1-3. (a) Aw bɔku pipul dɛn kin fil bɔt di wok we dɛn de du? (b) Us kwɛstyɔn dɛn wi go tɔk bɔt insay dis chapta?

ƆLSAY na di wɔl, pipul dɛn de wok tranga wan fɔ kia fɔ dɛnsɛf ɛn dɛn famili. Bɔku pan dɛn nɔ lɛk di wok we dɛn de du, ɛn sɔm kin ivin fred fɔ go wok ɛvride. If na da we de yu de fil, wetin yu go du fɔ mek yu go rili ɛnjɔy di wok we yu de du? Aw yu go fil gud bɔt di wok we yu de du?

² Jiova tɛl wi se: “Ɔlman fɔ it, drink ɛn ɛnjɔy ɔl wetin i lebɔ fɔ.” Dis na gift we Gɔd dɔn gi wi. (Ɛkliziastis 3:​13) Jiova mek wi di we we wi go nid fɔ wok ɛn want fɔ wok. I want wi fɔ ɛnjɔy di wok we wi de du.—Rid Ɛkliziastis 2:​24; 5:​18.

³ So wetin go ɛp wi fɔ ɛnjɔy di wok we wi de du? Uskayn wok dɛn Kristian dɛn fɔ avɔyd? Aw wi go ebul wok ɛn stil wɔship Jiova? Ɛn us wok impɔtant pas ɔl di ɔda wok dɛn we wi gɛt?

4, 5. Aw Jiova de si wok?

⁴ Jiova na pɔsin we lɛk fɔ wok. Jɛnɛsis 1:​1 (NW)  tɔk se: “Na di biginin Gɔd mek di ɛvin ɛn di wɔl.” Afta we Gɔd bin dɔn fɔ mek di wɔl ɛn ɔl wetin de insay de, i bin tɔk se “ɔltin gud ɛn fayn.” (Jɛnɛsis 1:​31) Wi Gɔd we mek ɔltin bin gladi fɔ ɔl di tin dɛn we i bin dɔn mek.—Fɔs Lɛta to Timoti 1:​11, NW.

⁵ Jiova nɔ de ɛva lɛf fɔ wok. Jizɔs bin tɔk se: “Mi Papa de wok ɔltɛm.” (Jɔn 5:​17) Pan ɔl we wi nɔ no ɔl di wɔndaful tin dɛn we Jiova bin dɔn de du, wi no sɔm pan dɛn. I bin dɔn de pik di wan dɛn we go rul wit in Pikin, Jizɔs Krays, na ɛvin. (Sɛkɛn Lɛta Fɔ Kɔrint 5:​17) Jiova de wok bak fɔ gayd ɛn kia fɔ mɔtalman. Bikɔs dɛn de prich bɔt Gɔd in Kiŋdɔm ɔlsay na di wɔl, bɔku bɔku pipul dɛn de kam fɔ no Jiova ɛn dɛn gɛt op fɔ de na Paradays sote go.—Jɔn 6:​44; Lɛta Fɔ Rom 6:​23.

6, 7. Uskayn wokman Jizɔs bin bi?

⁶ Jizɔs lɛk fɔ wok jɔs lɛk in Papa. Bifo Jizɔs kam na di wɔl, na in bin de ɛp Gɔd fɔ mek ɔltin we de na ɛvin ɛn na dis wɔl. (Prɔvabs 8:​22-31; Lɛta Fɔ Kɔlɔse 1:​15-17) We Jizɔs bin de na dis wɔl, i bin kɔntinyu fɔ wok tranga wan. We i bin yɔŋ, i bin lan fɔ wok as kapɛnta, we min se sɔntɛm, i bin de bil os dɛn ɛn mek tin dɛn lɛk tebul, chia, ɛn bɔku ɔda tin dɛn. Jizɔs bin rili sabi du in wok ɛn dat bin mek bɔku pipul dɛn sabi am as “kapɛnta.”—Mak 6:​3.

⁷ Bɔt di wok we impɔtant pas ɔl we Jizɔs bin de du we i bin de na di wɔl na fɔ prich di gud nyuz ɛn tich pipul dɛn bɔt Jiova. I bin gɛt tri ɛn af ia fɔ dɔn di  prichin wok we i bin de du, ɛn i bin de wok tranga wan frɔm ali mɔnin te nɛt. (Lyuk 21:​37, 38; Jɔn 3:​2) Jizɔs bin de waka go fa fa say dɛn fɔ go prich di gud nyuz to bɔku pipul dɛn, ɛn i bin de waka na rod dɛn we gɛt bɔku dɔst.—Lyuk 8:​1.

