JOSƐF bin want no if in tɛn big brɔda dɛn stil bad ɛn if dɛn stil gɛt bad at. So i tɛl dɛn se: ‘Una na bad pipul dɛn. Una kam luk wi kɔntri fɔ no if wi nɔ ebul fɛt.’

Bɔt dɛn se: ‘Nɔ sa, wi nɔto bad pipul dɛn. Wi na gud pipul dɛn. Wi ɔl na brɔda dɛn. Na wi 12 dɛn bɔn. Bɔt wan dɔn day, ɛn di las wan de na os wit wi papa.’

Josɛf mek lɛk se i nɔ biliv dɛn. I put di wan we nem Simyɔn na jel, ɛn i mek di ɔda wan dɛn go wit tin fɔ it na dɛn os. Bɔt i tɛl dɛn se: ‘We una de kam bak, una fɔ kam wit una las brɔda.’

We dɛn rich na Kenan, dɛn tɛl dɛn papa ɔltin we apin. Jekɔb in at pwɛl. I kray se: ‘Josɛf dɔn day, ɛn naw dɛn dɔn ol Simyɔn. A nɔ de gri mek una go wit Bɛnjamin.’ Bɔt we ɔl wetin dɛn gɛt fɔ it bigin dɔn, Jekɔb mek dɛn go wit Bɛnjamin na Ijipt, fɔ go bay tin fɔ it.

We Josɛf si in brɔda dɛn de kam, i gladi bad fɔ si Bɛnjamin we na in smɔl brɔda. Bɔt in brɔda dɛn nɔ stil no se dis bigman we dɛn de kam to, na Josɛf. Josɛf du sɔntin to in tɛn big brɔda dɛn fɔ no if dɛn dɔn chenj.

I mek in savant dɛn ful-ɔp in brɔda dɛn bag dɛn wit tin fɔ it. Bɔt i mek dɛn ayd in silva kɔp insay Bɛnjamin in bag. Dɔn in brɔda dɛn bigin go bak na Kenan. We dɛn dɔn go fa smɔl, Josɛf sɛn in savant dɛn fɔ rɔnata dɛn. We dɛn mit Josɛf in brɔda dɛn na rod, di savant dɛn aks dɛn se: ‘Wetin mek una tif wi masta in silva kɔp?’

Josɛf in brɔda dɛn ɔl se: ‘Wi nɔ tif in kɔp o! If una fɛn di kɔp na ɛnibɔdi in bag, una kil di pɔsin.’

So di savant dɛn bigin fɔ wach insay dɛn bag dɛn wan bay wan. Jɔs lɛk aw yu de si na di pikchɔ, na insay Bɛnjamin in bag dɛn fɛn di kɔp. Di savant dɛn se: ‘Una ɔl go na os, bɔt wi de kɛr Bɛnjamin go na Ijipt.’ Wetin di tɛn big brɔda dɛn go du naw?

Dɛn ɔl go wit Bɛnjamin na Josɛf in os. Josɛf tɛl in brɔda dɛn se: ‘Una ɔl go, bɔt Bɛnjamin go de naya, ɛn bi mi slev.’

Juda tɔk se: ‘If a go na os, ɛn a nɔ go wit di bɔbɔ, mi papa go day bikɔs i lɛk am bad bad wan. So duya, mek a bi yu slev, bɔt lɛ di bɔbɔ go na os.’

Josɛf no se fɔ tru, in brɔda dɛn dɔn chenj ɛn dɛn nɔ gɛt bad at igen. Lɛ wi si wetin Josɛf du.