AFTA Kiŋ Jɛroboam day, ɔl di ɔda kiŋ dɛn we rul di kiŋdɔm we gɛt tɛn trayb bin bad. Kiŋ Eab bad pas dɛn ɔl. Yu no wetin mek? Wan pan di tin dɛn we mek i bad pas ɔl di ɔda kiŋ dɛn, na bikɔs in wɛf na wikɛd uman. In wɛf nem Kwin Jezibɛl.

Jezibɛl nɔto Izrɛlayt uman. In papa na di kiŋ na wan kɔntri we dɛn de kɔl Saydɔn. Jezibɛl de wɔship wan lay lay gɔd we dɛn kɔl Beal. I mek Eab ɛn bɔku Izrɛlayt dɛn bigin wɔship Beal. Jezibɛl nɔ lɛk Jiova ɛn i kil bɔku pan Jiova in prɔfɛt dɛn. Di ɔda prɔfɛt dɛn ayd insay dɛn ol we de na dɛn big ston dɛn fɔ mek Jezibɛl nɔ kil dɛn. If Jezibɛl want sɔntin, i kin ivin kil pɔsin fɔ gɛt da tin de.

Wan de, Kiŋ Eab in at bin pwɛl bad. So Jezibɛl aks am se: ‘Wetin mek yu at pwɛl so tide?’

Eab se: ‘Na wetin Nebɔt tɛl mi mek mi at pwɛl. A bin want fɔ bay in fam, bɔt i tɛl mi se i nɔ de sɛl am.’

Jezibɛl tɔk se: ‘Nɔ wɔri, a go mek yu gɛt da fam de.’

So Jezibɛl rayt lɛta to sɔm bigman dɛn na di tɔŋ usay Nebɔt de. I tɛl dɛn se: ‘Una mek sɔm man dɛn we nɔ bɛtɛ tɔk se Nebɔt dɔn tɔk bad bɔt Gɔd ɛn di kiŋ. Dɔn, una pul am na di tɔŋ ɛn ston am te i day.’

As Jezibɛl no se Nebɔt dɔn day so, na de i tɛl Eab se: ‘Go tek Nebɔt in fam naw.’ Yu nɔ fil se dɛn fɔ pɔnish Jezibɛl fɔ dis bad tin we i du?

Afta sɔm tɛm, Jiova sɛn wan man we nem Jeu fɔ go pɔnish am. We Jezibɛl yɛri se Jeu de kam, i go pent pent insɛf ɛn tray fɔ mek insɛf fayn. We Jeu kam, i si Jezibɛl na di winda. Jeu tɛl di man dɛn we de na di kiŋ in os se: ‘Una ib am dɔŋ!’ Di man dɛn du wetin i tɛl dɛn, jɔs lɛk aw yu de si na di pikchɔ. Dɛn ib am dɔŋ, ɛn i day. Na so wikɛd Kwin Jezibɛl day.