Rɛvɛleshɔn 2:1-29
2 “Rayt to di enjɛl na di kɔngrigeshɔn na Ɛfisɔs se: Dis na di tin dɛn we di wan we ol di sɛvin sta dɛn na in raytan ɛn we de waka midul di sɛvin gold stand dɛn we gɛt lamp pan dɛn se:
2 ‘A no di tin dɛn we yu de du, di we aw yu de wok tranga wan ɛn di bia we yu de bia, ɛn a no se yu nɔ de ɛnkɔrej bad pipul dɛn, ɛn yu de tɛst di wan dɛn we se dɛn na apɔsul bɔt we nɔto apɔsul, ɛn yu dɔn si se dɛn na layman dɛn.
3 Yu de sho bak se yu de bia, ɛn yu dɔn bia bikɔs ɔf mi nem ɛn yu nɔ taya.
4 Bɔt dis na di prɔblɛm we a gɛt wit yu, yu nɔ gɛt di sem lɔv we yu bin gɛt fɔs.
5 “‘So mɛmba usay yu kɔmɔt we yu fɔdɔm, ɛn ripɛnt ɛn du di tin dɛn we yu bin de du fɔs. If yu nɔ du am, a go kam to yu, ɛn a go pul yu stand we gɛt lamp pan am na di ples we i de, pas te yu ripɛnt.
6 Bɔt stil, a gladi fɔ yu fɔ dis wan tin: yu et di tin dɛn we di pipul dɛn na Nikoleɔs in grup de du, ɛn misɛf et dɛn tin dɛn de.
7 Lɛ di wan we gɛt yes yɛri wetin di spirit de tɔk to di kɔngrigeshɔn dɛn: A go mek di wan we win, it di frut dɛn na di tik we de gi layf, we de na Gɔd in Paradays.’
8 “Ɛn rayt to di enjɛl na di kɔngrigeshɔn na Smana se: Dis na di tin dɛn we i tɔk, ‘di Fɔs ɛn di Las,’ di wan we bin dɔn day ɛn we gɛt layf bak. I se:
9 ‘A no di prɔblɛm dɛn we yu gɛt ɛn aw yu po—bɔt yu jɛntri—ɛn di we aw di wan dɛn we se dɛn na Ju bɔt we nɔto rial Ju dɔn tɔk agens yu, bɔt dɛn na Setan in sinagɔg.*
10 Nɔ fred di tin dɛn we de kam mek yu sɔfa. Luk! Di Dɛbul go kɔntinyu fɔ trɔwe sɔm pan una na prizin so dat i go rili tɛst una, ɛn una go gɛt prɔblɛm fɔ tɛn dez. Sho se yu fetful ilɛksɛf yu go day, ɛn a go gi yu di krawn we na layf.
11 Lɛ di wan we gɛt yes yɛri wetin di spirit de tɔk to di kɔngrigeshɔn dɛn: Di sɛkɔn day nɔ go du natin to di wan we win.’
12 “Rayt to di enjɛl na di kɔngrigeshɔn na Pagamɔm se: Dis na di tin dɛn we di wan we gɛt di shap, lɔng sɔd, we gɛt tu ɛj se:
13 ‘A no usay yu de liv, na de Setan in tron de; bɔt stil yu dɔn kɔntinyu fɔ de biɛn mi,* yu nɔ dinay se yu gɛt fet pan mi ivin di tɛm we mi witnɛs we fetful we na Antipas bin de, we dɛn kil usay una de, usay Setan de liv.
14 “‘Bɔt na dɛn tu-tri prɔblɛm ya a gɛt wit yu, yu gɛt di wan dɛn we de fala Belam in tichin, we tich Belak fɔ tɛmt Izrɛl in pikin dɛn fɔ mek dɛn it tin dɛn we dɛn sakrifays to aydɔl ɛn fɔ du mami ɛn dadi biznɛs di we aw Gɔd nɔ want.*
15 Ɛn yu gɛt di wan dɛn bak we de fala di tin dɛn we Nikoleɔs in grup de tich.
