Wan siti bin de nia Bebɛl we dɛn kɔl Ɔ usay pipul dɛn bin de wɔship bɔku lay lay gɔd dɛn, dɛn nɔ bin de wɔship Jiova. Bɔt wan man bin de na Ɔ we na in nɔmɔ bin de wɔship Jiova. In nem na Ebraam.

Jiova bin tɛl Ebraam se: ‘Lɛf yu os ɛn yu fambul dɛn ɛn go na wan land we a go sho yu.’ Dɔn Gɔd prɔmis am se: ‘Yu go bi wan big neshɔn, ɛn a go du gud tin dɛn fɔ bɔku pipul dɛn ɔlsay na di wɔl bikɔs ɔf yu.’

Ebraam nɔ bin sabi usay Jiova de sɛn am, bɔt i abop pan Jiova. So Ebraam, in wɛf Sera, in papa we nem Tira, ɛn in brɔda in bɔypikin we nem Lɔt bin obe, pak pak dɛn tin dɛn ɛn bigin fɔ travul.

 Ebraam bin ol 75 ia we in ɛn in famili rich na di land we Jiova want dɛn fɔ si. Di land in nem na Kenan. Na de Gɔd tɔk wit Ebraam ɛn prɔmis am se: ‘A go gi yu pikin dɛn ɔl dis land we yu de si.’ Bɔt Ebraam ɛn Sera bin dɔn ol ɛn dɛn nɔ bin bɔn pikin dɛn. So aw Jiova go mek wetin i dɔn prɔmis kam tru?