NA PITA tinap yanda so, ɛn di wan dɛn we de biɛn am, na in padi dɛn. Bɔt wetin mek dis man ya de butu to Pita? Yu tink se i fayn fɔ du dat? Yu no udat na dis man?

Di man nem Kɔnilyɔs. In na Roman sojaman. Kɔnilyɔs nɔ sabi Pita, bɔt wan enjɛl tɛl am mek i sɛn kɔl Pita fɔ kam na in os. Lɛ wi si aw ɔl dis apin.

Na di Ju pipul dɛn fɔs bigin fala Jizɔs, bɔt Kɔnilyɔs nɔto Ju. Pan ɔl we in nɔto Ju, i lɛk Gɔd. I kin pre to am, ɛn i kin du gud to pipul dɛn. Wan aftanun, wan enjɛl apia to am ɛn tɛl am se: ‘Gɔd gladi fɔ yu, ɛn i de kam ansa yu prea dɛn. Sɛn sɔm man dɛn na Jopa fɔ go kɔl wan man we nem Pita. I de na Jopa to wan man we nem Saymɔn, we in os de nia di si.’

So wantɛm wantɛm, Kɔnilyɔs sɛn sɔm man dɛn fɔ go kɔl Pita. Di ɔda de we di man dɛn rich nia Jopa, Pita bin de ɔp di ruf na Saymɔn in os. Na de Gɔd mek Pita si wan tin we fiba big bedshit de kɔmɔt na ɛvin ɛn kam dɔŋ. Ɔlkayn animal dɛn bin de pan di bedshit. Gɔd in lɔ bin se dɛn animal ya nɔ fayn fɔ it. Bɔt Pita yɛri vɔys tɛl am se: ‘Pita, grap, kil ɛnitin ɛn it am.’

Pita ansa se: ‘Nɔ, sa. A nɔ wande it dɛn animal ya bikɔs dɛn nɔ fayn fɔ it.’ Bɔt di vɔys tɛl Pita se: ‘Lɛf fɔ se dɛn nɔ fayn fɔ it, we Gɔd dɔn se naw dɛn fayn fɔ it.’ Na tri tɛm dis tin apin to Pita. We Pita de tink bɔt wetin dis min, na de di man dɛn we Kɔnilyɔs sɛn, kam na di os ɛn aks fɔ am.

Pita kam dɔŋ ɛn go mit dɛn. I tɛl dɛn se: ‘Na mi na di man we una de luk fɔ. Wetin mek una kam?’ Di man dɛn tɛl am se na wan enjɛl tɛl Kɔnilyɔs fɔ sɛn mek dɛn kam kɔl am. So Pita gri fɔ go wit dɛn. Di ɔda de, Pita ɛn in padi dɛn go to Kɔnilyɔs na Sizeria.

Kɔnilyɔs bin dɔn kɔl ɔl in fambul dɛn ɛn padi dɛn. We Kɔnilyɔs yɛri se Pita dɔn kam, i go mit am ɛn butu to am, lɛk aw yu de si na di pikchɔ. Bɔt Pita tɛl am se: ‘Grap, misɛf na mɔtalman.’ Di Baybul se i nɔ fayn fɔ wɔship mɔtalman. Na Jiova nɔmɔ wi fɔ wɔship.

Pita prich to Kɔnilyɔs ɛn di wan dɛn we bin de wit am. I tɛl dɛn se: ‘Gɔd nɔ de luk ɛnibɔdi lɛk se i bɛtɛ pas in kɔmpin.’ We Pita de tɔk, Gɔd sɛn oli spirit pan di pipul dɛn, ɛn dɛn bigin tɔk difrɛn difrɛn langwej dɛn. Dis mek di Ju disaypul dɛn we kam wit Pita, sɔprayz. Dɛn bin fil se na di Ju pipul dɛn nɔmɔ Gɔd lɛk. So dis mek dɛn no se, nɔbɔdi nɔ bɛtɛ pas in kɔmpin na Gɔd in yay. Yu nɔ tink se dis na fayn tin we wi ɔl fɔ de mɛmba?