NOA bin de wit in wɛf ɛn in tri bɔy pikin dɛn. In pikin dɛn na Shɛm, Am ɛn Jefɛt. Ɔl dɛn pikin ya bin gɛt dɛn yon wɛf. So na et pipul dɛn bin de na Noa in famili.

Gɔd tɛl Noa fɔ du sɔntin we i nɔ wan de du yet. I tɛl am fɔ bil wan big big bot we dɛn kɔl ak. Di ak big lɛk dɛn big ship we de na wata. Ɛn i tan lɛk bɔks we big ɛn lɔng. Gɔd tɛl am se: ‘Mek di ak lɛk tri stori os ɛn mek rum dɛn insay de.’ Di rum dɛn na fɔ Noa ɛn in famili, ɛn fɔ put di animal dɛn ɛn di tin dɛn we dɛn ɔl go de it.

Gɔd tɛl Noa fɔ bil di ak fayn fɔ lɛ wata nɔ go insay. Gɔd tɛl am se: ‘A go mek ebi ren kam, we go pul ɔl di bad pipul dɛn na di wɔl. Ɛnibɔdi we nɔ de insay di ak go day.’

Noa ɛn in pikin dɛn du wetin Jiova tɛl dɛn, ɛn dɛn bigin bil di ak. Bɔt di ɔda pipul dɛn bin de laf dɛn. Dɛn bin jɔs de du bad. We Noa bin de tɛl di pipul dɛn wetin Gɔd de kam du, dɛn nɔ biliv am.

Noa ɛn in famili bin te fɔ bil di ak bikɔs i bin big. We dɛn dɔn fɔ bil di ak, Gɔd tɛl Noa fɔ kɛr di animal dɛn insay. Gɔd tɛl am fɔ kɛr sɔm animal dɛn tu tu; man ɛn uman. Ɛn Noa fɔ kɛr sɛvin sɛvin pan di ɔda animal dɛn. Gɔd tɛl Noa bak fɔ kɛr ɔl di difrɛn difrɛn bɔd dɛn. Noa du ɔl wetin Gɔd se.

Afta ɔl dis, Noa ɛn in famili go insay di ak. Dɔn Gɔd lɔk di domɔt. Noa ɛn in famili bin de wet fɔ si if di ren go kam. Aw yu bin fɔ fil if yu bin de insay di ak wit Noa ɛn in famili? Yu fil se di ebi ren go ɛva kam lɛk aw Gɔd bin dɔn tɔk?