Sam 102:1-28
Wan prea we pɔsin we dɛn de sɔprɛs bin pre di tɛm we in at pwɛl* ɛn we i tɛl Jiova di tin dɛn we de mɔna am.
102 E Jiova, duya lisin to mi prea;Yɛri di kray we a de kray to yu fɔ ɛp.
2 Nɔ ayd yu fes pan mi di tɛm we a gɛt trɔbul.
Duya lisin to mi;Ansa mi kwik kwik wan we a kɔl.
3 Mi layf de go lɛk smok,Ɛn mi bon dɛn de bɔn lɛk wud na fayasay.
4 Mi at dɔn tan lɛk gras we dɔn wida ɛn dray,A dɔn fɔgɛt fɔ it mi fud.
5 Mi bon dɛn fasin pan mi flɛsh,Bikɔs a de pini lawd wan.
6 A fiba pɛlikan bɔd na di wildanɛs;*A tan lɛk smɔl awl na di say dɛn we dɔn pwɛl pwɛl.
7 A nɔ ebul slip;A tan lɛk bɔd we na in wangren de pantap ruf.
8 Ol de mi ɛnimi dɛn de provok mi.
Di wan dɛn we de laf mi de yuz mi nem fɔ swɛ.
9 A de it ashis lɛk se na mi fud,Ɛn mi drink miks wit kray wata,
10 Yu es mi ɔp jɔs fɔ trowe mi,Bikɔs ɔf yu wamat ɛn yu vɛksteshɔn.
11 Mi layf tan lɛk shado we de fed,Ɛn a de wida lɛk gras.
12 Bɔt yu, E Jiova, go de sote go,Ɛn yu nem* go de sote go.
13 Fɔ tru, yu go grap ɛn sɔri fɔ Zayɔn.Di tɛm dɔn rich fɔ lɛ yu sho am yu sɔri-at;Di tɛm we yu sɛt dɔn rich.
14 Yu savant dɛn gladi fɔ in ston dɛn,Ɛn dɛn ivin lɛk in dɔst.
15 Di neshɔn dɛn go fred Jiova in nem,Ɛn ɔl di kiŋ dɛn na di wɔl go fred yu glori.
16 Jiova go bil Zayɔn bak;I go mek ɔlman no aw i pawaful.
17 I go pe atɛnshɔn to di pre we di po wan dɛn de pre;I go yɛri dɛn prea.
18 Dɛn rayt dis fɔ di jɛnɛreshɔn tumara bambay,So dat di pipul dɛn we dɛn nɔ bɔn yet go prez Ja.
19 Jiova de wach di wɔl frɔm ɛvin,I de luk dɔŋ frɔm in oli ples we de rayt ɔp,
20 Fɔ yɛri di pini we prizina de pini,Fɔ fri di wan dɛn we dɛn dɔn sɛntɛns fɔ day,
21 So dat dɛn go tɔk bɔt Jiova in nem na Zayɔn,Ɛn dɛn go prez am na Jerusɛlɛm,
22 Di tɛm we di pipul dɛn ɛn kiŋdɔm dɛnGɛda togɛda fɔ sav Jiova.
23 I mek a nɔ gɛt trɛnk di tɛm we a yɔŋ;I kɔt mi layf shɔt.
24 A tɔk se: “E mi Gɔd,Nɔ dɔnawe wit mi di tɛm we a yɔŋ,Yu we de kɔntinyu fɔ liv sote go.
25 Trade trade, na yu le di wɔl in fawndeshɔn dɛn,Ɛn yu yuz yu an fɔ mek ɛvin.
26 Dɛn go day, bɔt yu go kɔntinyu fɔ de;Jɔs lɛk klos we de pwɛl, dɛn go day.
Yu go chenj dɛn jɔs lɛk klos, ɛn dɛn go day.
27 Bɔt yu na di sem, ɛn yu go de sote go.
28 Yu savant dɛn pikin dɛn go de sef wan,Ɛn dɛn pikin dɛn go tinap tranga wan bifo yu.”
