LUK wetin de apin naya! Mozis de pɔynt in stik oba di wata we dɛn kɔl di Rɛd Si. Di wan dɛn we sev wit Mozis, na di Izrɛlayt dɛn. Bɔt na Fɛro ɛn ɔl in sojaman dɛn de drawn so insay di wata. Lɛ wi si aw ɔl dis apin.

Wi bin dɔn lan se, Fɛro tɛl di Izrɛlayt dɛn fɔ kɔmɔt na Ijipt afta Gɔd mek di las bad tin apin to di Ijipshian dɛn. Na bin lɛk 600,000 Izrɛlayt man dɛn so ɛn bɔku uman ɛn pikin dɛn bin kɔmɔt na Ijipt. Ɛn ɔda pipul dɛn bak we nɔto Izrɛlayt dɛn bɔt biliv Gɔd, bin go wit di Izrɛlayt dɛn. Dɛn ɔl go wit dɛn ship, got ɛn kaw dɛn.

Bifo di Izrɛlayt dɛn go, dɛn aks di Ijipshian dɛn fɔ klos ɛn fɔ ɔda tin dɛn we dɛn mek wit gold ɛn silva. Di las bad tin we apin na Ijipt mek di Ijipshian dɛn fred, so dɛn gi di Izrɛlayt dɛn ɛnitin we dɛn aks fɔ.

We di Izrɛlayt dɛn dɔn waka fɔ sɔm tɛm, dɛn rich na di Rɛd Si. We dɛn rich de, na de dɛn blo smɔl. Da sem tɛm de, Fɛro ɛn in pipul dɛn bigin fil bad fɔ we dɛn dɔn mek di Izrɛlayt dɛn go. Dɛn bin de se: ‘Wi dɔn mek wi slev dɛn go!’

So Fɛro chenj in maynd bak. Kwik kwik wan, i dɔn rɛdi in chariɔt ɛn in sojaman dɛn. Dɔn i bigin fɔ rɔnata di Izrɛlayt dɛn wit 600 spɛshal chariɔt dɛn, ɛn ɔl di ɔda chariɔt dɛn we de na Ijipt.

We di Izrɛlayt dɛn si Fɛro ɛn in sojaman dɛn de kam, dɛn fred. Dɛn nɔ gɛt say fɔ rɔnawe go. Di Rɛd Si de wan say, ɛn di Ijipshian dɛn de kam di ɔdasay. Bɔt Jiova mek klawd de midul in pipul dɛn ɛn di Ijipshian dɛn. Dis mek di Ijipshian dɛn nɔ ebul fɔ si di Izrɛlayt dɛn fɔ fɛt dɛn.

Afta dat, Jiova tɛl Mozis fɔ pɔynt in stik oba di Rɛd Si. We i pɔynt in stik, Jiova mek ebi briz blo. Dɔn di wata opin ɛn tinap lɛk tu ay ay wɔl.

Na de di Izrɛlayt dɛn bigin fɔ waka na di dray grɔn. Di pipul dɛn ɛn di animal dɛn bin bɔku, so i te smɔl fɔ lɛ dɛn ɔl krɔs. Ɛn natin nɔ du dɛn te dɛn rich di ɔdasay. Afta ɔl dis, di Ijipshian dɛn bigin fɔ si di Izrɛlayt dɛn bak. Bɔt di Izrɛlayt dɛn bin stil de rɔnawe. So di Ijipshian dɛn rɔn wit spid go insay di wata fɔ rɔnata dɛn.

We dɛn rich midul di wata, Gɔd mek di taya dɛn we de pan dɛn chariɔt dɛn bigin kɔmɔt. Di Ijipshian dɛn fred ɛn dɛn bigin fɔ kray se: ‘Jiova de fɛt fɔ di Izrɛlayt dɛn. Una lɛ wi tɔn bak.’ Bɔt oya, dɛn nɔ ebul tɔn bak igen!

Da sem tɛm de, Jiova tɛl Mozis fɔ pɔynt in stik bak oba di Rɛd Si, lɛk aw yu bin si na di pikchɔ. We Mozis pɔynt in stik, na in di wata kɔba di Ijipshian dɛn ɛn dɛn chariɔt dɛn. Ɔl di Ijipshian sojaman dɛn bin dɔn go insay di wata fɔ rɔnata di Izrɛlayt dɛn. So dɛn ɔl day.

Gɔd in pipul dɛn gladi bad we Gɔd dɔn sev dɛn. Di man dɛn bigin siŋ fɔ tɛl Jiova tɛnki. Dɛn siŋ se: ‘Jiova dɔn win. I dɔn mek di ɔs dɛn ɛn di wan dɛn we de rayd dɛn drawn insay di wata.’ Mozis in sista we na Miriam ɛn ɔl di ɔda uman dɛn, tek tin dɛn we dɛn de kɔl tamborin, ɛn bigin siŋ ɛn dans. Dɛn ɛn di man dɛn bin de siŋ se: ‘Jiova dɔn win. I dɔn mek di ɔs dɛn ɛn di wan dɛn we de rayd dɛn drawn insay di wata.’