Matyu 1:1-25
1 Di buk we tɔk bɔt Jizɔs Krays* in istri.* Jizɔs na Devid in pikin ɛn na Ebraam in pikin:
2 Ebraam bɔn Ayzak;Ayzak bɔn Jekɔp;Jekɔp bɔn Juda ɛn in brɔda dɛn;
3 Juda bɔn Pirɛz ɛn Zira, ɛn dɛn mama na Tema;Pirɛz bɔn Ɛzrɔn;Ɛzrɔn bɔn Ram;
4 Ram bɔn Aminadab;Aminadab bɔn Nashɔn;Nashɔn bɔn Salmɔn;
5 Salmɔn bɔn Boaz, ɛn Boaz in mama na Reab;Boaz bɔn Obɛd, ɛn Obɛd in mama na Rut;Obɛd bɔn Jɛsi;
6 Jɛsi bɔn Devid we na kiŋ.Devid bɔn Sɔlɔmɔn, ɛn Sɔlɔmɔn in mama na bin Yuraya in wɛf;
7 Sɔlɔmɔn bɔn Rɛoboam;Rɛoboam bɔn Abayja;Abayja bɔn Esa;
8 Esa bɔn Jɛoshafat;Jɛoshafat bɔn Jɛoram;Jɛoram bɔn Yuzaya;
9 Yuzaya bɔn Jotam;Jotam bɔn Eaz;Eaz bɔn Ɛzikaya;
10 Ɛzikaya bɔn Manasɛ;Manasɛ bɔn Emɔn;Emɔn bɔn Josaya;
11 Josaya bɔn Jɛkonaya ɛn in brɔda dɛn di tɛm we dɛn bin kɛr di Ju dɛn go na Babilɔn bay fos.
12 Afta dɛn kɛr di Ju dɛn go na Babilɔn bay fos, Jɛkonaya bɔn Shialtiɛl;Shialtiɛl bɔn Zɛrubabɛl;
13 Zɛrubabɛl bɔn Abayud;Abayud bɔn Ilayakim;Ilayakim bɔn Ezɔ;
14 Ezɔ bɔn Zedɔk;Zedɔk bɔn Ekim;Ekim bɔn Ilayud;
15 Ilayud bɔn Ɛlieza;Ɛlieza bɔn Matan;Matan bɔn Jekɔp;
16 Jekɔp bɔn Josɛf we na Meri in man ɛn Meri bɔn Jizɔs, we dɛn kɔl Krays.
17 So ɔl di jɛnɛreshɔn dɛn frɔm Ebraam to Devid na 14 jɛnɛreshɔn; frɔm Devid te dɛn kɛr di Ju dɛn go na Babilɔn bay fos na 14 jɛnɛreshɔn; ɛn frɔm we dɛn kɛr di Ju dɛn go na Babilɔn bay fos te Krays in tɛm na 14 jɛnɛreshɔn.
18 Dis na aw dɛn bɔn Jizɔs Krays. We Josɛf ɛngej Jizɔs in mama, we na Meri, fɔ mared am, di oli spirit* mek Meri gɛt bɛlɛ bifo dɛn kam togɛda.
19 Bɔt bikɔs in man, we na Josɛf, na pɔsin we de du wetin rayt, ɛn i nɔ bin want mek Meri shem pan pipul dɛn, i bin want fɔ dayvɔs am sikrit wan.
20 Bɔt afta i dɔn tink bɔt dɛn tin ya, Jiova* in enjɛl apia to am na drim, ɛn tɛl am se: “Josɛf, Devid in pikin, nɔ fred fɔ kɛr yu wɛf we na Meri go na os bikɔs na oli spirit mek i gɛt bɛlɛ.
21 I go bɔn bɔypikin, ɛn yu fɔ gi am di nem Jizɔs,* bikɔs i go pul* in pipul dɛn pan sin.”
22 Ɔl dis bin rili apin fɔ mek wetin Jiova* bin dɔn yuz in prɔfɛt fɔ tɔk kam tru, we i bin se:
23 “Luk! Di vajin go gɛt bɛlɛ ɛn bɔn bɔypikin, ɛn dɛn go gi am di nem Imanwɛl.” We dɛn translet am, i min, “Gɔd De wit Wi.”
24 We Josɛf grap pan slip, i du wetin Jiova* in enjɛl tɛl am fɔ du, ɛn i kɛr in wɛf go na os.
25 Bɔt i nɔ du mama ɛn dadi biznɛs wit am te i bɔn di pikin, ɛn i gi am di nem Jizɔs.
Futnot Dɛn
^ Ɔ “di Mɛsaya; di Wan we Gɔd Anɔynt.”
^ Ɔ “fambul dɛn.”
^ Ɔ “Gɔd in pawa we i de yuz fɔ du wetin i want.” Rid Baybul Wɔd dɛn Minin.
^ Gɔd in nem we na Jiova de insay di vas dɛn na di Kristian Grik Skripchɔ 237 tɛm na dis Baybul. Dis na di fɔs say we i de. Rid Baybul Wɔd dɛn Minin.
^ I tan lɛk di Ibru nem Jɛshua, ɔ Jɔshwa, we min “Na Jiova De Sev.”
^ Insay Grik “sev.”
^ Rid Baybul Wɔd dɛn Minin.
^ Rid Baybul Wɔd dɛn Minin.
