Ibruz 8:1-13
8 Na dis na di men tin we wi de tɔk: Na dis kayn ay prist wi gɛt, ɛn i dɔn sidɔm na di Gret Gɔd we de na di tron na ɛvin, in raytan,
2 in na savant* na di oli ples ɛn na di rial tɛnt, we nɔto mɔtalman mek, bɔt we Jiova* mek.
3 Ɛni ay prist we dɛn pik na fɔ mek i gi gift dɛn ɛn mek sakrifays dɛn; so nid bin de bak fɔ mek dis pɔsin gɛt sɔntin fɔ sakrifays.
4 If i bin de na di wɔl, i nɔ bin fɔ bi prist, bikɔs pipul dɛn bin ɔlrɛdi de we de gi di gift dɛn lɛk aw di Lɔ se.
5 Di oli wok we dɛn pipul ya bin de du na ɛgzampul ɛn shado bɔt di tin dɛn na ɛvin; jɔs lɛk Mozis, we i bin want fɔ mek di tɛnt, Gɔd bin tɛl am wetin fɔ du. I se: “Mek shɔ se yu mek ɔltin lɛk di patan we a sho yu na di mawntin.”
6 Bɔt naw Jizɔs dɔn gɛt wan wok* we mɔ wɔndaful bikɔs na in bak na di midulman fɔ wan agrimɛnt we bɛtɛ fa fawe, we dɛn mek bay lɔ ɛn we rili ol wata bikɔs ɔf prɔmis dɛn we bɛtɛ.
7 If di fɔs agrimɛnt nɔ bin gɛt wan fɔlt, nid nɔ bin fɔ de fɔ mek sɛkɔn wan.
8 Gɔd bin si fɔlt pan di pipul dɛn bikɔs “Jiova* se: ‘Di de dɛn de kam we a go mek wan nyu agrimɛnt wit di pipul dɛn na Izrɛl ɛn wit di pipul dɛn na Juda.’
9 Jiova* tɔk bak se, ‘I nɔ go tan lɛk di agrimɛnt we a bin mek wit dɛn gret gret granpa dɛn di de we a ol dɛn an ɛn pul dɛn kɔmɔt na Ijipt, bikɔs dɛn put mi agrimɛnt na kɔna, so a lɛf fɔ kia fɔ dɛn.’
10 “Jiova* se, ‘Na di agrimɛnt dis we a go mek wit di pipul dɛn na Izrɛl afta dɛn dez dɛn de. A go put mi lɔ dɛn na dɛn maynd ɛn rayt am na dɛn at. Ɛn a go bi dɛn Gɔd, ɛn dɛn go bi mi pipul dɛn.
11 “‘Ɛn nɔn pan dɛn nɔ go tich dɛn kɔmpin sitizin ɛn in brɔda igen se: “No Jiova!”* Dɛn ɔl go no mi, frɔm di kɔmɔn pipul dɛn to di wan dɛn we gɛt ay pozishɔn.
12 A go fɔgiv dɛn fɔ di bad tin dɛn we dɛn de du, ɛn a nɔ go mɛmba dɛn sin dɛn igen.’”
13 We i se “wan nyu agrimɛnt,” i dɔn mek di wan we bin de trade nɔ gɛt yus igen. Naw di wan we nɔ gɛt yus igen ɛn we de ol nɔ de fa igen fɔ lɛ i lɔs.
Futnot Dɛn
^ Ɔ “pɔblik savant.”
^ Rid Baybul Wɔd dɛn Minin.
^ Ɔ “wok fɔ bɛnifit pipul dɛn.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
