Lyuk 6:1-49
-
Jizɔs na “Masta fɔ di Sabat” (1-5)
-
Jizɔs mɛn wan man we in an day (6-11)
-
Di 12 apɔsul dɛn (12-16)
-
Jizɔs tich ɛn mɛn (17-19)
-
Gladi-at ɛn bad tin dɛn we go apin (20-26)
-
Lɛk yu ɛnimi dɛn (27-36)
-
Lɛf fɔ jɔj (37-42)
-
Di frut de sho if di tik fayn (43-45)
-
Os we rili strɔng; os we nɔ gɛt strɔng fawndeshɔn (46-49)
6 Wan sabat de, we in ɛn in disaypul dɛn de pas insay wan fam we dɛn plant wit,* in disaypul dɛn bin de pul sɔm pan di wit, rɔb am na dɛn an, ɛn it am.
2 Na de sɔm Faresi dɛn aks se: “Wetin mek una de du wetin pɔsin nɔ gɛt rayt fɔ du di Sabat de?”
3 Bɔt Jizɔs tɛl dɛn se: “Una nɔ ɛva rid wetin Devid bin du we in ɛn di man dɛn we de wit am bin angri,
4 we i go insay Gɔd in os ɛn dɛn gi am di bred we dɛn put bifo Gɔd, ɛn i it am ɛn gi sɔm to di man dɛn we bin de wit am, we i bi se nɔbɔdi nɔ gɛt rayt fɔ it am pas di prist dɛn nɔmɔ?”
5 Dɔn i tɛl dɛn se: “Mɔtalman Pikin na Masta fɔ di Sabat.”
6 Wan ɔda sabat de, i go na di sinagɔg* ɛn bigin fɔ tich. Wan man bin de de we in raytan day.*
7 Di Lɔ ticha dɛn ɛn di Faresi dɛn bin de wach Jizɔs gud gud wan fɔ si if i go mɛn pɔsin di Sabat de, so dat dɛn go fɛn we fɔ tɔk se i dɔn du bad.
8 Bɔt Jizɔs bin no wetin dɛn de tink, so i tɛl di man we in an day* se: “Grap, kam tinap midul.” So di man grap ɛn kam tinap de.
9 Nain Jizɔs se: “Lɛ a aks una, i rayt fɔ du gud ɔ fɔ du bad, fɔ sev layf* ɔ fɔ kil insay di Sabat?”
10 We i dɔn luk dɛn ɔl, i tɛl di man se: “Stret yu an.” Di man du am ɛn in an wɛl.
11 Bɔt dɛn vɛks bad bad wan, ɛn dɛn bigin fɔ tɔk bɔt wetin dɛn go du to Jizɔs.
12 Wan de i go ɔp di mawntin fɔ pre, ɛn i pre ol nɛt to Gɔd.
13 We doklin, i kɔl in disaypul dɛn ɛn pik 12 pan dɛn, ɛn i kɔl dɛn apɔsul.
14 I pik Saymɔn we i gi di nem Pita ɛn in brɔda Andru; dɔn i pik Jems, Jɔn, Filip, Batalomi,
15 Matyu, Tɔmɔs, Jems, we na Alfiɔs in pikin, Saymɔn we dɛn de kɔl “di wan we gɛt zil,”
16 Judas, we na Jems in pikin, ɛn Judas Iskariɔt, we ɛp pipul dɛn leta fɔ arɛst Jizɔs.
17 I kam dɔŋ wit dɛn ɛn tinap na wan flat ples. Bɔku bɔku disaypul dɛn bin de de ɛn bɔku bɔku pipul dɛn we kɔmɔt ɔlsay na Judia, Jerusɛlɛm, ɛn nia di si na Taya ɛn Saydɔn kam fɔ lisin to am ɛn fɔ mek i mɛn di sik dɛn we dɛn gɛt.
18 I ivin mɛn di wan dɛn we bin gɛt dimɔn.
19 Ɔl di pipul dɛn bin de tray fɔ tɔch am, bikɔs pawa bin de kɔmɔt pan am ɛn mɛn dɛn ɔl.
20 I luk in disaypul dɛn ɛn bigin fɔ tɔk se:
“Una we po gɛt gladi-at, bikɔs na una gɛt Gɔd in Kiŋdɔm.
21 “Una we angri naw gɛt gladi-at, bikɔs una go satisfay.
“Una we de kray naw gɛt gladi-at, bikɔs una go laf.
22 “Una gɛt gladi-at ɛnitɛm we pipul dɛn et una, drɛb una, trit una bad, ɛn pwɛl una nem bikɔs ɔf mɔtalman Pikin.
23 Una gladi pasmak da tɛm de, bikɔs una gɛt bɔku blɛsin na ɛvin. Na dɛn sem tin ya dɛn gret gret granpa dɛn bin de du to di prɔfɛt dɛn.
24 “Bɔt i go bad fɔ una we jɛntri, bikɔs na wetin una gɛt naw na in nɔmɔ una go gɛt.
25 “I go bad fɔ una we satisfay naw bikɔs una go angri.
“I go bad fɔ una we de laf naw, bikɔs una at go pwɛl ɛn una go kray.
26 “I go bad fɔ una ɛnitɛm we ɔlman de tɔk gud tin bɔt una, bikɔs na dat dɛn gret gret granpa dɛn bin de du to di lay lay prɔfɛt dɛn.