8, 9. Wetin mek Jizɔs bin de ɛnjɔy di wok we i bin de du?

⁸ Fɔ du Gɔd in wok bin tan lɛk it to Jizɔs. Dis wok bin de gi am ɛnaji ɛn trɛnk. Sɔntɛnde, Jizɔs nɔ bin de ivin gɛt tɛm fɔ it sɔntin bikɔs i bin de wok tranga wan. (Jɔn 4:​31-38) I bin de yuz ɛni chans we i gɛt fɔ ɛp ɔda pipul dɛn fɔ lan bɔt in Papa. Na dat mek i bin ebul fɔ tɛl Jiova se: “A dɔn mek ɔlman na [di] wɔl si aw yu wɔndaful, a dɔn du ɔl di wok we yu gi mi fɔ du.”—Jɔn 17:​4.

⁹ Wi dɔn si klia wan se Jiova ɛn Jizɔs de wok tranga wan ɛn dɛn gladi ɛn satisfay wit di wok we dɛn de du. Wi want fɔ falamakata Gɔd, ɛn wi want fɔ “fala [Jizɔs] in fut mak gud gud wan.” (Lɛta Fɔ Ɛfisɔs 5:​1; Pita in Fɔs Lɛta 2:​21, NW) Na dat mek wi want fɔ wok tranga wan ɛn du wi bɛst pan ɛnitin we wi de du.

10, 11. Wetin go ɛp wi fɔ tink di rayt we bɔt di wok we wi de du?

¹⁰ As Jiova in pipul dɛn, wi de wok tranga wan fɔ kia fɔ wisɛf ɛn wi famili. Wi want fɔ gladi wit di wok we wi de du, bɔt dis nɔ kin rili izi. So wetin wi fɔ du if wi nɔ de ɛnjɔy di wok we wi de du?

¹¹ Tray fɔ tink di rayt we. Ilɛksɛf wi nɔ ebul fɔ chenj usay wi de wok ɔ di kayn wok we wi de du,  bɔt wi go ebul chenj di we aw wi de tink. We wi ɔndastand wetin Jiova want wi fɔ du, dat kin ɛp wi. Fɔ ɛgzampul: Jiova want di wan we de bifo di famili fɔ du ɔl wetin i ebul fɔ kia fɔ in famili. Infakt, di Baybul tɔk se di wan we nɔ de kia fɔ in famili “wɔs pas pɔsin we nɔ gɛt fet.” (Fɔs Lɛta to Timoti 5:​8, NW) If yu na pɔsin we de bifo yu famili, yu de wok tranga wan fɔ kia fɔ yu famili. We yu de gi yu famili wetin dɛn nid, yu de du sɔntin we de mek Jiova gladi, ilɛksɛf yu lɛk di wok we yu de du ɔ yu nɔ lɛk am.

12. Aw wi go bɛnifit we wi wok tranga wan ɛn bi ɔnɛs pɔsin?

¹² Wok tranga wan ɛn bi ɔnɛs pɔsin. Dis kin mek i izi fɔ yu fɔ ɛnjɔy yu wok. (Prɔvabs 12:​24; 22:​29) Wan tin na dat, yu bɔs go ebul fɔ biliv yu. Bɔsman dɛn kin valyu wokman dɛn we ɔnɛs bikɔs dɛn nɔ de tif dɛn mɔni, prɔpati, ɔ dɛn tɛm. (Lɛta Fɔ Ɛfisɔs 4:​28) Bɔt di tin we impɔtant pas ɔl na dat, Jiova de si wi we wi de wok tranga wan ɛn we wi bi ɔnɛs pɔsin. Yu go gɛt klin kɔnshɛns bikɔs yu no se yu de du wetin di Gɔd we yu lɛk want.—Di Ibru Pipul Dɛn 13:​18; Lɛta Fɔ Kɔlɔse 3:​22-24.

13. Wetin bak kin apin we wi bi ɔnɛs pɔsin na wi wokples?

¹³ No se di we aw yu de biev na yu wokples kin briŋ prez to Jiova. Dis na ɔda rizin fɔ mek wi gladi wit wi wok. (Taytɔs 2:​9, 10) I kin ivin bi se yu fayn ɛgzampul go mek wan pan yu wokmet dɛn go want fɔ stɔdi di Baybul.—Rid Prɔvabs 27:​11; Pita In Fɔs Lɛta 2:​12.

14-16. Wetin wi nid fɔ tink bɔt we wi de pik us wok fɔ du?

