DI IZRƐLAYT dɛn de na di ɛmti land usay pɔsin nɔ go ebul de te 10 ia pas, te 20 ia pas, te 30 ia pas, te 39 ia pas. Ɛn dɛn stil de de. Bɔt ɔl dɛn tɛm ya Jiova bin de kia fɔ dɛn. I bin de gi dɛn mana fɔ it. I bin de mek klawd de oba dɛn santɛm ɛn faya de oba dɛn na nɛt. Na so i bin de du fɔ sho dɛn usay dɛn fɔ go. Ɛn ɔl dɛn tɛm ya dɛn klos dɛn nɔ chɛr ɛn dɛn fut dɛn nɔ wund ɔ swɛl.

Di Izrɛlayt dɛn kam bak na Kedɛsh di fɔs mɔnt insay di ia we mek 40 frɔm we dɛn kɔmɔt na Ijipt. Naya dɛn bin de we dɛn sɛn di 12 man dɛn fɔ go luk aw Kenan tan. Ɛn naya Mozis in sista day. Dɛn kam gɛt di sem prɔblɛm we dɛn bin gɛt di tɛm we dɛn bin de na Kedɛsh.

Wata nɔ de naya fɔ di pipul dɛn fɔ drink. So dɛn grɔmbul to Mozis se: ‘I bin fɔ bɛtɛ if wi bin dɔn day. Wetin mek yu pul wi kɔmɔt na Ijipt ɛn kam wit wi na dis ples usay natin nɔ de gro? Di tin dɛn we wi bin de it na Ijipt nɔ de ya. Wata sɛf nɔ de fɔ drink.’

We Mozis ɛn Erɔn go pre na di tɛnt usay dɛn de wɔship, Jiova tɛl Mozis se: ‘Gɛda ɔl di pipul dɛn. Dɔn tinap bifo dɛn ɛn tɔk to da big ston we de oba yanda. Bɔku bɔku wata go kɔmɔt insay de fɔ di pipul dɛn ɛn ɔl dɛn animal dɛn.’

So Mozis gɛda di pipul dɛn ɛn tɛl dɛn se: ‘Una we nɔ biliv Gɔd, una lisin! Na mi ɛn Erɔn fɔ pul wata na dis big ston fɔ una?’ Na in Mozis nak di big ston tu tɛm wit in stik ɛn bɔku bɔku wata kɔmɔt insay di big ston. Di wata du fɔ ɔl di pipul dɛn ɛn di animal dɛn fɔ drink.

Bɔt Jiova vɛks pan Mozis ɛn Erɔn. Yu no wetin mek? Na bikɔs Mozis ɛn Erɔn bin se na dɛn go mek wata kɔmɔt insay di big ston. Bɔt na Jiova bin mek wata kɔmɔt insay di big ston. Ɛn bikɔs Mozis ɛn Erɔn nɔ tɔk di tru bɔt udat mek wata kɔmɔt insay di big ston, Jiova se i go pɔnish dɛn. I tɛl dɛn se: ‘Una nɔ go go wit mi pipul dɛn na Kenan.’

I nɔ tu te, di Izrɛlayt dɛn kɔmɔt na Kedɛsh ɛn go na wan ples we dɛn de kɔl Mawnt Ɔ. Na ɔp dis mawnten ya Erɔn day. I bin ol 123 ia we i day. Di Izrɛlayt dɛn at pwɛl we Erɔn day, so dɛn kray fɔ am fɔ 30 dez. Na in pikin we na Ɛlieza, bi di ay prist na Izrɛl.