Sam 35:1-28
Devid in siŋ.
35 E Jiova, duya tɔk fɔ mi we pipul dɛn de agens mi;Fɛt di wan dɛn we de fɛt mi.
2 Tek yu smɔl shild ɛn yu big shild,Duya, grap ɛn fɛt fɔ mi.
3 Es yu spia ɛn yu aks we yu de yuz fɔ fɛt wɔ
Agens di wan dɛn we de rɔnafta mi.
Tɛl mi se: “Na mi go sev yu.”
4 Lɛ di wan dɛn we want fɔ kil mi shem ɛn disgres.
Lɛ di wan dɛn we de plan fɔ dɔnawe wit mi rɔnawe bikɔs ɔf shem.
5 Lɛ dɛn tan lɛk chafchaf we briz de kɛr go;Lɛ Jiova in enjɛl drɛb dɛn.
6 Lɛ di say we dɛn de pas dak ɛn slipulWe Jiova in enjɛl de rɔnafta dɛn.
7 Dɛn dɔn ayd nɛt fɔ kech mi fɔ no rizin;Dɛn dɔn dig ol fɔ mi fɔ no rizin.
8 Lɛ trɔbul mit dɛn di tɛm we dɛn nɔ de ɛkspɛkt;Lɛ di nɛt we dɛn ayd kech dɛn;Lɛ dɛn fɔdɔm insay de ɛn day.
9 Bɔt a go gɛt gladi-at bikɔs ɔf Jiova;A go gladi fɔ di tin dɛn we i du fɔ sev mi.
10 Ɔl mi bon dɛn go tɔk se:
“E Jiova, udat tan lɛk yu?
Yu de sev di wan dɛn we nɔ gɛt pɔsin fɔ ɛp dɛnFrɔm di wan dɛn we strɔng pas dɛn,
Yu de sev di wan dɛn we nɔ gɛt pɔsin fɔ ɛp dɛn ɛn di po wan dɛn
Frɔm di wan dɛn we de tek sɔntin na dɛn an.”
11 Witnɛs dɛn we de tɔk lay lay tin dɛn bin kam to mi,Fɔ aks mi bɔt tin dɛn we a nɔ no natin bɔt.
12 Dɛn de yuz bad tin fɔ pe mi fɔ di gud we a du,Dɛn de mek a fil lɛk se a gɛt bɛrin.
13 Bɔt we dɛn sik, a de wɛr klos we pɔsin de wɛr we in at pwɛl;A de put misɛf dɔŋ bay we a de fast.Ɛn we mi prea nɔ gɛt ansa,
14 A kin waka de kray lɛk se a de kray fɔ mi padi ɔ mi brɔda;A kin butu mi ed wit pwɛlat lɛk pɔsin we de kray fɔ in mama.
15 Bɔt we a fɔdɔm, dɛn gladi ɛn gɛda togɛda;Dɛn gɛda togɛda fɔ kil mi na ambush;Dɛn chɛr chɛr mi, ɛn dɛn nɔ sɛt dɛn mɔt.
16 Pipul dɛn we nɔ gɛt wan rɛspɛkt fɔ Gɔd de provok mi,Dɛn de gren dɛn tit pan mi.
17 E Jiova, aw lɔng yu go jɔs de luk?
Sev mi frɔm dɛn atak,Sev mi frɔm yɔŋ layɔn dɛn.
18 Da tɛm de, a go tɛl yu tɛnki na di big kɔngrigeshɔn;A go prez yu usay bɔku bɔku pipul dɛn de.
19 Nɔ mek di wan dɛn we dɔn bi mi ɛnimi fɔ no rizinGladi bikɔs ɔf wetin de apin to mi;
Nɔ mek di wan dɛn we et mi fɔ no rizin luk mi badyay.
20 Dɛn nɔ de tɔk wɔd dɛn we de mek pis de,Bɔt dɛn de plan lay lay tin dɛn agens di wan dɛn we lɛk pis na di land.
21 Dɛn opin dɛn mɔt big fɔ tɔk se a dɔn du bad.Dɛn se: “Nain dat! Wi dɔn si am.”
22 E Jiova, yu dɔn si wetin apin, nɔ sɛt mɔt.
E Jiova, nɔ go fa frɔm mi.
23 Duya grap ɛn tɔk fɔ mi,Jiova, mi Gɔd, fɛt mi kes.
24 E Jiova mi Gɔd, jɔj mi akɔdin to di we aw yu de du wetin rayt;Nɔ mek dɛn gladi bikɔs ɔf wetin de apin to mi.
25 Lɛ dɛn nɔ ɛva tɛl dɛnsɛf se: “Nain dat! Wi dɔn gɛt wetin wi bin want.”
Lɛ dɛn nɔ ɛva tɔk se: “Wi dɔn dɔnawe wit am.”
26 Lɛ ɔl di wan dɛn we de gladi bikɔs bad tin mit mi, shem ɛn disgres;Lɛ di wan dɛn we fil se dɛn bɛtɛ pas mi, shem ɛn disgres.
27 Bɔt lɛ di wan dɛn we de gladi bikɔs a de du wetin rayt, ala wit gladi-at;Lɛ dɛn de tɔk ɔltɛm se:
“Lɛ Jiova we de gladi, bikɔs in savant dɛn gɛt pis, gɛt ɔnɔ.”
28 Da tɛm de, a go tɔk bɔt* ɔl di tin dɛn we yu de du we rayt,Ɛn a go prez yu ol de.
Futnot Dɛn
^ Ɔ “go tink gud gud wan bɔt.”
