I DƆN tek lɛk tu ia so frɔm we di pipul dɛn we kɔmɔt na Midya ɛn Pashya kam fɛt ɛn win di pipul dɛn na Babilɔn. Luk wetin de apin naw. Di Izrɛlayt dɛn de kɔmɔt na Babilɔn. Aw dis apin? Na udat fri dɛn?

Na Sayrɔs fri dɛn. Na in na di kiŋ na Pashya. Lɔntɛm bifo dɛn bɔn Sayrɔs, Jiova tɛl Ayzaya fɔ rayt bɔt Sayrɔs se: ‘Yu go du ɛnitin we a want mek yu du. Di get dɛn nɔ go lɔk we yu de go fɛt di pipul dɛn na di tɔŋ.’ Ɛn na so i bi. Na Sayrɔs bin de bifo fɔ fɛt di pipul dɛn na Babilɔn. Di pipul dɛn we kɔmɔt na Midya ɛn Pashya bin kam insay di tɔŋ na nɛt, ɛn di get dɛn bin opin.

Bɔt Ayzaya bin tɔk bak se, Sayrɔs go mek di Izrɛlayt dɛn mek Jerusɛlɛm ɛn bil di tɛmpul bak. Yu tink se Sayrɔs bin du am? Yɛs, i bin du am. Sayrɔs tɛl di Izrɛlayt dɛn se: ‘Una go na Jerusɛlɛm, ɛn bil Jiova in tɛmpul.’ Na dat dɛn Izrɛlayt ya de go fɔ go du.

Bɔt nɔto ɔl di Izrɛlayt dɛn we de na Babilɔn bin ebul go bak na Jerusɛlɛm. Di ples bin fa, na bin lɛk 500 mayl so. Bɔku pan di Izrɛlayt dɛn bin dɔn ol ɛn ɔda wan dɛn bin sik, so dɛn nɔ bin ebul go. Ɛn ɔda tin dɛn bak bin mek sɔm pipul dɛn nɔ ebul go bak na Jerusɛlɛm. Sayrɔs tɛl di wan dɛn we nɔ ebul go, se: ‘Una gi silva ɛn gold ɛn ɔda fayn fayn tin dɛn to di wan dɛn we de go fɔ go mek Jerusɛlɛm ɛn bil di tɛmpul.’

So dɛn gi bɔku fayn fayn tin dɛn to di Izrɛlayt dɛn we de go bak na Jerusɛlɛm. Sayrɔs insɛf gi dɛn di kɔp dɛn ɛn di bol dɛn we Kiŋ Nɛbukanɛza bin pul na Jiova in tɛmpul. So di pipul dɛn gɛt plɛnti tin dɛn fɔ kɛr go na Jerusɛlɛm.

Di Izrɛlayt dɛn tek lɛk 4 mɔnt so bifo dɛn rich na Jerusɛlɛm. I dɔn tek 70 ia frɔm we di pipul dɛn na Babilɔn kam pwɛl di tɔŋ, ɛn nɔbɔdi nɔ bin de de. Bɔku bad bad tin dɛn apin to di Izrɛlayt dɛn, pan ɔl we dɛn dɔn kam bak na dɛn yon kɔntri. Na dat di ɔda stori go tɔk bɔt.