1-3. Us ɛnimi de rɔnata wi ɔl? Wetin mek i fayn fɔ no wetin rili di Baybul de tich?

TINK bɔt dis: Yu ɛnimi de rɔnata yu. I gɛt trɛnk pas yu fa fawe ɛn i ebul rɔn pas yu. Yu no se i nɔ gɛt sɔri at bikɔs yu dɔn si i kil sɔm pan yu padi dɛn. Di mɔ yu de rɔn pan am, na di mɔ i de kam nia yu. I tan lɛk se ilɛk aw yu rɔn te, i go mɔs kech yu. Bɔt i nɔ tu te, pɔsin kam fɔ ɛp yu. Di pɔsin gɛt pawa pas yu ɛnimi fa fawe, ɛn i prɔmis yu se i go ɛp yu. Yu at go kol, nɔto so?

² Semweso, wan ɛnimi de rɔnata wi ɔl. Lɛk aw wi bin lan na Chapta 6, di Baybul se day na wi ɛnimi. Nɔbɔdi nɔ ebul rɔnawe pan am. Dis ɛnimi dɔn kil sɔm pan wi padi ɛn fambul dɛn. Bɔt Jiova gɛt pawa pas am fa fawe. Na in na di Pɔsin we kam fɔ sev wi na di ɛnimi in an, ɛn i dɔn du tin dɛn we dɔn sho wi se i ebul fɔ mek dis ɛnimi kɔmɔt biɛn wi. I prɔmis wi se i go kil dis ɛnimi so dat i nɔ go de igen. Di Baybul se: “Di las tin we Gɔd go pwɛl na day.” (Fɔs Lɛta Fɔ Kɔrint 15:​26) Nɔto gud nyus dat?

³ Lɛ wi tɔk smɔl bɔt aw wi kin fil we pɔsin we wi lɛk day. Dat go ɛp wi fɔ ɔndastand wan prɔmis we go mek wi gladi.  Jiova prɔmis wi se tɛm de kam we i go gi layf bak to di wan dɛn we dɔn day. (Ayzaya 26:​19, NW) Wi gɛt op se di wan dɛn we dɔn day go gɛt layf bak.

4. (a) Aw wi no aw Jiova de fil we pɔsin day? (b)  Aw Jizɔs bin de wit Lazarɔs ɛn in sista dɛn?

⁴ Aw wi kin fil we pɔsin we wi lɛk day? Wi at kin pwɛl ɛn wi kin fil lɛk se wi nɔ go ebul fɔ bia. Na da tɛm de i kin fayn fɔ mek wi rid Gɔd in Wɔd so dat i go kɔrej wi. (Rid Sɛkɛn Lɛta Fɔ Kɔrint 1:​3, 4.) Di Baybul go ɛp wi fɔ no aw Jiova ɛn Jizɔs kin fil we pɔsin day. Jizɔs, we di Baybul se tan lɛk in Papa, insɛf dɔn fil di we aw wi kin fil we pɔsin we wi lɛk day. (Jɔn 14:​9) We Jizɔs bin de na Jerusɛlɛm, i kin go fɛn Lazarɔs ɛn in tu sista dɛn we nem Meri ɛn Mata. Dɛn bin de na wan tɔŋ we dɛn kɔl Bɛtani. In ɛn dɛn na bin tayt tayt padi. Di Baybul se: “Jizɔs bin lɛk Mata, Mata in sista ɛn Lazarɔs.” (Jɔn 11:​5) Lɛk aw wi bin lan na Chapta 6, Lazarɔs bin day.

5, 6. (a) Aw Jizɔs bin fil we Lazarɔs day? Wetin i bin du? (b) Wetin mek di kray we Jizɔs bin kray de kɔrej wi?

⁵ Aw Jizɔs bin fil we in padi day? Di Baybul tɛl wi se we Jizɔs kam to Lazarɔs in fambul ɛn padi dɛn ɛn “si aw Meri ɛn di pipul dɛnsɛf we bin de wit am, de kray, i fil am bad bad wan.” Dɔn, yu no wetin apin? Di Baybul se: “Jizɔs kray.” (Jɔn 11:​33, 35) Yu tink se di kray we Jizɔs kray na bikɔs i nɔ go si Lazarɔs igen? Nɔ, nɔto dat bin mek i kray. Infakt, Jizɔs bin no se wan wɔndaful tin de kam apin. (Jɔn 11:​3, 4) Bɔt i bin kray bikɔs i bin fil am we Lazarɔs day.

