LUK di pikchɔ. Wetin dɛn pipul ya de du? Dɛn de wɔship di kaw pikin! Yu no wetin mek dɛn de du dis?

We Mozis te ɔp di mawnten, di pipul dɛn se: ‘Wi nɔ no wetin dɔn apin to Mozis. So una lɛ wi mek wan gɔd we go pul wi kɔmɔt na dis ples.’

Mozis in brɔda we na Erɔn tɛl dɛn se: ‘Ɛnti na so una se, una pul una gold yerin dɛn ɛn kam wit dɛn to mi.’ We di pipul dɛn gi am, i mɛlt di gold yerin dɛn ɛn mek wan kaw pikin. Ɛn di pipul dɛn se: ‘Na dis na wi Gɔd we pul wi kɔmɔt na Ijipt!’ Dɔn di Izrɛlayt dɛn mek wan big pati, ɛn bigin wɔship di kaw pikin we dɛn mek wit gold.

We Jiova si wetin di pipul dɛn de du, i vɛks bad bad wan. So i tɛl Mozis se: ‘Go dɔŋ di mawnten wantɛm! Di pipul dɛn de du bad tin. Dɛn dɔn fɔgɛt mi lɔ dɛn, ɛn dɛn de wɔship kaw pikin we dɛn mek wit gold.’

Mozis go dɔŋ di mawnten wantɛm. We i go nia di pipul dɛn, yu no wetin i si? I si di pipul dɛn de siŋ ɛn dans rawnd di kaw pikin we dɛn mek wit gold. Dis mek Mozis vɛks. So i ib di tu flat ston dɛn we gɛt Gɔd in lɔ dɛn, ɛn dɛn brok. Na de i tek di kaw pikin we dɛn mek wit gold ɛn mɛlt am. Dɔn i nak nak am te i tɔn pawda.

Na bad tin di pipul dɛn dɔn du. So Mozis tɛl sɔm man dɛn fɔ tek dɛn sɔd dɛn. Dɔn i tɛl dɛn se: ‘Una kil di bad pipul dɛn we wɔship di kaw pikin we dɛn mek wit gold.’ So di man dɛn kil 3,000 pipul dɛn. Dis tin we apin de sho wi se na Jiova nɔmɔ wi fɔ wɔship, wi nɔ fɔ wɔship lay lay gɔd dɛn.