YU DE fil sɔri fɔ dis man we nɔ wɛl? Na in nem Job, ɛn na in wɛf wit di uman we tinap nia am. Yu no wetin di uman de tɛl Job? I de tɛl Job se: ‘Kɔs Gɔd ɛn day.’ Lɛ wi si wetin mek i tɛl Job fɔ du dat, ɛn wetin mek Job de sɔfa so.

Job na bin man we fetful. I bin de du wetin Jiova want ɔltɛm. I bin de na wan tɔŋ we dɛn de kɔl Ɔz, ɛn dis tɔŋ bin de nia Kenan. Jiova bin lɛk Job bad bad wan, bɔt ɔda pɔsin bin de we et am. Yu no udat na da pɔsin de?

Na Setan. Mɛmba se, na Setan na di bad enjɛl we et Jiova. I bin ebul mek Adam ɛn Iv du wetin Jiova nɔ want. Ɛn i tink se i go ebul mek ɔlman du wetin Jiova nɔ want. Yu tink se i bin ebul fɔ du so? Nɔ, i nɔ bin ebul. Jɔs tink bɔt di bɔku fetful man ɛn uman dɛn we wi dɔn lan bɔt. Ɔmɔs pan dɛn yu mɛmba?

Afta Jekɔb ɛn Josɛf day na Ijipt, na Job na bin di pɔsin we fetful to Jiova pas ɔlman na di wɔl. Jiova bin want lɛ Setan no se i nɔ go ebul mek ɔlman du bad, so i tɛl Setan se: ‘Luk Job. Yu si aw i fetful to mi!’

Bɔt Setan agyu Jiova se: ‘I fetful to yu bikɔs yu de blɛs am, ɛn i gɛt bɔku fayn fayn tin dɛn. Bɔt if yu tek ɔl wetin i gɛt, i go kɔs yu.’

So Jiova se: ‘Du ɛnitin we yu want fɔ du to am. Tek ɔl wetin i gɛt. Du ɛnikayn bad tin we yu want fɔ du to Job. Wi go si if i go kɔs mi. Bɔt mek shɔ se yu nɔ kil am.’

Fɔs, Setan mek dɛn tif Job in kaw ɛn in kamɛl dɛn, ɛn dɛn kil in ship dɛn. Dɔn, Setan kil Job in tɛn pikin dɛn wit ebi briz. Afta dat, Setan mek Job gɛt dis bad sik. Job bin sɔfa bad. Na dat mek in wɛf tɛl am se mek i kɔs Gɔd ɛn day. Bɔt Job nɔ du am. Pantap dat, tri lay lay padi dɛn kam to Job ɛn tɛl am se na bikɔs i bin de du bad mek dɛn bad bad tin ya de apin to am so. Pan ɔl dat, Job bin stil fetful to Gɔd.

Dis mek Jiova gladi bad bad wan. Leta, Jiova blɛs Job lɛk aw yu de si na di pikchɔ. I mek Job wɛl. Dɔn, Job gɛt tɛn fayn fayn pikin dɛn bak. Ɛn in kaw, ship ɛn kamɛl dɛn bɔku pas di wan dɛn we i bin gɛt fɔs.

Yusɛf fɔ fetful to Jiova ɔltɛm lɛk Job. If yu du so, Gɔd go blɛs yu. Ɛn yu go de sote go we di wan ol wɔl go dɔn fayn lɛk di gadin we bin de na Idɛn.