Matyu 3:1-17
3 Leta, Jɔn we De Baptayz Pipul Dɛn bigin fɔ prich na di wildanɛs* na Judia.
2 I bin de prich se: “Una ripɛnt, bikɔs di Kiŋdɔm we de na ɛvin dɔn nia.”
3 Infakt, na in prɔfɛt Ayzaya bin tɔk bɔt, we i se: “Pɔsin de tɔk lawd wan na di wildanɛs* se: ‘Rɛdi Jiova* in rod! Klia in rod.’”
4 Jɔn bin de wɛr klos we dɛn mek wit kamɛl ia, ɛn i bin de tay lɛda bɛlt na in midul. Na grasɔpa* ɛn ɔni* i bin de it.
5 Dɔn di pipul dɛn na Jerusɛlɛm ɛn ɔlsay na Judia, ɛn ɔl di eria dɛn we de nia di Jɔdan bin de go mit am,
6 ɛn i bin de baptayz dɛn* na di Jɔdan Riva, ɛn dɛn bin de kɔnfɛs ɔl dɛn sin opin wan.
7 We i si bɔku Faresi ɛn Sadyusi dɛn de kam usay i de baptayz pipul dɛn, i tɛl dɛn se: “Una dɛn vaypa* pikin dɛn, udat dɔn wɔn una fɔ tray fɔ avɔyd di pɔnishmɛnt we Gɔd go briŋ?
8 Una du wetin de sho se una dɔn ripɛnt.
9 Una nɔ tɛl unasɛf se, ‘Ebraam na wi papa,’ bikɔs a de tɛl una se Gɔd ebul mek dɛn ston ya bi Ebraam in pikin dɛn.
10 Di aks ɔlrɛdi de nia di tik dɛn rut. So dɛn go kɔt ɛni tik we nɔ de bia fayn frut ɛn ib am na faya.
11 Mi de baptayz una wit wata bikɔs una ripɛnt, bɔt di wan we de kam afta mi strɔng pas mi, ɛn a nɔ fit fɔ pul in sandal. Da wan de go baptayz una wit oli spirit ɛn faya.
12 I ol sɔntin na in an fɔ pul chafchaf. I go rili klin di say we i de pul di chafchaf. Dɔn i go put in wit* insay di stɔ, bɔt i go bɔn di chafchaf na faya we nɔ de ɔt.”
13 Dɔn Jizɔs kɔmɔt na Galili ɛn kam na di Jɔdan to Jɔn fɔ lɛ i baptayz am.
14 Bɔt Jɔn tray fɔ stɔp am ɛn tɔk se: “Na yu fɔ baptayz mi, wetin mek yu de kam to mi?”
15 Jizɔs tɛl am se: “Lɛ i apin so dis tɛm, bikɔs na dis we i fayn fɔ lɛ wi du ɔl wetin Gɔd want.” Dɔn i nɔ tray fɔ stɔp am igen.
16 Afta Jizɔs baptayz, i kɔmɔt insay di wata wantɛm wantɛm; ɛn ɛvin opin, ɛn i si Gɔd in spirit de kam dɔŋ lɛk dɔv pan am.
17 Dɔn wan vɔys frɔm ɛvin se: “Na mi Pikin dis, di wan we a rili lɛk, ɛn we a gladi fɔ.”
Futnot Dɛn
^ I kin min ples we wanwan pipul dɛn ɔ plant de. Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “lokɔs.”
^ Dat na, ɔni we de na bush.
^ Ɔ “put dɛn ɔnda; mek dɛn go dɔŋ.”
^ Ɔ “bad bad snek.”
^ Wit na tin we pipul dɛn de it.
