LƐSIN 11
Aw di Lɔ dɛn We De na di Baybul Kin Ɛp Wi?
1. Wetin mek i fayn fɔ mek Gɔd sho wi wetin fɔ du?
Aw di lɔ dɛn na di Baybul go mek wi nɔ du ɛnitin we go mek wi ɛn ɔda pipul dɛn lɔs wi layf?—SAM 36:9.
Na Gɔd mek wi ɛn i gɛt sɛns pas wi fa fawe. Gɔd tan lɛk papa we lɛk in pikin dɛn. I kia fɔ wi. I nɔ bin ɛva want mek wi de fɔ wisɛf. (Jɛrimaya 10:23) Jɔs lɛk aw pikin go kɔmɔt fayn if i mek in mama ɛn papa sho am wetin fɔ du, na so wisɛf go kɔmɔt fayn if wi mek Gɔd sho wi wetin fɔ du. (Ayzaya 48:17, 18) Gɔd put in lɔ dɛn na di Baybul fɔ sho wi wetin fɔ du.—Rid Sɛkɛn Lɛta To Timoti 3:16.
Jiova in lɔ dɛn de tich wi di bɛst we aw fɔ liv wi layf naw, ɛn dɛn de sho wi aw wi go gɛt layf we go de sote go. Bikɔs na Gɔd mek wi, wi fɔ gladi fɔ du di tin dɛn we i de tɛl wi.—Rid Sam 19:7, 11; Rɛvɛleshɔn 4:11.
2. Aw di Baybul de sho wi wetin fɔ du?
Di Baybul gɛt sɔm lɔ dɛn we de sho wi wetin fɔ du we difrɛn difrɛn tin dɛn apin na wi layf, ɛn i gɛt ɔda lɔ dɛn we de sho wi wetin fɔ du we patikyula tin apin na wi layf. (Ditarɔnɔmi 22:8) Wi fɔ tink gud wan fɔ no aw fɔ yuz dɛn lɔ ya. (Prɔvabs 2:10-12) Fɔ ɛgzampul, di Baybul tɛl wi se layf na gift we Gɔd gi wi. Dis go mek wi tek tɛm wit wi layf we wi de na wokples, na os, ɛn we wi de travul. I go mek wi nɔ du ɛnitin we go mek wi ɛn ɔda pipul dɛn lɔs wi layf.—Rid Di Apɔsul Dɛn Wok [Akt] 17:28.
3. Wetin na di tu lɔ dɛn we impɔtant pas ɔl di ɔda lɔ dɛn?
Jizɔs bin tɔk bɔt tu lɔ dɛn we rili impɔtant. Di fɔs wan de sho se Gɔd gi wi layf fɔ lɛ wi no am, fɔ lɛ wi lɛk am ɛn fɔ lɛ wi sav am te go. Wi fɔ de tink bɔt dis lɔ ɛnitɛm we wi want du sɔntin. (Prɔvabs 3:6) Di wan dɛn we de du wetin dis lɔ se go bi Gɔd in padi ɛn gɛt gladi at. Ɛn dɛn go gɛt layf we go de sote go.—Rid Matyu 22:36-38.
Di sɛkɔn lɔ go ɛp wi fɔ gɛt wanwɔd wit ɔda pipul dɛn. (Fɔs Lɛta Fɔ Kɔrint 13:4-7) If wi want du wetin dis lɔ se, wi fɔ trit pipul dɛn di we aw Gɔd de trit dɛn.—Rid Matyu 7:12; 22:39, 40.
4. Aw di lɔ dɛn we de na di Baybul kin ɛp wi?
Di lɔ dɛn we de na di Baybul de sho famili dɛn aw lɔv go mek dɛn gɛt wanwɔd. (Lɛta Fɔ Kɔlɔse 3:12-14) Di ɔda we we Gɔd in Wɔd de ɛp famili dɛn na dat i de tich se mared fɔ de te go.—Rid Mak 10: 7-9.
We wi du wetin di Baybul se, dat go mek wi gɛt di tin dɛn we wi nid na layf. Ɛn i go mek wi gɛt kolat ɔltɛm. Fɔ ɛgzampul, bɔsman dɛn kin want wokman dɛn we nɔ de tif ɛn lay ɛn we ebul wok tranga wan. (Prɔvabs 10:4, 26; Di Ibru Pipul Dɛn 13:18) Gɔd in Wɔd de tich wi bak se wi fɔ satisfay wit di tin dɛn we wi gɛt, ɛn wi fɔ valyu wi padi biznɛs wit Gɔd pas ɛnitin na dis wɔl.—Rid Matyu 6:24, 25, 33; Fɔs Lɛta To Timoti 6:8-10.
We wi de fala wetin di Baybul se, dat go mek wi gɛt wɛlbɔdi. (Prɔvabs 14:30; 22:24, 25) Fɔ ɛgzampul, Gɔd in lɔ se wi nɔ fɔ drink te wi chak. If wi du wetin da lɔ de se, wi nɔ go gɛt dɛn bad bad sik ɛn wi nɔ go gɛt aksidɛnt. (Prɔvabs 23:20) Jiova nɔ tɛl wi se wi nɔ fɔ drink rɔm, bɔt i se wi nɔ fɔ drink am pasmak. (Sam 104:15; Fɔs Lɛta Fɔ Kɔrint 6:10) Gɔd in Wɔd de tich wi se nɔto wetin nɔmɔ wi de du wi fɔ tek tɛm wit, bɔt wi fɔ ivin tek tɛm wit di tin dɛn we wi de tink bɔt. (Sam 119:97-100) Tru Kristian dɛn nɔ de du wetin Gɔd want jɔs bikɔs dɛn want fɔ bɛnifit dɛnsɛf. Bɔt dɛn de du am bikɔs dɛn rɛspɛkt Jiova.—Rid Matyu 5:14-16.