⁶ Di kray we Jizɔs kray de rili kɔrej wi. I de sho wi se Jiova ɛn Jizɔs nɔ lɛk we pipul dɛn de day. Bɔt Jiova Gɔd ebul fɔ pul day kɔmɔt na di wɔl! Naw, wi de kam si wetin Gɔd bin ɛp Jizɔs fɔ du.

7, 8. Wetin mek nɔbɔdi nɔ bin tink se Lazarɔs go gɛt layf bak? Wetin Jizɔs bin du?

⁷ Dɛn bin dɔn bɛr Lazarɔs insay wan ston grev. So Jizɔs se mek dɛn pul di ston we bin de na di domɔt. Bɔt Mata nɔ bin want mek dɛn du dat bikɔs i bin dɔn pas 4 dez we Lazarɔs day, ɛn in bɔdi go dɔn de rɔtin ɛn bigin fɔ smɛl. (Jɔn 11:​39) Nɔbɔdi nɔ bin ɛva tink se Lazarɔs go gɛt layf bak.

⁸ We dɛn pul di ston, na de Jizɔs ala lawd wan se: “Lazarɔs, kam na do!” Yu no wetin apin? Lazarɔs we bin dɔn day, “kɔmɔt insay di grev.” (Jɔn 11:​43, 44) Yu nɔ tink se di pipul dɛn we bin de de bin gladi pasmak? Ilɛk Lazarɔs na bin dɛn brɔda, ɔ dɛn padi, ɔ dɛn neba, dɛn ɔl no se i bin dɔn day. Bɔt naw dis man we dɛn ɔl bin lɛk, dɔn gɛt layf bak. Dɛn nɔ bin biliv wetin dɛn si! Dɛn ɔl go mɔs dɔn gladi fɔ Lazarɔs. So, wi si se Jiova gɛt di pawa fɔ pul day kɔmɔt na di wɔl.

9, 10. (a) Aw Jizɔs mek di pipul dɛn no usay i pul di pawa fɔ gi Lazarɔs layf bak? (b) Wetin mek i fayn fɔ rid stori dɛn na di Baybul bɔt pipul dɛn we dɛn gi layf bak?

⁹ Jizɔs nɔ bin mek lɛk se na in pawa i yuz fɔ du dis mirekul. We i bin de pre bifo i gi Lazarɔs layf bak, i mek di pipul dɛn no se na Jiova mek Lazarɔs gɛt layf bak. (Rid Jɔn 11:​41, 42.) Dis nɔto di wangren tɛm we Jiova dɔn yuz in pawa fɔ gi layf bak to pɔsin we dɔn day. Insay di Baybul, na nayn stori dɛn de bɔt pipul dɛn we bin dɔn day we dɛn gi layf bak. Lazarɔs in yon na wan pan dɛn. * We wi rid ɛn stɔdi dɛn stori ya, kin mek wi at gladi. Dɛn de sho wi se Gɔd nɔ de tek wan pɔsin impɔtant pas ɔda pɔsin. Sɔm pan di wan dɛn we gɛt layf bak, na bin smɔl pikin, big pɔsin,  man, uman, Izrɛlayt ɛn pɔsin we nɔto Izrɛlayt. Dɛn stori ya de sho wi bak di we aw di pipul dɛn bin de gladi we pɔsin we bin dɔn day, gɛt layf bak. Fɔ ɛgzampul, we Jizɔs bin gi layf bak to wan man in gyal pikin, di Baybul se di pikin in mama ɛn papa “bin gladi bad bad wan.” (Mak 5:​42, NW) Fɔ tru, Jiova du sɔntin fɔ dɛn we mek dɛn gladi bad ɛn we dɛn nɔ go ɛva fɔgɛt.

¹⁰ Di wan dɛn we Jizɔs gi layf bak bin day leta. Bɔt yu tink se na fɔ natin Jizɔs bin gi dɛn layf bak? Nɔto fɔ natin. Dɛn stori ya de mek wi biliv sɔm impɔtant tin dɛn na di Baybul, ɛn dɛn de gi wi op fɔ se di wan dɛn we dɔn day go gɛt layf bak.

