YU DE si wetin de apin na di pikchɔ? Dɛn man ya na Izrɛlayt fetman dɛn. Na wata di man dɛn we butu de drink. Di man we tinap nia dɛn nem Gidyɔn. In na jɔj. I de wach aw dɛn de drink.

Yu de si di difrɛn we aw di man dɛn de drink? Sɔm dɛn de butu ɛn put dɛn fes dɔŋ di wata. Bɔt wan pan dɛn nɔ put in fes dɔŋ di wata, i de tek di wata ɔp wit in an fɔ lɛ i go si wetin de apin rawnd am. Dis bin impɔtant bikɔs Jiova tɛl Gidyɔn se na di man dɛn nɔmɔ we de drink ɛn wach, i fɔ pik. Gɔd tɛl Gidyɔn fɔ mek di ɔda wan dɛn go bak na os. Lɛ wi si wetin mek.

Bɔku trɔbul dɔn mit di Izrɛlayt dɛn bak. Yu no wetin mek? Na bikɔs dɛn nɔ de du wetin Jiova want. Na di pipul dɛn we de na Midian de rul dɛn, ɛn dɛn de trit dɛn bad. So di Izrɛlayt dɛn pre mek Jiova ɛp dɛn, ɛn Jiova lisin to dɛn prea.

Jiova tɛl Gidyɔn fɔ pik sɔm man dɛn fɔ fɛt. So Gidyɔn pik 32,000 fɛtman dɛn. Bɔt di Midianayt dɛn gɛt 135,000 sojaman dɛn. Bɔt Jiova tɛl Gidyɔn se: ‘Yu fɛtman dɛn tu bɔku.’ Wetin mek Jiova tɛl am so?

Na bikɔs, if di Izrɛlayt dɛn win di fɛt, dɛn go tink se na dɛn fɛt fɔ dɛnsɛf. Dɛn nɔ go tink se na Jiova ɛp dɛn fɔ win. So Jiova tɛl Gidyɔn se: ‘Tɛl ɔl di man dɛn we de fred, fɔ go na dɛn os.’ We Gidyɔn tɛl dɛn, 22,000 pan in fɛtman dɛn tɔn bak. So na 10,000 fɛtman dɛn nɔmɔ lɛf fɔ fɛt di 135,000 Midianayt sojaman dɛn.

Bɔt Jiova tɛl Gidyɔn bak se: ‘Yu fɛtman dɛn stil bɔku.’ So i se lɛ Gidyɔn mek di man dɛn kam drink na dis watasay. Ɛn Jiova tɛl Gidyɔn fɔ mek ɔl di wan dɛn we put dɛn fes dɔŋ di wata fɔ drink, tɔn bak. Jiova prɔmis am se: ‘A go mek yu win di fɛt wit di 300 man dɛn we bin de wach we dɛn de drink.’

We di tɛm rich fɔ fɛt, Gidyɔn sheb in 300 man dɛn to tri pat. I gi dɛn ɔl ɔn ɛn kɔntri pɔt. I put tik we gɛt faya insay di pɔt. We midulnɛt rich, dɛn go gɛda rawnd di Midianayt sojaman dɛn. Dɔn dɛn ɔl blo dɛn ɔn ɛn brok dɛn kɔntri pɔt dɛn togɛda. Dɔn dɛn ɔl ala se: ‘Jiova in sɔd ɛn Gidyɔn in sɔd!’ We di Midianayt sojaman dɛn wek, dɛn kɔnfyus ɛn fred. Dɛn ɔl bigin rɔn, ɛn di Izrɛlayt dɛn win di fɛt.