Gɔd want mek yu bi in padi. Yu dɔn ɛva tink se yu go bi padi to di Pɔsin we de pantap ɔlman na di wɔl? Ebraam, we bin de trade trade, na bin Gɔd in padi. (Jems 2:23) Di Baybul tɔk bɔt ɔda pipul dɛn we bin ɛnjɔy padi biznɛs wit Gɔd ɛn dɛn bin gɛt bɔku blɛsin. Tide, pipul dɛn ɔlɔbɔt na di wɔl, dɔn bi Gɔd in padi. Yusɛf kin bi Gɔd in padi.

Fɔ bi Gɔd in padi bɛtɛ pas fɔ bi padi to ɛni mɔtalman. Gɔd nɔ de ɛva kɔmɔt biɛn in tru tru padi dɛn. (Sam 18:25) Fɔ bi Gɔd in padi bɛtɛ pas fɔ gɛt jɛntri. We jɛntri man day, in mɔni de go to ɔda pipul dɛn. Bɔt di wan dɛn we dɔn bi Gɔd in padi gɛt jɛntri we nɔbɔdi nɔ go ebul pul na dɛn an.—Matyu 6:19.

Sɔm pipul go want tap yu fɔ lan bɔt Gɔd. Ivin sɔm pan yu padi ɛn fambul dɛn go want tap yu. (Matyu 10:36, 37) If ɔda pipul dɛn laf ɔ trɛntin yu, aks yusɛf, ‘Udat a want mek gladi—mɔtalman ɔ Gɔd?’ Tink bɔt dis: If pɔsin tɛl yu mek yu nɔ it igen, yu go du am? Nɔ–o! Yu de it fɔ mek yu nɔ day. Bɔt Gɔd go mek yu de sote go! So nɔ ɛva mek ɛnibɔdi tap yu fɔ lan bɔt aw yu go bi Gɔd in padi.—Jɔn 17:3.