11. Aw Lazarɔs in stori ɛp wi fɔ ɔndastand wetin de na Ɛkliziastis 9:​5?

¹¹ Di Baybul se di wan dɛn we dɔn day nɔ “no natin.” Dɛn nɔ gɛt layf ɛn nɔ de liv ɔdasay. Lazarɔs in stori sho wi se dat na tru. We Jizɔs gi Lazarɔs layf bak, i bin kam tɛl pipul dɛn bɔt aw ɛvin fayn? Ɔ i kam tɛl dɛn bɔt di kayn bad tin dɛn we de apin na ɛl faya? Nɔ, di Baybul nɔ ɛva tɔk se Lazarɔs tɔk ɛnitin lɛk dat. Ɔl di 4 dez we i bin dɔn day, i nɔ bin “no natin.” (Ɛkliziastis 9:​5) I bin tan lɛk se Lazarɔs de pan dip slip.—Jɔn 11:​11.

12. Wetin mek wi biliv se Jizɔs bin rili gi Lazarɔs layf bak?

¹² Lazarɔs in stori de sho wi se fɔ tru di wan dɛn we dɔn day go gɛt layf bak. Bɔku pipul dɛn bin si we Jizɔs gi Lazarɔs layf bak. Ivin di edman dɛn pan Gɔd biznɛs we nɔ bin lɛk Jizɔs, nɔ bin se dis mirekul nɔ bin ɛva apin. Bifo dat, dɛn tɔk to dɛnsɛf se: “Wetin wi fɔ du? Una luk ɔl di wɔndaful wok dɛn we dis man ya [Jizɔs] de du!” (Jɔn 11:​47) Bɔku pipul dɛn kam fɔ si Lazarɔs afta Jizɔs gi am layf bak. We dɛn si se Lazarɔs dɔn gɛt layf bak, dɛn biliv se fɔ tru na Gɔd sɛn Jizɔs. Ɛn plɛnti pipul dɛn bigin biliv Jizɔs. Dis mek di  wikɛd edman dɛn pan Gɔd biznɛs bin plan fɔ kil Jizɔs ɛn Lazarɔs.—Jɔn 11:​53; 12:​9-11.

13. Wetin mek wi biliv se Jiova go rili gi layf bak to di wan dɛn we dɔn day?

¹³ Wetin mek wi biliv se tɛm de kam we di wan dɛn we dɔn day go gɛt layf bak? Na bikɔs Jizɔs bin se wande wande “ɔl dɛn pipul we dɔn day” go gɛt layf bak. (Jɔn 5:​28) Na Jiova mek ɔltin we gɛt layf. Yu tink se i go ebul fɔ gi wi layf bak? Yɛs, i go ebul. Bɔt i go du dat if i mɛmba wi. Yu tink se Jiova go ebul fɔ mɛmba ɔl di wan dɛn we dɔn day? Wi ɔl no se di sta dɛn we de na di skay plɛnti te nɔbɔdi nɔ ebul fɔ kɔnt dɛn. Bɔt di Baybul se Gɔd sabi dɛn ɔl nem. (Ayzaya 40:​26) So Jiova Gɔd ebul fɔ mɛmba ɔltin bɔt di wan dɛn we dɔn day ɛn i ebul fɔ gi dɛn layf bak.

14, 15. Aw di tin we Job tɔk, sho se Jiova rili want fɔ gi layf bak to di wan dɛn we dɔn day?

¹⁴ Aw Jiova de fil fɔ gi layf bak to di wan dɛn we bin dɔn day? Di Baybul se Jiova rili want fɔ gi layf bak to di wan dɛn we bin dɔn day. Wan tɛm, wan fetful man we nem Job bin aks se: “If pɔsin day, i go gɛt layf bak?” Job bin de tɔk bɔt di tɛm we i go de na di grev de wet te Gɔd mɛmba am. I tɛl Jiova se: “Yu go kɔl, ɛn a go ansa. Yu rili want fɔ si di tin dɛn we yu dɔn mek.”—Job 14:​13-15, NW.

¹⁵ Jɔs tink bɔt dat! Job se Jiova rili want fɔ gi layf bak to di wan dɛn we dɔn day. Yu nɔ tink se i fayn we Jiova de fil da we de? Ɛn yu tink se na da sem we de i de fil fɔ di wan dɛn we dɔn day we i gɛt fɔ gi layf bak tumara bambay? Udat dɛn Gɔd go gi layf bak, ɛn usay dɛn go de?

