Di Asirian sojaman dɛn bin dɔn tek ova di tɛn trayb kiŋdɔm na Izrɛl. Naw, Sinakɛrib we na di kiŋ na Asiria bin want fɔ tek di tu trayb kiŋdɔm na Juda. I bigin fɔ tek di siti dɛn na Juda wan bay wan. Bɔt di siti we i bin rili want na Jerusɛlɛm. Bɔt wan tin we i nɔ bin no na dat Jiova bin de protɛkt Jerusɛlɛm.

Ɛzikaya, we na bin di kiŋ na Juda, pe Sinakɛrib bɔku mɔni fɔ mek i nɔ go atak Juda. Pan ɔl we Sinakɛrib bin tek di mɔni we dɛn gi am, i stil sɛn in pawaful sojaman dɛn fɔ go atak Jerusɛlɛm. Di pipul dɛn na di siti bin de fred bikɔs di Asirian sojaman dɛn bin jɔs de kam nia dɛn. Dɔn Ɛzikaya tɛl di pipul dɛn se: ‘Una nɔ fred. Di Asirian dɛn gɛt trɛnk, bɔt Jiova go mek wi gɛt trɛnk pas dɛn.’

Sinakɛrib sɛn di lida fɔ in mɛsenja dɛn fɔ go provok di pipul dɛn na Jerusɛlɛm. Di lida fɔ di mɛsenja dɛn bin de na do na di siti de ala se: ‘Jiova nɔ go ebul fɔ ɛp una. Una nɔ gri lɛ Ɛzikaya ful una. No gɔd nɔ de we go ebul fɔ protɛkt una frɔm wi.’

Ɛzikaya aks Jiova fɔ tɛl am wetin fɔ du. Jiova ansa am se: ‘Nɔ fred bikɔs ɔf wetin di lida fɔ di mɛsenja dɛn dɔn tɔk. Sinakɛrib nɔ go tek Jerusɛlɛm.’ Afta dat, Sinakɛrib sɛn sɔm lɛta dɛn to Ɛzikaya. I bin rayt na di lɛta dɛn se: ‘Jɔs giv ɔp, Jiova nɔ go ebul fɔ sev yu.’ Ɛzikaya pre se: ‘Duya, Jiova, sev wi so dat ɔlman go no se na yu na di wangren tru Gɔd.’ Jiova tɛl am se: ‘Di kiŋ na Asiria nɔ go kam na Jerusɛlɛm. A go protɛkt mi siti.’

Sinakɛrib bin shɔ se i nɔ go te igen Jerusɛlɛm go bi in yon. Bɔt wan nɛt, Jiova sɛn wan enjɛl fɔ go usay di sojaman dɛn bin kamp. Di enjɛl kil 185,000 sojaman dɛn! Sinakɛrib lɔs ɔl in sojaman dɛn we bin rili gɛt  trɛnk. I nɔ bin ebul du ɛnitin bikɔs dɛn bin dɔn win am. Jiova bin protɛkt Ɛzikaya ɛn Jerusɛlɛm, jɔs lɛk aw i bin dɔn prɔmis. If yu bin de na Jerusɛlɛm, yu bin fɔ abop pan Jiova?