Prɔvabs 8:1-36
8 Sɛns de ala lawd wan.
Ɔndastandin de es in vɔys.
2 I de na di il dɛn nia di rod,I tinap na di jɔnkshɔn dɛn.
3 I tinap nia di get dɛn we de go insay di siti,Na di domɔt dɛn,I de kray lawd lawd wan se:
4 “E pipul dɛn, a de kɔl una;A de es mi vɔys mek ɔlman* yɛri.
5 Una we nɔ gɛt ɛkspiriɛns, una lan aw fɔ gɛt sɛns;Una we ful, una tray fɔ gɛt at we de ɔndastand.
6 Lisin, bikɔs wetin a de tɔk impɔtant,Mi lip dɛn de tɔk wetin rayt;
7 Mi mɔt de tek tɛm tɔk wetin tru,Ɛn mi lip dɛn et wetin wikɛd.
8 Ɔl di tin dɛn we mi mɔt de tɔk na tin dɛn we rayt.
Nɔn pan dɛn nɔ bɛnbɛn.
9 Dɛn ɔl klia fɔ di wan we de ɔndastand,Dɛn kɔrɛkt to di wan dɛn we dɔn no sɔntin.
10 Tek mi kɔrɛkshɔn, nɔ tek silva;Tray fɔ no sɔntin, nɔ tray fɔ gɛt di gold we fayn pas ɔl,
11 Bikɔs sɛns bɛtɛ pas koral* dɛn;No ɔda valyu tin nɔ de kɔmpia to am.
12 Mi, we na sɛns, de togɛda wit ɔndastandin;A dɔn no ɛn ebul fɔ tink fayn fayn wan.
13 Fɔ fred Jiova min fɔ et wetin bad.
A nɔ lɛk we pɔsin de es insɛf ɔp, mek prawd, du bad, ɛn tɔk tin we nɔ rayt.
14 A gɛt gud advays ɛn de du tin wit sɛns;A gɛt pawa ɛn ebul fɔ ɔndastand.
15 Na mi de mek kiŋ dɛn kɔntinyu fɔ rul,Ɛn na mi de mek di wan dɛn we gɛt ay pozishɔn mek lɔ dɛn we rayt.
16 Na mi de mek prins dɛn kɔntinyu fɔ rul,Ɛn na mi de mek impɔtant pipul dɛn jɔj di rayt we.
17 A lɛk di wan dɛn we lɛk mi,Ɛn di wan dɛn we de luk fɔ mi go si mi.
18 Jɛntri, glori, valyu tin dɛn we de las,Ɛn fɔ du wetin rayt de wit mi.
19 Di frut dɛn we a de bia bɛtɛ pas gold, dɛn ivin bɛtɛ pas gold we dɛn dɔn klin,Ɛn di frut dɛn we a de bia bɛtɛ pas di bɛst silva.
20 A de waka na di rod fɔ du wetin rayt,Midul usay jɔstis de;
21 A de gi valyu tin dɛn to di wan dɛn we lɛk mi,Ɛn a de ful-ɔp dɛn stɔ dɛn.
22 Na mi fɔs Jiova mek,Di fɔs gud tin we i du trade trade.
23 A bin de frɔm trade trade,Frɔm di stat, frɔm di tɛm bifo di wɔl.
24 I mek mi* di tɛm we no dip wata nɔ bin de,We no spriŋ* nɔ bin de rɔn wit wata.
25 I mek mi bifo di mawntin dɛn,Ɛn a bin dɔn de bifo i mek di il dɛn,
26 We i nɔ bin dɔn mek di wɔl ɛn di land dɛnƆ di fɔs dɔti na di grɔn.
27 A bin de we i mek di ɛvin;We i mak di bawndri* bitwin di skay ɛn di wata,
28 We i mek di klawd we de ɔp,We i mek di say dɛn usay dip wata de,
29 We i mek lɔ fɔ di siSe in wata nɔ fɔ pas usay i se i fɔ stɔp,We i mek di fawndeshɔn fɔ di wɔl,
30 A bin de wit am as pɔsin we sabi wok.
Na mi na bin di wan we i rili lɛk ɔltɛm;A bin de gladi bifo am ɛvride;
31 A bin gladi fɔ di wɔl we i mek fɔ lɛ mɔtalman dɛn de de,Ɛn a bin rili lɛk mɔtalman.*
32 Naw, mi pikin dɛn, una lisin to mi.Di wan dɛn we de du wetin a se go gladi.
33 Lisin to kɔrɛkshɔn ɛn gɛt sɛns,Ɛn nɔ ɛva tɔn yu bak pan am.
34 Di man we de lisin to mi gladiBay we i de kam ali na mi domɔt ɛvride,Bay we i de wet nia mi domɔt;
35 Bikɔs di wan we de fɛn mi go gɛt layf,Ɛn Jiova go gladi fɔ am.
36 Bɔt di wan we nɔ de lisin to mi go ambɔg insɛf,Ɛn di wan dɛn we et mi, lɛk day.”
Futnot Dɛn
^ Insay Ibru, “mɔtalman pikin dɛn.”
^ Rid Baybul Wɔd dɛn Minin.
^ Ɔ “I bɔn mi.”
^ Ɔ “yu wata we bɔs na grɔn.”
^ Insay Ibru, “di sakul.”
^ Insay Ibru, “mɔtalman pikin dɛn.”
