Job 19:1-29
19 Na de Job tɔk se:
2 “Aw lɔng una go de tɔmɛnt mi layf,Bay we una de tɔk tin dɛn we de pwɛl mi at?
3 Na tɛn tɛm una dɔn kɔs mi;Una nɔ de shem fɔ trit mi bad.
4 If na tru se a dɔn mek mistek,Dat na mi biznɛs.
5 If una kɔntinyu fɔ tink se una bɛtɛ pas mi,Ɛn fil se una gɛt rayt fɔ mɔlɛs mi,
6 Una fɔ no se na Gɔd dɔn ful mi,Ɛn i dɔn kech mi na in ɔntin nɛt.
7 Luk! A dɔn de kray se, ‘Dɛn dɔn du mi bad!’ bɔt nɔbɔdi nɔ ansa mi;A dɔn kɔntinyu fɔ kray fɔ ɛp, bɔt dɛn nɔ trit mi fia wan.
8 I dɔn blɔk di say we a de pas wit ston wɔl, ɛn a nɔ ebul pas;I dɔn kɔba di rod we a de waka wit daknɛs.
9 I dɔn mek a nɔ gɛt glori igen,Ɛn i dɔn pul di krawn na mi ed.
10 I dɔn dɔnawe wit mi;I mek a nɔ gɛt op igen lɛk tik we dɛn dɔn rut.
11 I dɔn rili vɛks pan mi,Ɛn i de si mi as in ɛnimi.
12 In sojaman dɛn kam togɛda ɛn sɔrawnd mi,Ɛn dɛn kamp rawnd mi tɛnt.
13 I dɔn drɛb mi brɔda dɛn fa frɔm mi,Ɛn di wan dɛn we sabi mi dɔn tɔn dɛn bak pan mi.
14 Mi tayt padi* dɛn dɔn go,Ɛn di wan dɛn we a rili sabi dɔn fɔgɛt mi.
15 Di strenja dɛn we de na mi os ɛn mi savant gal dɛn de si mi as strenja;Mi na fɔrina to dɛn.
16 A kɔl mi savant bɔt i nɔ ansa mi;A beg am fɔ sɔri fɔ mi.
17 Mi wɛf rili et di sɛnt we de kɔmɔt pan mi,Ɛn mi yon brɔda dɛn nɔ want fɔ kam nia mi bikɔs a de smɛl bad.
18 Ivin smɔl pikin dɛn et mi;We a grap, dɛn de bigin fɔ laf mi.
19 Ɔl mi tayt padi dɛn et mi,Ɛn di wan dɛn we a lɛk dɔn tɔn dɛn bak pan mi.
20 Mi bon dɛn de fasin pan mi skin ɛn mi flɛsh,Ɛn i lɛf smɔl fɔ lɛ a day.
21 Una sɔri fɔ mi, mi padi dɛn, una sɔri fɔ mi,Bikɔs na Gɔd in an dɔn tɔch mi.
22 Wetin mek una de kɔntinyu fɔ mek a sɔfa lɛk aw Gɔd de du,Ɛn una nɔ de taya fɔ atak mi?*
23 If nɔmɔ dɛn go rayt di wɔd dɛn we a de tɔk,If nɔmɔ dɛn go rayt dɛn na buk!
24 A wish dɛn go kav dɛn sote go pan rɔk,Wit ayɛn chisul ɛn ful-ɔp am wit lɛd!
25 A no gud gud wan se di wan we de sev mi de alayv;I go kam leta ɛn tinap na di wɔl!*
26 Afta mi skin dɔn pwɛl bad bad wan,A go si Gɔd we a stil de alayv.
27 A go si am fɔ misɛf sɛf,Mi yon yay go si am, nɔto ɔda pɔsin in yay.
Dip insay mi, a dɔn rili taya!*
28 Una de aks se, ‘Aw wi de mek i sɔfa?’
Lɛk se na mi de kɔz di prɔblɛm.
29 Unasɛf sɛf fɔ fred di sɔd,Bikɔs di sɔd de kam wit pɔnishmɛnt pan di wan dɛn we de sin;Una fɔ no se jɔj de.”
Futnot Dɛn
^ Ɔ “Mi fambul.”
^ Insay Ibru, “Ɛn una nɔ de satisfay wit mi flɛsh?”
^ Insay Ibru, “tinap oba di dɔti.”
^ Ɔ “Mi kidni dɛn nɔ de wok igen.”
