Matyu 20:1-34
20 “Dis na bikɔs di Kiŋdɔm we de na ɛvin tan lɛk di masta na wan os we kɔmɔt ali mɔnin fɔ go fɛn wokman dɛn we i go pe fɔ wok na in vayn gadin.
2 We in ɛn di wokman dɛn dɔn gri se i go pe dɛn wan dinariɔs* fɔ di de, i sɛn dɛn na in vayn gadin.
3 We i go bak bay dɛn nayn oklɔk na mɔnin,* i si ɔda wan dɛn tinap na di makit, we nɔ gɛt wok;
4 ɛn i tɛl dɛn se, ‘Unasɛf go na mi vayn gadin, ɛn a go pe una wetin una fɔ gɛt.’
5 So dɛn go. Dɔn i go bak bay 12 oklɔk santɛm* ɛn bay dɛn 3 oklɔk santɛm* ɛn du di sem tin.
6 Dɔn bay dɛn fayv oklɔk ivintɛm,* i go si ɔda wan dɛn we tinap, ɛn i aks dɛn se, ‘Wetin mek una tinap ya ol de una nɔ gɛt wok?’
7 Dɛn tɛl am se, ‘Na bikɔs nɔbɔdi nɔ tek wi fɔ wok.’ I tɛl dɛn se, ‘Unasɛf go na di vayn gadin.’
8 “We ivintɛm kam, di masta fɔ di vayn gadin tɛl di man we i put in chaj se, ‘Kɔl di wokman dɛn ɛn pe dɛn, dɛn mɔni. Bigin wit di wan dɛn we kam las ɛn ɛnd wit di wan dɛn we kam fɔs.’
9 We di wan dɛn we wok frɔm fayv oklɔk kam, i gi dɛn wan dinariɔs.*
10 So we di fɔs wokman dɛn kam, dɛn tink se dɛn go gɛt mɔ, bɔt dɛnsɛf, na wan dinariɔs* i pe dɛn.
11 We dɛn tek am, dɛn bigin fɔ grɔmbul pan di masta na di os
12 ɛn tɔk se, ‘Dɛn man ya we las kam, wok fɔ wan awa; bɔt stil yu pe dɛn lɛk aw yu pe wi we dɔn wok tranga wan ol de ɔnda di wam wam san!’
13 Bɔt i tɛl wan pan dɛn se, ‘Padi, a nɔ du yu bad. Yu gri fɔ lɛ a pe yu wan dinariɔs,* nɔto so?
14 Tek wetin na yu yon ɛn go. A want fɔ gi di wan dɛn we kam las di sem tin we a gi yu.
15 A nɔ gɛt rayt fɔ du wetin a want wit mi tin dɛn? Ɔ yu* de jɛlɔs bikɔs a du gud tin?’*
16 Na so di pipul dɛn we kam las go de fɔs ɛn di wan dɛn we kam fɔs go de las.”
17 We Jizɔs de go ɔp na Jerusɛlɛm, i kɛr di 12 disaypul dɛn na kɔna ɛn tɛl dɛn se:
18 “Wi de go ɔp na Jerusɛlɛm, ɛn dɛn go an ova mɔtalman Pikin to di edman dɛn fɔ di prist dɛn ɛn di Lɔ ticha dɛn. Dɛn go se i fɔ day,
19 ɛn dɛn go an ova am to pipul dɛn we kɔmɔt na ɔda neshɔn dɛn fɔ lɛ dɛn provok am, bit* am, ɛn kil am pan tik; bɔt i go gɛt layf bak di tɔd de.”
20 Dɔn Zɛbidi in bɔypikin dɛn ɛn dɛn mama kam mit Jizɔs ɛn sho am rɛspɛkt* ɛn aks am fɔ sɔntin.
21 Jizɔs aks am se: “Wetin yu want?” Di uman ansa am se: “Mek lɛ dɛn mi tu bɔypikin ya sidɔm nia yu na yu Kiŋdɔm, wan na yu raytan ɛn wan na yu lɛftan.”
22 Jizɔs tɛl dɛn se: “Una nɔ no wetin una de aks fɔ. Una ebul drink na di kɔp we a de kam drink pan?” Dɛn tɛl am se: “Wi ebul.”
23 I tɛl dɛn se: “Fɔ tru una go drink na mi kɔp, bɔt nɔto mi gɛt di sidɔmples na mi raytan ɛn lɛftan we fɔ mek a gi una. Na di wan dɛn we mi Papa dɔn pripia am fɔ gɛt am.”
24 We di ɔda tɛn disaypul dɛn yɛri dis, dɛn vɛks pan di tu brɔda dɛn.
25 Bɔt Jizɔs kɔl dɛn ɛn se: “Una no se di rula dɛn na di neshɔn dɛn de mek lɛk se dɛn na di pipul dɛn masta, ɛn di wan dɛn we impɔtant de sho se dɛn gɛt pawa oba di pipul dɛn.
26 Bɔt nɔto so una fɔ du; ɛnibɔdi we want fɔ bi di wan we impɔtant pan una na in fɔ bi una savant,
27 ɛn ɛnibɔdi we want fɔ de bifo una, na in fɔ bi una slev.
28 Jɔs lɛk mɔtalman Pikin we nɔ kam fɔ mek pipul dɛn bi in savant, bɔt i kam fɔ bi savant ɛn fɔ gi in layf* as prayz fɔ fri bɔku pipul dɛn.”
29 We dɛn de kɔmɔt na Jɛriko, bɔku bɔku pipul dɛn fala am.
30 Ɛn tu blaynman dɛn we bin sidɔm nia di rod yɛri se Jizɔs de pas, so dɛn ala se: “Masta, Devid in Pikin, sɔri fɔ wi!”
31 Bɔt di pipul dɛn tɔk pan dɛn, ɛn tɛl dɛn mek dɛn sɛt dɛn mɔt; bɔt na di mɔ dɛn ala lawd lawd wan se: “Masta, Devid in Pikin, sɔri fɔ wi!”
32 Na de Jizɔs tinap, i kɔl dɛn, ɛn tɔk se: “Wetin una want mek a du fɔ una?”
33 Dɛn tɛl am se: “Masta, mek lɛ wi si.”
34 Jizɔs sɔri fɔ dɛn ɛn tɔch dɛn yay, ɛn wantɛm wantɛm dɛn bigin fɔ si, ɛn dɛn fala am.
Futnot Dɛn
^ Dis na wan Roman mɔni. Rid Baybul Wɔd dɛn Minin.
^ Insay Grik, “arawnd di tɔd awa.” Dɛn bin de bigin fɔ kɔnt dis tɛm we di san kɔmɔt.
^ Insay Grik, “arawnd di awa we mek siks.”
^ Insay Grik, “arawnd di awa we mek nayn.”
^ Insay Grik, “arawnd di awa we mek 11.”
^ Dis na wan Roman mɔni. Rid Baybul Wɔd dɛn Minin.
^ Dis na wan Roman mɔni. Rid Baybul Wɔd dɛn Minin.
^ Dis na wan Roman mɔni. Rid Baybul Wɔd dɛn Minin.
^ Insay Grik, “yu yay.” Dis de tɔk bɔt wetin di pɔsin want fɔ du.
^ Ɔ “gɛt fri-an.”
^ Rid Baybul Wɔd dɛn Minin.
^ Ɔ “butu bifo am.”
^ Ɔ “sol.”
