk sofut we de it di bɔdi go insay. Tu pan dɛn na Aymeniɔs ɛn Faylitɔs.
18 Dɛn man ya dɔn lɛf di trut, dɛn de se di wan dɛn we dɔn day dɔn ɔlrɛdi gɛt layf bak, ɛn dɛn de mek sɔm pipul dɛn nɔ gɛt fet igen.
19 Bɔt pan ɔl dat, Gɔd in strɔng fawndeshɔn stil tinap, di wɔd dɛn we rayt* de na, “Jiova* no di wan dɛn we na in yon,” ɛn “Lɛ ɛnibɔdi we de kɔl Jiova* in nem lɛf fɔ du wetin nɔ rayt.”
20 Insay big os, nɔto gold ɛn silva kɔntena dɛn nɔmɔ kin de de, bɔt wud ɛn kle kɔntena dɛn bak kin de de, ɛn sɔm na fɔ du impɔtant wok dɛn, bɔt di ɔda wan dɛn na fɔ du kɔmɔn kɔmɔn wok dɛn.
21 So if ɛnibɔdi nɔ go nia kɔntena dɛn we dɛn de yuz fɔ du kɔmɔn kɔmɔn wok dɛn, i go bi kɔntena we dɛn de yuz fɔ du impɔtant wok, i go oli, i go gɛt yus to di wan we gɛt am, ɛn i go rɛdi fɔ ɔlkayn gud wok.
22 So rɔnawe pan di tin dɛn we yɔŋ pipul dɛn kin want fɔ du, bɔt tray tranga wan fɔ de du wetin rayt, fɔ gɛt fet, lɔv, ɛn pis, ɛn du am wit di wan dɛn we de kɔl di Masta wit klinat.
23 Pantap dat, nɔ jɔyn pan dɛn fulish tɔk we nɔ kin gɛt wan minin; yu no se dɛn kin kam wit agyumɛnt.
24 Di Masta in slev nɔ nid fɔ agyu, bɔt i fɔ tek tɛm du tin wit ɔlman, i fɔ kwalifay fɔ tich, i fɔ ebul kɔntrol insɛf we dɛn du am bad,
25 ɛn i fɔ tek tɛm tich di wan dɛn we nɔ gri wit wetin i se. Sɔntɛm Gɔd go alaw dɛn fɔ ripɛnt, ɛn dat go mek dɛn no di kɔrɛkt tin bɔt di trut,
26 ɛn dɛn go soba ɛn kɔmɔt na di Dɛbul in trap, bikɔs i dɔn kech dɛn layv layv wan fɔ mek dɛn du wetin i want.
Futnot Dɛn
^ Rid Baybul Wɔd dɛn Minin.
^ Insay Grik, “stamp.”
^ Rid Baybul Wɔd dɛn Minin.
^ Rid Baybul Wɔd dɛn Minin.