¹⁴ Di Baybul nɔ tɔk bɔt di kayn wok dɛn we Kristian dɛn fɔ du ɔ we dɛn nɔ fɔ du. Bɔt di Baybul gɛt tin dɛn we de gayd wi [prinsipul] fɔ disayd fɔ du di rayt tin bɔt wok biznɛs. (Prɔvabs 2:​6) As wi de yuz dɛn, wi fɔ de aks wisɛf di kwɛstyɔn dɛn we de na di nɛks paregraf dɛn.

¹⁵ If a du dis wok, i go mek a du sɔntin we Jiova se nɔ fayn? Wi dɔn lan bɔt tin dɛn we Jiova se i et,  lɛk fɔ tif ɛn lay. (Ɛksodɔs 20:​4; Di Apɔsul Dɛn Wok [Akt] 15:​29; Lɛta Fɔ Ɛfisɔs 4:​28; Rɛvɛleshɔn 21:​8) So wi de tek tɛm fɔ lɛ wi nɔ du ɛni wok we go mek wi pwɛl Jiova in lɔ dɛn.—Rid Jɔn In Fɔs Lɛta 5:​3.

¹⁶ If a du dis wok, a go sɔpɔt ɔ ɛp fɔ mek ɔda pɔsin du tin we Jiova nɔ lɛk? Fɔ ɛgzampul, fɔ bil os nɔto bad wok. Bɔt if dɛn gi yu wok fɔ bil chɔch, yu go du am? Na tru se fɔ bil di chɔch nɔ go mek yu miks pan lay lay wɔship, bɔt yu nɔ tink se if yu bil am yu dɔn sɔpɔt fɔ mek pipul dɛn tich lay lay tin dɛn bɔt Gɔd?—Rɛvɛleshɔn 18:​4.

17. Wetin go ɛp wi fɔ disayd fɔ du di rayt tin we go mek Gɔd gladi?

¹⁷ We wi alaw Jiova in Wɔd fɔ gayd wi, wi go bi di kayn pipul dɛn we Di Ibru Pipul Dɛn 5:​14 tɔk bɔt we i se wi “no wetin gud ɛn wetin bad, bikɔs [wi] dɔn lan aw fɔ no wetin gud ɛn bad bay dɛn tin we [wi] de du we rayt na Gɔd in yay.” Aks yusɛf: ‘If a tek dis wok, i go ambɔg ɔda pipul dɛn fet? Dis wok go mek a lɛf mi man ɔ wɛf ɛn mi pikin dɛn ɛn go de fa say ɔ ivin na ɔda kɔntri? Aw dat go afɛkt dɛn?’

18. Wetin kin mek i nɔ izi fɔ pe atɛnshɔn pan wi wɔship?

¹⁸ I nɔ kin izi fɔ put wi savis to Jiova fɔs na wi layf insay dis tɛm we tin rili “traŋa.” (Sɛkɛn Lɛta To Timoti 3:​1) Fɔ fɛn wok ɛn fɔ kɔntinyu fɔ du di wok nɔ kin rili izi. Wi nid fɔ kia fɔ wi famili, bɔt wi no se na wi savis to Jiova fɔ kam fɔs. Wi nɔ fɔ alaw mɔni biznɛs fɔ bi di tin we impɔtant pas ɔl na wi layf. (Fɔs  Lɛta To Timoti 6:​9, 10) So aw wi go “mek shɔ bɔt di tin dɛn we rili impɔtant” ɛn stil gi wi famili wetin dɛn nid?—Lɛta fɔ Filipay 1:​10, NW.

19. If wi abop pan Jiova, aw dat go ɛp wi fɔ sav am ɛn stil du wi wok?

¹⁹ Abop pan Jiova wit ɔl yu at. (Rid Prɔvabs 3:​5, 6.) Wi no se Jiova no wetin wi nid ɛn i rili bisin bɔt wi. (Sam 37:​25; Pita in Fɔs Lɛta 5:​7, NW) Gɔd in Wɔd, di Baybul tɛl wi se: “Una nɔ put ɔl una at pan kɔpɔ ɔltɛm, una fɔ satisfay wit wetin una gɛt, bikɔs Gɔd dɔn se, ‘A nɔ go lɛf yu, a go de wit yu ɔltɛm fɔ ɛp yu.’” (Di Ibru Pipul Dɛn 13:​5) Jiova nɔ want wi fɔ de wɔri tumɔs bɔt wetin wi de gi wi famili. I dɔn sho bɔku tɛm se i de gi in pipul dɛn wetin dɛn nid. (Matyu 6:​25-32) Ilɛk uskayn prɔblɛm wi gɛt wit wi wok, wi de kɔntinyu fɔ stɔdi Gɔd in Wɔd ɔltɛm, prich di gud nyuz, ɛn atɛnd wi Kristian mitin dɛn.—Matyu 24:​14; Di Ibru Pipul Dɛn 10:​24, 25.

