Di tɛn trayb kiŋdɔm na Izrɛl bin gɛt bɔku bad kiŋ dɛn, bɔt Eab bin bad pas dɛn ɔl. I bin mared wan wikɛd uman we de wɔship Beal. In nem na Jezibɛl. Eab ɛn Jezibɛl bin mek Beal wɔship de ɔlsay na di land, ɛn dɛn bin de kil Jiova in prɔfɛt dɛn. Wetin Jiova bin du? I bin sɛn prɔfɛt Ilayja fɔ go gi wan mɛsej to Eab.

Ilayja bin tɛl Kiŋ Eab se bikɔs i de du bad bad tin dɛn, no ren nɔ go kam na Izrɛl. I pas tri ia, no plant nɔ bin de gro ɛn di pipul dɛn bin angri. Leta Jiova bin sɛn Ilayja to Eab bak. Di kiŋ tɔk se: ‘Yu na pɔsin we de kɔz trɔbul! Na yu de mek ɔl dɛn tin dɛn ya de apin.’ Ilayja bin ansa am se: ‘Nɔto mi mek ren nɔ de kam. Na yu mek dis de apin bikɔs una de wɔship Beal. Wi go mek wan tɛst. Gɛda di pipul dɛn ɛn ɔl di Beal prɔfɛt dɛn mek dɛn kam na Mawnt Kamɛl.’

Di pipul dɛn bin gɛda na di mawntin. Ilayja bin tɔk se: ‘Una mekɔp una maynd. If Jiova na di tru Gɔd, una fala am. If Beal na di tru gɔd, una fala am. Mek wi du dis tɛst fɔ no udat na di tru Gɔd. Di 450 Beal prɔfɛt dɛn fɔ mek sakrifays ɛn pre to dɛn gɔd ɛn misɛf go mek mi yon sakrifays ɛn pre to Jiova. Di wan we yuz faya fɔ ansa na di tru Gɔd.’ Di pipul dɛn gri.

Di Beal prɔfɛt dɛn mek dɛn sakrifays. Frɔm mɔnin te ivintɛm dɛn bin de kɔl dɛn gɔd se: ‘O Beal, ansa wi!’ We Beal nɔ ansa, Ilayja provok am. I tɔk se: ‘Una ala lawd lawd wan. Sɔntɛm i dɔn slip ɛn pɔsin nid fɔ wek am.’ Di Beal prɔfɛt dɛn bin kɔntinyu fɔ kɔl dɛn gɔd te ivintɛm. Bɔt stil, Beal nɔ ansa dɛn.

Ilayja put in sakrifays na di ɔlta ɛn tɔn bɔku wata pan am. Dɔn i pre se: ‘O Jiova, duya mek lɛ di pipul dɛn no se yu na di tru Gɔd.’ Wantɛm wantɛm, Jiova bin sɛn faya fɔ bɔn di sakrifays. Di pipul dɛn ala se: ‘Jiova na  di tru Gɔd!’ Ilayja tɔk se: ‘Una nɔ gri mek di Beal prɔfɛt dɛn rɔnawe!’ Da de de, dɛn kil di 450 Beal prɔfɛt dɛn.

We Ilayja si wan smɔl klawd apia oba di si, i tɛl Eab se: ‘Wan big big briz go bigin fɔ blo. Tek yu chariɔt ɛn go na os.’ Di klawd dak, big briz blo, ɛn big big ren bigin fɔ kam. Faynali, plant dɛn bigin fɔ gro bak. Kwik kwik wan, Eab rɔn wit in chariɔt. Jiova ɛp Ilayja fɔ rɔn pas di chariɔt! Bɔt Ilayja in prɔblɛm dɛn ɔl bin dɔn dɔn? Lɛ wi si.