Lyuk 13:1-35
-
Una ripɛnt ɔ dɛn go dɔnawe wit una (1-5)
-
Ɛgzampul bɔt di fig tik we nɔ de bia (6-9)
-
Jizɔs mɛn wan kripul uman di Sabat de (10-17)
-
Ɛgzampul dɛn bɔt di mɔstad sid ɛn di yist (18-21)
-
Pɔsin nid fɔ tray tranga wan fɔ pas na di smɔl domɔt (22-30)
-
Ɛrɔd, “da fɔks” (31-33)
-
Di sɔri tin dɛn we Jizɔs tɔk bɔt Jerusɛlɛm (34, 35)
13 Da tɛm de, sɔm pipul dɛn we bin de de tɛl am bɔt di Galilian dɛn we Paylet miks dɛn blɔd wit dɛn sakrifays dɛn.
2 So i aks dɛn se: “Una tink se dɛn Galilian dɛn de bin de sin pas ɔl di ɔda Galilian dɛn bikɔs dis bad tin apin to dɛn?
3 Nɔ. A de tɛl una se if unasɛf nɔ ripɛnt, una ɔl go day.
4 Ɔ una tink se dɛn 18 pipul dɛn we di tawa na Siloam fɔdɔm pan ɛn kil bin de sin pas ɔl di ɔda pipul dɛn we de na Jerusɛlɛm?
5 Nɔ. A de tɛl una se if unasɛf nɔ ripɛnt, una ɔl go day jɔs lɛk dɛn.”
6 Dɔn i gi dɛn wan ɛgzampul. I se: “Wan man bin gɛt fig tik na in vayn gadin. I go luk am fɔ si if i bia frut, bɔt i nɔ si ɛni frut pan am.
7 So i tɛl di pɔsin we de wok na di vayn gadin se, ‘Na di tri ia dis we a de kam luk fɔ frut pan dis fig tik, bɔt a nɔ de si natin. Kɔt am! Wetin mek i fɔ gro na di grɔn we i nɔ de bia frut?’
8 Di pɔsin we de wok na di vayn gadin tɛl am se, ‘Masta, lɛf di tik bak fɔ wan ia mek a dig rawnd am ɛn put manyɔ de.
9 If i bia frut afta dat, fayn; bɔt if i nɔ bia, kɔt am.’”
10 We Jizɔs bin de tich na wan sinagɔg* di Sabat de,
11 wan uman bin de de we bin gɛt dimɔn we dɔn mek i sik fɔ 18 ia. Di uman bin bɛn bad bad wan, ɛn i nɔ bin ebul fɔ tinap stret atɔl.
12 We Jizɔs si di uman, i tɛl am se: “Di sik we de mek yu wik dɔn lɛf yu.”
13 I le in an dɛn pan di uman, ɛn di uman tinap stret wantɛm wantɛm ɛn bigin fɔ prez Gɔd.
14 Bɔt di ɔfisa we de oba di sinagɔg* vɛks, bikɔs Jizɔs mɛn pɔsin di Sabat de, so i tɛl di pipul dɛn se: “Na siks dez wi fɔ du wok, una kam dɛn dez dɛn de fɔ lɛ i mɛn una, una nɔ kam di Sabat de.”
15 Bɔt di Masta tɛl am se: “Una na ipokrit dɛn. Una kin lus una kaw ɔ dɔnki di Sabat de na di say we una tay am ɛn kɛr am go fɔ go drink, nɔto so?
16 So una nɔ tink se a fɔ mɛn dis uman di Sabat de, we i bi se in na Ebraam in pikin ɛn Setan dɔn mek i sɔfa fɔ 18 ia?”
17 We i tɔk dɛn tin ya, ɔl di wan dɛn we bin de agens am bigin fɔ shem, bɔt ɔl di ɔda pipul dɛn bigin gladi fɔ ɔl di wɔndaful tin dɛn we i dɔn du.
