Job 3:1-26
3 Afta dat, Job bigin fɔ tɔk ɛn swɛ di de we dɛn bɔn am.*
2 Job tɔk se:
3 “A wish di de we dɛn bɔn mi nɔ bin ɛva kam,Ɛn di nɛt we sɔmbɔdi tɔk se: ‘Wan uman dɔn gɛt bɛlɛ ɛn na bɔypikin!’
4 Lɛ da de de bi daknɛs.
Lɛ Gɔd we de ɔp nɔ bisin bɔt am;Lɛ layt nɔ shayn pan am.
5 Lɛ tik tik daknɛs tek am.
Lɛ dak klawd kɔba am.
Lɛ ɛnitin we de mek di ples dak santɛm mek i fred.
6 Lɛ tik tik daknɛs kɔba da nɛt de.Lɛ i nɔ gladi wit di ɔda de dɛn na di ia,Ɛn lɛ i nɔ de amɔng di de dɛn na ɛni mɔnt.
7 Fɔ tru, i fɔ bin dɔn bɛtɛ if dɛn nɔ bin bɔn ɛnibɔdi da nɛt de;Lɛ nɔbɔdi nɔ yɛri gladi gladi da nɛt de.
8 Lɛ di wan dɛn we de swɛ di de, swɛ am,Di wan dɛn we ebul fɔ wek Levayatan.*
9 Lɛ di sta dɛn we de apia na mɔnin dak.Lɛ di wet we i de wet fɔ lɛ doklin bi fɔ natinƐn lɛ i nɔ si ali mɔnin layt,
10 Bikɔs i nɔ lɔk di domɔt dɛn na mi mama in bɛlɛ,So dat a nɔ go si trɔbul.
11 Wetin mek a nɔ day we dɛn de bɔn mi?
Wetin mek a nɔ day we a kɔmɔt na mi mama in bɛlɛ?
12 Wetin mek mi mama tot mi na in futƐn gi mi bɔbi?
13 Lɛk bay naw, a bin fɔ ledɔm ɛn nɔ gɛt natin we de ambɔg mi;A bin fɔ de slip ɛn rɛst
14 Wit kiŋ dɛn na di wɔl ɛn di wan dɛn we de advays dɛn,We bil ples dɛn fɔ dɛnsɛf bɔt we dɔn pwɛl pwɛl.
15 Ɔ a bin fɔ de slip ɛn rɛst wit prins dɛn we gɛt gold,We dɛn os dɛn ful-ɔp wit silva.
16 Ɔ wetin mek mi mama in bɛlɛ nɔ pwɛl we i nɔ no,Lɛk pikin dɛn we nɔ wande si layt?
17 Di ples usay ivin di wan dɛn we wikɛd de stɔp fɔ vɛks;Di ples usay di wan dɛn we dɔn rili taya de rɛst.
18 Di ples usay ɔl di jelman dɛn de blo;Dɛn nɔ de yɛri di wan we de fos dɛn fɔ wok in vɔys.
19 Di ples usay di smɔl wan ɛn di big wan na di sem,Ɛn di slev dɔn fri frɔm in masta.
20 Wetin mek Gɔd de alaw di wan we de sɔfa fɔ kɔntinyu fɔ liv,*Ɛn i de gi layf to di wan we in at pwɛl pasmak?
21 Dɛn de wish fɔ day, bɔt dɛn nɔ de day.
Dɛn de luk fɔ am pas aw dɛn de luk fɔ valyu tin dɛn we ayd,
22 Di wan dɛn we kin gladi pasmak,We kin gladi we dɛn de na di grev.
23 Wetin mek Gɔd de gi layt to pɔsin we nɔ no usay i de go,We i dɔn lɔk insay fɛns?
24 Di pini we a de pini dɔn tan lɛk tin fɔ itƐn di kray we a de kray de flo lɛk wata.
25 Di tin we a de fred pasmak dɔn apin to mi
Ɛn wetin a de fred dɔn mit mi.
26 A nɔ gɛt pis, kolat, ɔ rɛst,Bɔt trɔbul de kɔntinyu fɔ mit mi.”
Futnot Dɛn
^ Insay Ibru, “ɛn swɛ in de.”
^ Dis de tɔk bɔt krɔkɔdayl ɔ ɔda big pawaful animal we de na wata.
^ Ɔ “alaw di wan we de sɔfa fɔ si layt.”