16. Aw di wɔl go tan lɛk di tɛm we Gɔd go gi layf bak to di wan dɛn we dɔn day?

¹⁶ Di Baybul in stori dɛn bɔt di wan dɛn we Jiova gi layf bak de mek wi ɔndastand mɔ bɔt di tɛm we Jiova go gi layf bak to di wan dɛn we dɔn day. Di pipul dɛn we bin gɛt  layf bak, bin kam liv wit dɛn fambul ɛn padi dɛn bak. Na da sem we de i gɛt fɔ apin tumara bambay. Bɔt di wan we gɛt fɔ apin go bɛtɛ fa fawe pas di wan we bin apin trade. Lɛk aw wi bin lan na Chapta 3, Gɔd want mek di ol wɔl bi Paradays. So we di wan dɛn we dɔn day go gɛt layf bak, di wɔl go dɔn chenj. Da tɛm de, wɔ, sik ɛn ɔl dɛn ɔda bad bad tin dɛn nɔ go de igen. Pis ɛn gladi at go de ɔlsay na di wɔl ɛn dɛn pipul ya go gɛt di chans fɔ de sote go.

17. Udat dɛn go gɛt layf bak?

¹⁷ Udat dɛn go gɛt layf bak? Jizɔs bin se “ɔl dɛn pipul we dɔn day go yɛri wetin di Pikin [Jizɔs] de tɔk, ɛn dɛn go rayz frɔm dɛn grev.” (Na wi mek am italiks; Jɔn 5:​28, 29) Semweso, Rɛvɛleshɔn 20:​13 se: “Ɔl dɛn wan we bin dɔn day na wata kɔmɔt na di wata kam ɔp; ɔl dɛn wan we bin dɔn day we bin de na grev [ediz insay Grik], rayz.” Di “grev” we dɛn tɔk bɔt na dis skripchɔ, min di say usay dɛn de bɛr ɔl di wan dɛn we dɔn day. (If yu want fɔ no mɔ bɔt dis na fɔ rid pej 212 to pej 213.) Tɛm go kam we nɔbɔdi nɔ go de de igen. Ɔl di wan dɛn we de de, go gɛt layf bak. Apɔsul Pɔl bin se: “Gɔd go mek ɔlman, gud ɔ bad, rayz frɔm dɛn grev.” (Di Apɔsul Dɛn Wok [Akt] 24:​15) Wetin dis min?

18. Udat dɛn na di “gud” pipul dɛn we go gɛt layf bak? Wetin wi nɔ de fred igen?

¹⁸ Sɔm pan di “gud” pipul dɛn we go gɛt layf bak na pipul dɛn we wi bin dɔn rid bɔt na di Baybul ɛn we bin de na di wɔl bifo Jizɔs kam. Sɔm pan dɛn na Noa, Ebraam, Sera, Mozis, Rut, Ɛsta ɛn bɔku ɔda wan dɛn. Dɛn tɔk bɔt dɛn pipul ya insay Di Ibru Pipul Dɛn, chapta 11. Di ɔda “gud” pipul dɛn we di Baybul tɔk bɔt na pipul dɛn we de wɔship Jiova naw. We dɛn day, dɛnsɛf go gɛt layf bak. Bikɔs wi no se tɛm go kam we Gɔd go gi layf bak to di wan dɛn we dɔn day, dat dɔn mek wi nɔ de fred fɔ day.​—Di Ibru Pipul Dɛn 2:​15.

19. Udat dɛn na di “bad” pipul dɛn? Us chans Jiova go gi dɛn?

 ¹⁹ Wetin go apin to ɔl di pipul dɛn we nɔ bin de du wetin Jiova want bikɔs dɛn nɔ bin no bɔt am? Na dɛn pipul ya di Baybul kɔl “bad” pipul dɛn. Jiova nɔ go fɔgɛt dɛn. Dɛnsɛf go gɛt layf bak ɛn dɛn go gɛt di chans fɔ lan bɔt Jiova ɛn sav am. Mɔtalman gɛt fɔ lan bɔt Gɔd fɔ wan tawzin ia. Na insay dis tɛm ya Gɔd go gi layf bak to di wan dɛn we bin dɔn day. Ɛn dɛn pipul ya go gɛt di chans fɔ wɔship Jiova wit di fetful pipul dɛn we go de na di wɔl. Da tɛm de, ɔlman go ɛnjɔy. Na dis tɛm ya di Baybul kɔl Jɔjmɛnt De. *