20. Aw wi go kɔntinyu fɔ liv simpul layf?

²⁰ Pe atɛnshɔn pan Gɔd biznɛs. (Rid Matyu 6:​22, 23.) Dis min se wi fɔ liv simpul layf so dat wi go pe atɛnshɔn fɔ sav Jiova. Wi no se i nɔ go mek sɛns if wi alaw mɔni biznɛs, pɔsh layf, ɔ fɔ gɛt di letɛs ilɛktronik tin dɛn we dɛn dɔn mek fɔ bi di tin dɛn we impɔtant to wi pas wi padi biznɛs wit Gɔd. So wetin go ɛp wi fɔ put di impɔtant tin dɛn fɔs na wi layf? Wi fɔ tray tranga wan fɔ lɛ wi nɔ gɛt dɛt. If yu ɔlrɛdi gɛt dɛt, tray fɔ pe di dɛt ɔ fɛn we fɔ ridyus am. If wi nɔ tek tɛm, mɔni biznɛs go tek bɔku pan wi  tɛm ɛn trɛnk, ɛn wi nɔ go gɛt bɛtɛ tɛm fɔ pre, stɔdi, ɔ prich. Bifo wi alaw mɔni biznɛs fɔ miksɔp wi layf, wi fɔ lan fɔ satisfay wit wetin wi gɛt lɛk tin “fɔ it ɛn klos fɔ wɛr.” (Fɔs Lɛta To Timoti 6:​8) Ilɛk wetin de apin to wi, i fayn lɛ wi de chɛk wisɛf as tɛm de go ɛn si aw wi go sav Jiova mɔ ɛn mɔ.

21. Wetin mek wi nid fɔ disayd di tin we impɔtant pas ɔl na wi layf?

²¹ Tray fɔ du di tin dɛn we impɔtant. Wi nid fɔ yuz wi tɛm, trɛnk, ɛn mɔni ɔ prɔpati dɛn di rayt we. If wi nɔ tek tɛm, tin dɛn we nɔ tu impɔtant lɛk fɔ  lan bɔku buk ɔ fɔ gɛt bɔku mɔni, go tek ɔl wi tɛm. Jizɔs bin se: “Una put una at gud pan dɛn tin we impɔtant na di say we Gɔd de rul.” (Matyu 6:​33) Di tin dɛn we wi kin disayd fɔ du, wi abit dɛn, wetin wi kin du ɛvride, ɛn wi gol dɛn ɔl de sho wetin impɔtant pas ɔl na wi layf.

22, 23. (a) As Kristian dɛn, us impɔtant wok we wi go du? (b) Wetin go ɛp wi fɔ ɛnjɔy di wok we wi de du?

²² Di wok we impɔtant pas ɔl na fɔ sav Jiova ɛn prich di gud nyuz to ɔda pipul dɛn. (Matyu 24:​14; 28:​19, 20) Jɔs lɛk Jizɔs, wi want fɔ du ɔl wetin wi ebul fɔ du dis wok. Sɔm dɔn muf go na say usay dɛn nid mɔ pɔblisha dɛn fɔ prich. Ɔda wan dɛn de lan difrɛn langwej so dat dɛn go prich to pipul dɛn we de tɔk da langwej de. Tɔk wit di wan dɛn we dɔn du dɛn tin ya, ɛn aks dɛn kwɛstyɔn dɛn fɔ no mɔ. Dɛn go tɛl yu se dɛn rili gɛt gladi-at ɛn dɛn layf gɛt minin.—Rid Prɔvabs 10:​22.

²³ Tide, bɔku pipul dɛn de yuz bɔku pan dɛn tɛm fɔ wok ɔ ivin de du difrɛn wok dɛn fɔ gi dɛn famili wetin dɛn nid. Jiova no dis ɛn i de gladi fɔ ɔl di tin dɛn we wi de du fɔ kia fɔ wi famili. So lɛ wi ɔl kɔntinyu fɔ falamakata Jiova ɛn Jizɔs bay we wi de wok tranga wan, ilɛk uskayn wok wi de du. Ɛn lɛ wi mɛmba se di wok we impɔtant pas ɔl na fɔ sav Jiova ɛn prich di gud nyuz bɔt Gɔd in Kiŋdɔm. Dis go mek wi gɛt tru tru gladi-at.