27 “A de tɛl una we de lisin to mi se: Una kɔntinyu fɔ lɛk una ɛnimi dɛn, una du gud to di wan dɛn we et una,
28 una blɛs di wan dɛn we de swɛ una, ɛn una pre fɔ di wan dɛn we nɔ tek una mek natin.
29 We pɔsin slap yu na wan jɔ, tɔn di ɔda jɔ to am; ɛn we pɔsin tek di klos we yu kin wɛr pantap, gi am bak di wan we yu kin wɛr ɔnda.
30 If ɛnibɔdi aks yu fɔ sɔntin, gi am; ɛn we pɔsin tek yu prɔpati, nɔ aks am fɔ am igen.
31 “Wetin una want mek ɔda pipul dɛn du to una, na in una fɔ du to dɛn.
32 “If una lɛk di wan dɛn we lɛk una, us bɛnifit una go gɛt? Ivin sina dɛn lɛk di wan dɛn we lɛk dɛn.
33 Ɛn if una du gud to di wan dɛn we de du gud to una, us bɛnifit una go gɛt? Ivin sina dɛn de du di sem tin.
34 Dɔn if una lɛnt* di wan dɛn we una ɛkspɛkt se go pe una bak, us bɛnifit una go gɛt? Ivin sina dɛn de lɛnt dɛn kɔmpin sina dɛn so dat dɛn go gɛt wetin dɛn lɛnt bak.
35 Bɔt una kɔntinyu fɔ lɛk una ɛnimi dɛn, una du gud ɛn we una lɛnt, una nɔ abop fɔ gɛt ɛnitin bak. We una du dat, una go gɛt bɔku blɛsin, ɛn una go bi pikin dɛn to di Wan we De Pantap Ɔlman, bikɔs i de du gud to di wan dɛn we nɔ gɛt tɛnki ɛn di wan dɛn we wikɛd.
36 Una kɔntinyu fɔ gɛt sɔri-at, jɔs lɛk aw una Papa gɛt sɔri-at.
37 “Pantap dat, una lɛf fɔ jɔj, ɛn Gɔd nɔ go jɔj una; una lɛf fɔ kɔndɛm, ɛn Gɔd nɔ go kɔndɛm una. Una go de fɔgiv, ɛn Gɔd go fɔgiv una.
38 Una go de gi, ɛn pipul dɛn go gi una. Dɛn go put bɔku fɔ una na una klos, dɛn go prɛs am go dɔŋ, shek shek am, bɔt i go stil trowe. Aw una de mɛzhɔ fɔ ɔda pipul dɛn, na so dɛn go mɛzhɔ fɔ una.”
39 Dɔn i gi dɛn wan ɛgzampul: “Blaynman nɔ go ebul de bifo in kɔmpin blaynman fɔ sho am rod, i go ebul? Dɛn ɔl tu go fɔdɔm insay ol, nɔto so?
40 Pɔsin we de lan* nɔ pas in ticha, bɔt ɛnibɔdi we dɛn tich pafɛkt wan go tan lɛk in ticha.
41 So, wetin mek yu de luk di smɔl tik we de na yu brɔda in yay, bɔt yu nɔ de si di bod we de na yu yon yay?
42 Aw yu go tɛl yu brɔda se, ‘Brɔda, alaw mi mek a pul di smɔl tik na yu yay,’ we yu nɔ de si di bod na yu yon yay? Ipokrit! Pul di bod na yu yon yay fɔs, dɔn yu go si klia wan aw fɔ pul di smɔl tik we de na yu brɔda in yay.
43 “Fayn tik nɔ de bia rɔtin frut, ɛn rɔtin tik nɔ de bia fayn frut.
44 Pɔsin go no tik bay di kayn frut we i de bia. Fɔ ɛgzampul, pipul dɛn nɔ de pik fig pan chukchuk, ɔ pik greps pan chukchuk tik.
45 Pɔsin we gud de pul gud tin dɛn na in at, bɔt pɔsin we bad de pul bad tin dɛn na in at; bikɔs na wetin ful-ɔp na pɔsin in at na in i de tɔk.
46 “Wetin mek una de kɔl mi ‘Masta! Masta!’ bɔt una nɔ de du wetin a se?
47 Ɛnibɔdi we kam to mi ɛn yɛri mi wɔd ɛn du am, a go sho una udat i tan lɛk:
48 I tan lɛk wan man we dig dip wan ɛn le in fawndeshɔn pantap rɔk we i de bil in os. We di ples flɔd, di wata na di riva kam wit pawa usay di os de, bɔt i nɔ shek di os bikɔs i rili strɔng.
49 Bɔt ɛnibɔdi we yɛri ɛn nɔ du natin tan lɛk wan man we bil in os ɛn nɔ le fawndeshɔn. We di wata na di riva kam wit pawa usay di os de, di os fɔdɔm wantɛm wantɛm ɛn pwɛl kpatakpata.”
Futnot Dɛn
^ Wit na tin we pipul dɛn de it.
^ Rid Baybul Wɔd dɛn Minin.
^ Ɔ “paralayz.”
^ Ɔ “paralayz.”
^ Ɔ “sol.”
^ Dat na, fɔ lɛnt pɔsin ɛn nɔ aks am fɔ put sɔntin pantap.
^ Ɔ “Disaypul.”
