Prɔvabs 25:1-28
25 Dis bak na Sɔlɔmɔn in parebul dɛn, we Ɛzikaya di kiŋ na Juda in man dɛn bin rayt:*
2 Gɔd in glori na fɔ kip sɔntin sikrit,Ɛn kiŋ dɛn glori na fɔ faynd awt bɔt sɔntin.
3 Jɔs lɛk aw di ɛvin ay ɛn di wɔl dip,Na so i at fɔ no wetin de na kiŋ dɛn at.
4 Pul di dɔti pan di silva,Ɛn i go rili klin we i go kɔmɔt.
5 Pul di wikɛd wan bifo di kiŋ,Ɛn in tron go tinap tranga wan fɔ du wetin rayt.
6 Nɔ ɔnɔ yusɛf bifo di kiŋ,Ɛn nɔ de usay impɔtant pipul dɛn de,
7 Bikɔs i bɛtɛ lɛ i tɛl yu se, “Kam ɔp na ya,”Pas fɔ disgres yu bifo bigman.
8 Nɔ rɔsh fɔ kɛr yu kes go na kɔt,Bikɔs wetin yu go du leta if yu neba disgres yu?
9 Tɔk yu kes wit yu neba,Bɔt nɔ tɔk sɔntin we na sikrit,*
10 So dat di wan we de lisin to yu nɔ go mek yu shem,Ɛn yu prɛd bad ripɔt* we dɛn nɔ ebul fɔ stɔp.
11 Wɔd we pɔsin tɔk di rayt tɛmTan lɛk gold apul na silva sɛtin.
12 Jɔs lɛk gold yerin ɛn fayn gold juɛlri,Na so pɔsin we gɛt sɛns in kɔrɛkshɔn tan to di wan we de lisin.
13 Jɔs lɛk aw sno in kolnɛs de mek pɔsin fil fayn di de we dɛn de avɛst,Na so mɛsenja we fetful tan to di wan dɛn we sɛn am,Bikɔs i de mek in masta fil fayn.
14 Pɔsin we de bost bɔt gift* we i nɔ ɛva giTan lɛk klawd ɛn briz we nɔ de kam wit ren.
15 Pɔsin we peshɛnt go mek bigman biliv am,Ɛn swit wɔd* dɛn kin brok bon.
16 If yu si ɔni, jɔs it wetin yu nid,Bikɔs if yu it am pasmak, yu go vɔmit am.
17 Lɛ yu fut nɔ de na yu neba in os ɔltɛm,So dat i nɔ go taya wit yu ɛn et yu.
18 Pɔsin we de tɔk lay lay tin bɔt in nebaTan lɛk sɔd, shap aro, ɛn tik we dɛn de yuz fɔ fɛt.
19 Di tɛm we trɔbul de, fɔ gɛt kɔnfidɛns pan pɔsin we dɛn nɔ kin abop pan*Tan lɛk tit we dɔn brok ɔ fut we de shek shek.
20 Jɔs lɛk we pɔsin de pul klos di tɛm we di ples kolƐn lɛk we yu de tɔn viniga pan soda,*Na so i go tan lɛk we pɔsin de siŋ siŋ dɛn to pɔsin we in at pwɛl.
21 If yu ɛnimi* angri, gi am tin fɔ it;If i tɔsti, gi am wata fɔ drink;
22 Da we de yu go de put fayakol na in ed,*Ɛn Jiova go blɛs yu.
23 Di briz we de kɔmɔt na di nɔt de briŋ kam ɛvi ren,Ɛn pɔsin we de kongosa de mek ɔda pɔsin vɛks.
24 I bɛtɛ fɔ de kɔna say na di ruf,Pas fɔ de na di sem os wit wɛf we lɛk plaba.*
25 Gud ripɔt we kɔmɔt frɔm fa sayTan lɛk kol wata pan sol* we dɔn taya.
26 Jɔs lɛk spriŋ* we dɔn pɔtɔpɔtɔ ɛn wɛl we dɔn pwɛl,Na so pɔsin we de du wetin rayt tan we i du* wetin wikɛd pɔsin want.
27 I nɔ fayn fɔ it tumɔs ɔni,Ɛn i nɔ fayn we pɔsin de fɛn glori fɔ insɛf.
28 Pɔsin we nɔ ebul kɔntrol insɛf we i vɛks tan lɛkSiti we pɔsin ɛnta we nɔ gɛt wɔl.
Futnot Dɛn
^ Ɔ “bin kɔpi ɛn gɛda.”
^ Ɔ “tɔk ɔda pipul dɛn sikrit.”
^ Ɔ “bad bad rumɔ.”
^ Insay Ibru, “lay lay gift.”
^ Ɔ “gud wɔd.”
^ Ɔ i kin bi, “pɔsin we de kɔmɔt biɛn in kɔmpin.”
^ Dat na, bekin soda.
^ Insay Ibru, “di wan we et yu.”
^ Dat na, fɔ mek di pɔsin in at kol ɛn mek i nɔ gɛt strɔngat.
^ Ɔ “lɛk grɔmbul.”
^ Rid Baybul Wɔd dɛn Minin.
^ Ɔ “yu wata we bɔs na grɔn.”
^ Ɔ “we i gri wit.” Insay Ibru, “we i staga bifo.”
