Akt 27:1-44
27 We dɛn disayd se wi fɔ tek ship go na Itali, dɛn an ova Pɔl ɛn sɔm ɔda prizina dɛn to wan ami ɔfisa we nem Juliɔs we de na Ɔgɔstɔs in trup.
2 Wi go insay wan ship we kɔmɔt Adremitiɔm we bin gɛt fɔ stɔp na di pɔt dɛn we de na Eshia distrikt, ɛn wi bigin fɔ go; Aristakɔs we na Masidonian we kɔmɔt Tɛsalonayka bin de wit wi.
3 Di nɛks de, wi rich na Saydɔn ɛn Juliɔs trit Pɔl fayn ɛn alaw am fɔ go to in padi dɛn fɔ mek dɛn tek kia ɔf am.
4 Wi lɛf de ɛn pas nia Sayprɔs usay wi tek kɔva, bikɔs di briz bin de kɔmɔt usay wi de go.
5 Dɔn wi kɔntinyu fɔ travul na di si we de nia Silishia ɛn Pamfilia, ɛn wi go na di pɔt we de na Mayra insay Lishia.
6 Di ami ɔfisa si wan ship de we kɔmɔt Alɛgzandria we de go Itali, ɛn i mek wi go insay am.
7 We wi dɔn go saful saful fɔ sɔm dez, wi kam na Kanaydɔs, bɔt i nɔ bin izi. Bikɔs di briz nɔ alaw wi fɔ go bifo, wi go tek kɔva nia Krit bay Salmoni.
8 Wi kɔntinyu fɔ travul nia di land, bɔt i nɔ bin izi. Dɔn wi kam na wan ples we dɛn kɔl Sef Pɔt, we de nia Lesia siti.
9 Afta sɔm tɛm, i bin bad fɔ travul, bikɔs ivin di fast we dɛn kin fast di De fɔ Fɔgiv Sin bin dɔn dɔn. So Pɔl advays
10 dɛn se: “Man dɛn, a de si se dis go we wi de go so, wi go lɔs di ship, di tin dɛn we de insay di ship, ɛn sɔntɛm wi go ivin lɔs wi layf.”*
11 Bɔt di ami ɔfisa lisin to di ship kaptin ɛn di pɔsin we gɛt di ship; i nɔ lisin to Pɔl.
12 Bikɔs i nɔ bin fayn fɔ de na di pɔt insay kol sizin, bɔku pan di wan dɛn we de insay di ship advays se mek dɛn kɔmɔt de ɛn si if dɛn go ebul go na Finiks. Finiks na wan pɔt na Krit we wansay de bay di nɔt* ɛn di ɔdasay de bay di sawt.*
13 We di briz frɔm di sawt blo saful wan, dɛn tink se wetin dɛn bin want go apin, so dɛn es di ankɔ ɛn bigin travul nia Krit.
14 Bɔt afta shɔt tɛm, wan big big briz we dɛn kɔl Yuroakwilo* bigin blo pan di ship.
15 Bikɔs di briz bin de blo di ship bad bad wan, di ship nɔ bin ebul fɔ go usay di briz de kɔmɔt ɛn wi nɔ bin ebul fɔ du natin, so wi jɔs alaw di briz fɔ kɛr wi go.
16 Dɔn wi rɔn fɔ go tek kɔva na wan smɔl ayland we dɛn kɔl Kɔda, bɔt i nɔ bin izi fɔ mek wi kɔntrol di smɔl bot* we de biɛn pat na di ship.
17 Afta dɛn es am ɔp di ship, dɛn pas rop dɛn ɔnda di ship ɛn tay am fɔ mek di bod dɛn nɔ skata; ɛn bikɔs dɛn bin de fred se di ship go jam di sansan na di Satis,* dɛn put di gia dɔŋ ɛn na di briz bin de kɛr wi go.
18 Di big big briz bin de mek di ship nɔ stɛdi, so di ɔda de dɛn bigin fɔ pul sɔm tin dɛn insay di ship fɔ mek i layt.
19 Ɛn di tɔd de, dɛnsɛf sɛf tek sɔm rop dɛn na di ship ɛn trowe dɛn.
20 We wi nɔ si di san ɔ sta dɛn fɔ lɔng tɛm ɛn big big briz bin de rili mɔna wi, wi nɔ bin gɛt op igen se wi go sev.
21 We i dɔn te we dɛn nɔ it, Pɔl tinap midul dɛn ɛn se: “Man dɛn, una bin fɔ dɔn lisin to mi advays; una nɔ bin fɔ dɔn kɔmɔt na Krit ɛn kam gɛt dis kayn prɔblɛm ɛn lɔs sɔm tin dɛn.