18 So i kɔntinyu fɔ tɔk se: “Wetin Gɔd in Kiŋdɔm tan lɛk, ɛn wetin a go kɔmpia am to?
19 I tan lɛk mɔstad sid we wan man plant na in gadin. Di sid gro ɛn tɔn to tik, ɛn di bɔd dɛn we de flay na di skay kam liv na in branch dɛn.”
20 Dɔn, i tɔk bak se: “Wetin a go kɔmpia Gɔd in Kiŋdɔm to?
21 I tan lɛk yist we wan uman miks wit bɔku bɔku* flawa te ɔltin rayz.”
22 We i de go na Jerusɛlɛm, i bin de pas na difrɛn siti ɛn vilej dɛn, de tich pipul dɛn.
23 Na de wan man aks am se: “Masta, fɔ se di pipul dɛn we go sev nɔ bɔku?” I tɛl dɛn se:
24 “Una tray tranga tranga wan fɔ pas na di smɔl domɔt, bikɔs a de tɛl una se bɔku pipul dɛn go tray fɔ go insay, bɔt dɛn nɔ go ebul.
25 We di pɔsin we gɛt di os grap ɛn lɔk di domɔt, una go tinap na do de nak di domɔt ɛn se, ‘Masta, opin fɔ wi.’ Bɔt i go tɛl una se: ‘A nɔ no usay una kɔmɔt.’
26 Dɔn una go bigin fɔ tɔk se, ‘Wi bin it ɛn drink bifo yu, ɛn yu bin tich na wi men strit dɛn.’
27 Bɔt i go tɛl una se, ‘A nɔ no usay una kɔmɔt. Una kɔmɔt nia mi, una ɔl we nɔ de du wetin rayt!’
28 Na de una go de kray ɛn gren una tit, we una si Ebraam, Ayzak, Jekɔp, ɛn ɔl di prɔfɛt dɛn na Gɔd in Kiŋdɔm, bɔt dɛn ib una na do.
29 Apat frɔm dat, pipul dɛn go kɔmɔt na di ist, wɛst, nɔt, ɛn sawt ɛn sidɔm na* di tebul na Gɔd in Kiŋdɔm.
30 Ɛn di wan dɛn we kam las go de fɔs, ɛn di wan dɛn we kam fɔs go de las.”
31 Da sem tɛm de, sɔm Faresi dɛn kam mit am ɛn tɛl am se: “Kɔmɔt na ya ɛn go, bikɔs Ɛrɔd want fɔ kil yu.”
32 Jizɔs tɛl dɛn se: “Una go tɛl da fɔks* de se, ‘A de pul dimɔn pan pipul dɛn ɛn mɛn dɛn tide ɛn tumara; a go dɔn di tɔd de.’
33 Bɔt a go kɔntinyu tide, tumara, ɛn nɛks tumara, bikɔs dɛn nɔ fɔ kil prɔfɛt na ɔda ples, pas nɔmɔ na Jerusɛlɛm.
34 Una we de na Jerusɛlɛm, we de kil di prɔfɛt dɛn ɛn ston di wan dɛn we dɛn sɛn to una—bɔku tɛm a bin want fɔ gɛda una di we aw kombra fɔl kin gɛda in pikin dɛn ɔnda in fɛda! Bɔt una nɔ bin want dat.
35 Gɔd dɔn lɛf una os gi una. A de tɛl una se una nɔ go si mi pas te una se: ‘Blɛsin de pan di wan we de kam tinap fɔ Jiova* in nem!’”
Futnot Dɛn
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “tɛn kilogram.” Insay Grik, “sia mɛzhɔ.” Wan sia mɛzhɔ ikwal to 7.33 lita (6.66 dray kwat).
^ Ɔ “ling nia.”
^ Dis na animal we tan lɛk dɔg. In lɛg dɛn shɔt shɔt, in yes big, ɛn i kɔni.
^ Rid Baybul Wɔd dɛn Minin.
