Afta 400 ia we dɛn bin dɔn fɔ bil di wɔl dɛn bak na Jerusɛlɛm, wan prist we nem Zɛkaraya ɛn in wɛf, Ilizabɛt, bin de liv nia di siti. Dɛn bin dɔn mared fɔ lɔng tɛm bɔt dɛn nɔ gɛt pikin dɛn. Wan de, we Zɛkaraya de bɔn insɛns na di tabanakul, enjɛl Gebrɛl apia to am. Zɛkaraya fred, bɔt enjɛl Gebrɛl tɛl am se: ‘Nɔ fred. A kam wit gud nyuz fɔ yu frɔm Jiova. Yu wɛf, Ilizabɛt, go bɔn bɔypikin ɛn in nem go bi Jɔn. Jiova dɔn pik Jɔn fɔ du wan spɛshal wok.’ Zɛkaraya aks di enjɛl se: ‘Aw a go biliv wetin yu se? Mi ɛn mi wɛf dɔn ol fɔ bɔn pikin.’ Enjɛl Gebrɛl tɛl am se: ‘Na Gɔd sɛn mi fɔ kam gi yu dis nyuz. Bɔt bikɔs yu nɔ biliv mi, yu nɔ go ebul fɔ tɔk te Ilizabɛt bɔn di pikin.’

Zɛkaraya bin de na di tabanakul fɔ lɔng tɛm pas aw i kin de de. We i kɔmɔt insay di tabanakul, di pipul dɛn we de wet na do bin want fɔ no wetin apin. Zɛkaraya nɔ bin ebul fɔ tɔk. I bin ebul fɔ mek sayn dɛn nɔmɔ wit in an. So di pipul dɛn kam fɔ no se Zɛkaraya dɔn gɛt mɛsej frɔm Gɔd.

Afta sɔm tɛm, Ilizabɛt gɛt bɛlɛ ɛn bɔn bɔypikin, jɔs lɛk aw di enjɛl bin tɔk. In padi ɛn in fambul dɛn kam fɔ si di yɔŋbebi. Dɛn bin rili gladi fɔ am. Ilizabɛt tɔk se: ‘Wi go kɔl am Jɔn.’ Dɛn tɔk se: ‘Nɔbɔdi nɔ de na una famili we nem Jɔn. Na fɔ gi am in papa in nem Zɛkaraya.’ Bɔt Zɛkaraya rayt dɛn wɔd ya se: ‘Di pikin in nem na Jɔn.’ Na da tɛm de Zɛkaraya bigin fɔ tɔk bak! Ɔlman na Judia bin no bɔt di pikin, ɛn dɛn bin de wɔnda se: ‘Uskayn pikin i go bi we i big?’

Dɔn oli spirit kam pan Zɛkaraya. I tɔk wan prɔfɛsi se: ‘Lɛ ɔlman prez Jiova. I bin prɔmis Ebraam se i go sɛn di Mɛsaya we go kam sev wi. Jɔn go bi prɔfɛt, ɛn na in go pripia di rod fɔ di Mɛsaya.’

 Wan spɛshal tin apin bak to Ilizabɛt in fambul we nem Meri. Lɛ wi tɔk bɔt dis na di nɛks lɛsin.