16 So ripɛnt. If yu nɔ du am, a de kam to yu kwik kwik wan, ɛn a go fɛt dɛn wit di lɔng sɔd na mi mɔt.
17 “‘Lɛ di wan we gɛt yes yɛri wetin di spirit de tɔk to di kɔngrigeshɔn dɛn: A go gi di wan we win, sɔm mana we ayd, a go gi am wan wayt ston, ɛn wan nyu nem rayt pan di ston we nɔbɔdi nɔ no pas di wan we go gɛt am.’
18 “Rayt to di enjɛl na di kɔngrigeshɔn na Tayatayra se: Dis na di tin dɛn we Gɔd in Pikin se, di wan we in yay tan lɛk faya we de kech ɛn we in fut tan lɛk fayn kɔpa:
19 ‘A no di tin dɛn we yu de du, di lɔv we yu gɛt, yu fet, yu wok, ɛn di bia we yu de bia, ɛn a no se di tin dɛn we yu de du dis biɛn tɛm pas di wan dɛn we yu bin de du fɔs.
20 “‘Bɔt dis na di prɔblɛm we a gɛt wit yu, yu de alaw da uman Jezibɛl, we de kɔl insɛf prɔfɛt, ɛn i de tich ɛn ful mi slev dɛn fɔ du mami ɛn dadi biznɛs di we aw Gɔd nɔ want* ɛn fɔ it tin dɛn we dɛn sakrifays to aydɔl.
21 Ɛn a dɔn gi am tɛm fɔ ripɛnt, bɔt i nɔ want fɔ ripɛnt fɔ we i de du mami ɛn dadi biznɛs di we aw Gɔd nɔ want.*
22 Luk! A de kam mek i sik, ɛn di wan dɛn we de du mami ɛn dadi biznɛs* wit am go gɛt big big trɔbul, pas dɛn ripɛnt fɔ di tin dɛn we i mek dɛn de du.
23 Ɛn a go kil in pikin dɛn wit bad bad sik, so dat ɔl di kɔngrigeshɔn dɛn go no se na mi no wetin pɔsin de rili tink bɔt* ɛn luk insay in at, ɛn a go gi to ɔlman akɔdin to wetin i de du.
24 “‘Bɔt a de tɔk to di ɔda wan dɛn we de na Tayatayra, ɔl di wan dɛn we nɔ de fala dis tichin, di wan dɛn we nɔ no di tin dɛn we dɛn kin kɔl “dip tin dɛn bɔt Setan”: A nɔ de put ɔda ɛvi lod pan una.
25 Bɔt stil, una ol wetin una gɛt wit tu an te a kam.
26 Ɛn di wan we win ɛn du di tin dɛn we a du, te di ɛnd, a go mek i gɛt pawa oba di neshɔn dɛn,
27 jɔs lɛk aw mi Papa dɔn mek a gɛt pawa. Ɛn i go bi shɛpad fɔ di pipul dɛn ɛn na rɔd we dɛn mek wit ayɛn go de na in an so dat dɛn go brok brok lɛk tin dɛn we dɛn mek wit kle.
28 Ɛn a go gi am di mɔnin sta.
29 Lɛ di wan we gɛt yes yɛri wetin di spirit de tɔk to di kɔngrigeshɔn dɛn.’
Futnot Dɛn
^ Dat na, di ples usay di Ju dɛn bin de wɔship.
^ Insay Grik, “yu ol mi nem wit tu an.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Grik, pɔnia. Rid Baybul Wɔd dɛn Minin.
^ Di Grik wɔd we dɛn yuz ya, min: we pɔsin we mared de du mami ɛn dadi biznɛs wit ɔda pɔsin.
^ Ɔ “di we aw pɔsin de rili fil.” Insay Grik, “kidni.”
