WETIN difrɛn na dis pikchɔ? Na di pipul dɛn we de de. Dɛn na di fɔs man ɛn uman. Udat mek dɛn? Na Gɔd mek dɛn. Yu sabi Gɔd in nem? Na in nem Jiova. Di man nem Adam ɛn di uman nem Iv.

Aw Jiova Gɔd mek Adam? I yuz dɔti na grɔn fɔ mek Adam in bɔdi. Dɔn Gɔd blo na Adam in nos, ɛn Adam gɛt layf.

Jiova Gɔd gi Adam wok fɔ du. I tɛl Adam fɔ gi nem to ɔl di difrɛn animal dɛn. Adam go mɔs dɔn de luk di animal dɛn fɔ lɔng tɛm fɔ no di rayt nem we i fɔ gi dɛn. We Adam bin de gi di animal dɛn nem, i notis sɔntin. Yu no wetin i notis?

Di animal dɛn ɔl bin de tu tu; man ɛn uman. Papa ɛlifant ɛn mama ɛlifant bin de, papa layɔn ɛn mama layɔn bin de. Bɔt na Adam in wan bin de. So Jiova mek Adam slip dip dip wan. Dɔn, i tek wan bon na Adam in sayd. Jiova yuz dis bon ya fɔ mek wan uman fɔ Adam. Na dis uman ya bi Adam in wɛf.

Adam bin gladi bad bad wan! Yu nɔ tink se Iv insɛf go mɔs dɔn gladi fɔ de na dis fayn gadin? Naw, dɛn tu go ebul bɔn pikin dɛn ɛn de togɛda wit gladi at.

Jiova bin want lɛ Adam ɛn Iv de sote go. I bin want lɛ dɛn mek di wan ol wɔl fayn lɛk di gadin na Idɛn. Adam ɛn Iv go mɔs dɔn gladi we dɛn bin de tink bɔt aw dɛn go du dat! Yu bin fɔ lɛk fɔ ɛp dɛn fɔ mek di wɔl bi wan fayn gadin, nɔto so? Bɔt Adam ɛn Iv dɛn gladi at nɔ las. Lɛ wi si wetin mek dis bi.