20. Wetin na Gɛɛna? Udat dɛn de go de?

²⁰ Na ɔlman we bin dɔn day go gɛt layf bak? Nɔ, nɔto dɛn ɔl go gɛt layf bak. Di Baybul se sɔm pipul dɛn we dɔn day, de na Gɛɛna. (Lyuk 12:​5, NW) Gɛɛna na bin wan dɔtibɔks we de nia Jerusɛlɛm. Na de dɛn bin de bɔn dedebɔdi ɛn dɔti. Di dedebɔdi dɛn we di Ju pipul dɛn bin de trowe de, na di wan dɛn we dɛn bin de tink se nɔ fit fɔ bɛr ɛn we nɔ go gɛt layf bak. So, Gɛɛna na fayn ɛgzampul we de sho wetin i min fɔ pwɛl sɔntin kpatakpata. Jizɔs gɛt fɔ jɔj di wan dɛn we gɛt layf ɛn di wan dɛn we dɔn day, bɔt na Jiova na di men Jɔj. (Di Apɔsul Dɛn Wok [Akt] 10:​42) I nɔ go gi layf bak to pipul dɛn we wikɛd ɛn we nɔ want fɔ chenj.

21, 22. (a) Us ɔda kayn layf pipul dɛn go gɛt we dɛn day? (b) Udat na di fɔs pɔsin we gɛt layf fɔ go na ɛvin?

²¹ Di Baybul tɔk bɔt wan ɔda kayn we aw pipul dɛn go gɛt layf bak. I se di pɔsin de tɔn spirit ɛn go na ɛvin. Insay di Baybul, na Jizɔs nɔmɔ bin dɔn gɛt dis kayn layf.

 ²² We Jizɔs day, Jiova nɔ bin mek i lɛf na di Grev. (Sam 16:​10; Di Apɔsul Dɛn Wok [Akt] 13:​34, 35) I gi am layf bak. Bɔt nɔto mɔtalman layf i gi am. Di Baybul se dɛn bin kil Krays we in na bin mɔtalman, bɔt Gɔd dɔn gi am layf bak as spirit. (Pita In Fɔs Lɛta 3:​18) Dis mirekul bin pas ɔda mirekul dɛn. Jizɔs bin gɛt layf bak as spirit pɔsin! (Rid Fɔs Lɛta Fɔ Kɔrint 15:​3-6.) Afta Jizɔs day, na in bi di fɔs pɔsin we gɛt layf fɔ go na ɛvin, bɔt nɔto in go bi di las pɔsin we go gɛt dis kayn layf.​—Jɔn 3:​13.

23, 24. Udat na di pipul dɛn we “nɔ plɛnti”? Na dɛn ɔmɔs?

²³ We Jizɔs bin no se i nɔ go te igen i go go bak na ɛvin, i tɛl in disaypul dɛn se i de go “rɛdi ples” fɔ dɛn de. (Jɔn 14:​2) Jizɔs bin se di wan dɛn we go go na ɛvin “nɔ plɛnti.” (Lyuk 12:​32) So ɔmɔs pipul dɛn go go na ɛvin? Insay Rɛvɛleshɔn 14:​1, apɔsul Jɔn se: “A si di Ship [Jizɔs Krays] tinap pantap di ay il we dɛn kɔl Zayɔn. Wan ɔndrɛd ɛn fɔti-fo tawzin pipul bin tinap de wit am. Di Ship in nem ɛn in Papa in nem bin rayt pan dɛn fɔrɛd.”

²⁴ Jizɔs in disaypul dɛn de pan di 144,000 pipul dɛn we go gɛt layf fɔ go na ɛvin. Ustɛm dɛn go gɛt da layf de? Di apɔsul Pɔl bin se dɛn go gɛt da layf de di tɛm we Jizɔs “Krays kam bak.” (Fɔs Lɛta Fɔ Kɔrint 15:​23) We Pɔl bin tɔk se Jizɔs Krays go “kam bak,” i bin de tɔk bɔt di tɛm we Jizɔs go de rul. Insay Chapta 9, wi go si se na insay da tɛm de wi de naw. So, ɛniwan pan di 144,000 pipul dɛn we go day naw, go gɛt layf bak wantɛm wantɛm fɔ go na ɛvin. (Fɔs Lɛta Fɔ Kɔrint 15:​51-55) Bɔt bɔku pipul dɛn go gɛt di chans fɔ gɛt layf bak tumara bambay insay Paradays na dis wɔl.

25. Wetin wi go tɔk bɔt na di ɔda chapta?

²⁵ Jiova go pul day na di wɔl ɛn day nɔ go de igen. (Rid Ayzaya 25:​8.) Wetin di wan dɛn we de go na ɛvin, de go du de? Dɛn de go jɔyn di gɔvmɛnt we de na ɛvin. Wi go no mɔ bɔt da gɔvmɛnt de na di ɔda chapta.