22 Bɔt stil, a de beg una fɔ tek kɔrej, bikɔs nɔbɔdi* nɔ go day, na di ship nɔmɔ go pwɛl.
23 Dis nɛt di Gɔd we gɛt mi ɛn we a de sav, in enjɛl kam tinap nia mi
24 ɛn tɔk se: ‘Pɔl, nɔ fred. Yu go mɔs tinap bifo Siza, ɛn Gɔd dɔn gi yu ɔl di wan dɛn we de wit yu insay dis ship.’
25 So, man dɛn, una tek kɔrej, a biliv se Gɔd go du wetin i tɛl in enjɛl fɔ tɛl mi.
26 Bɔt wi ship go pwɛl nia wan ayland.”
27 We di nɛt we mek 14 rich, di briz bin jɔs de kɛr wi go na di Edria Si. Dɔn midulnɛt, di selɔ dɛn notis se dɛn de go nia wan land.
28 Dɛn mɛzhɔ di wata fɔ si aw i dip ɛn dɛn si se na 120 fit,* so dɛn go bifo smɔl ɛn mɛzhɔ bak ɛn si se na 90 fit.*
29 Ɛn bikɔs dɛn bin de fred lɛ di ship nɔ go jam rɔk dɛn ɔnda di wata, dɛn go biɛnsay na di ship ɛn ib 4 ankɔ dɛn insay di wata, ɛn dɛn bin de wish lɛ doklin.
30 Di selɔ dɛn go na di frɔnt say, ɛn dɛn bin de put di smɔl bot insay di wata fɔ tray fɔ rɔnawe. Bɔt dɛn bin de mek lɛk se na ankɔ dɛn, dɛn de put insay di wata.
31 Na de Pɔl tɛl di ami ɔfisa ɛn di sojaman dɛn se: “If dɛn man ya nɔ lɛf na di ship, una nɔ go sev.”
32 Dɔn di sojaman dɛn kɔt di rop dɛn we bin ol di smɔl bot, so dat i go fɔdɔm insay di wata.
33 We do bin want fɔ klin, Pɔl ɛnkɔrej dɛn ɔl fɔ it sɔntin. I tɛl dɛn se: “Tide dɔn mek 14 dez we una de wet, ɛn te naw, una nɔ it natin.
34 So a de ɛnkɔrej una fɔ it sɔntin; dis na fɔ una yon gud, bikɔs wan ia na una ed nɔ go lɔs.”
35 Afta i tɔk dis, i tek bred, tɛl Gɔd tɛnki bifo dɛn ɔl, ɛn i brok am ɛn bigin fɔ it.
36 So dɛn ɔl tek kɔrej ɛn dɛnsɛf bigin fɔ it.
37 Na wi 276 bin de insay di ship.
38 We dɛn dɔn it te dɛn satisfay, dɛn trowe di wit* dɛn na di wata fɔ mek di ship layt.
39 We doklin, dɛn nɔ ebul si di land, bɔt dɛn si wan be we gɛt bich, ɛn dɛn bin rili want fɔ kɛr di ship na di bich if dɛn go ebul.
40 So dɛn kɔt di ankɔ dɛn ɛn mek dɛn fɔdɔm na di wata. Dɔn dɛn lus di rop dɛn we bin tay di padul dɛn. Afta dat, dɛn opin di klos we de bifo di ship fɔ mek briz kam insay ɛn mek di ship muf, ɛn dɛn tray fɔ go na di bich.
41 We dɛn jam wansay we di sansan mek lɛk il ɔnda di wata, dɛn mek di ship rayd na grɔn, ɛn di frɔnt say na di ship fasin; i nɔ bin ebul muf. Bɔt di swɛlin bin de bang bang di biɛn pat na di ship ɛn brok am bad bad wan.
42 Na de di sojaman dɛn disayd fɔ kil di prizina dɛn so dat dɛn nɔn nɔ go swim ɛn rɔnawe.
43 Bɔt di ami ɔfisa bin rili want fɔ kam wit Pɔl sef wan, so i mek dɛn nɔ du wetin dɛn bin plan. I tɛl di wan dɛn we ebul swim fɔ jomp insay di wata ɛn swim go na di land,
44 ɛn di ɔda wan dɛn go de biɛn dɛn; sɔm dɛn bin ɛng pan bod dɛn, ɛn ɔda wan dɛn bin ol ɔda pat dɛn pan di ship we dɔn brok. So dɛn ɔl rich na land sef wan.
Futnot Dɛn
^ Ɔ “sol.”
^ Insay Grik, “nɔt-ist.”
^ Insay Grik, “sawt-ist.”
^ Dat na, di briz we de kɔmɔt na di nɔt-ist.
^ Dis na bot we dɛn kin yuz as layfbot.
^ Rid Baybul Wɔd dɛn Minin.
^ Ɔ “no sol.”
^ Lɛk 36 mita so. Insay Grik, “20 fatɔm.”
^ Lɛk 27 mita so. Insay Grik, “15 fatɔm.”
^ Wit na tin we pipul dɛn de it.
